އެލްޓީ ސްޕޯޓްސް ކުލަބް، 4-0 އިން ބަލިކޮށް މަސްއޮޑި ސްޕޯޓްސް ކުލަބުން އެމްޕީއެލް އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގެ ދެ ވަނަ ބުރުން ޖާގަ ހޯދުމާ ގާތައް ޖެހިލައިފި އެވެ.
ގައުމީ ފުޓުބޯޅަ ދަނޑުގައި މިއަދު ހަވީރު ކުޅުނު މެޗު މަސްއޮޑިން ކާމިޔާބުކުރީ އެ ޓީމުގެ ފުރަތަމަ މެޗެކޭ އެއްގޮތަށް ފަސޭހައިންނެވެ. މަސްއޮޑިން މި މުބާރާތުގައި ކުޅުނު ފުރަތަމަ މެޗުގައި މަހިބަދޫ ސްޕޯޓްސް ކުލަބްވެސް ބަލިކުރީ މި ނަތީޖާއިންނެވެ. އެހެންވެ، މަސްއޮޑި މި ވަގުތު ފަސް ޓީމު ހިމެނޭ މި ގްރޫޕްގެ އެއް ވަނައިގައި އޮތީ ކުޅުނު ދެ މެޗުން ހޯދި ހަ ޕޮއިންޓާ އެކުގަ އެވެ. އަދި ކުރިއަށް އޮތް މެޗު ކާމިޔާބުކޮށް މަސްއޮޑިއަށް ދެ ވަނަ ބުރަށް ދިޔުމުގެ ފުރުސަތު އެބައޮތެވެ.
މަސްއޮޑި ޓީމަށް ލަނޑު ޖަހައިދިނުމަށް ފަހު އެޑޫ އުފާފާޅުކުރަނީ: އެޑޫ އަކީ ފުރަތަމަ ޑިވިޝަނުގައި މީގެ ކުރިން މޮޅަށް ކުޅުނު ކުޅުންތެރިއެއް.--- ފޮޓޯ: އަބްދުﷲ އިޔާން / އަދަދު
މުޅި މެޗު ކަހަލަ ގޮތައް މަސްއޮޑިން ކޮންޓްރޯލް ކޮށްގެން ކުޅުނު މި މެޗުގެ 16 ވަނަ މިނެޓުގައި މަސްއޮޑިން ވަނީ ލަނޑު ޖަހާ ލީޑު ނަގައިފަ އެވެ. މި ލަނޑު އެ ޓީމަށް ޖަހާދިނީ އިބްރާހީމް ވަހީދު ހަސަން (އިއްބެ)ގެ އެހީތެރިކަމާ އެކު އައްޒާމް އަބްދުالله (އެޑޫ) އެވެ. މިއީ އޭރިއާ ބޭރުން ފޮނުވާލި ބާރު ހަމަލާއަކުން އޭނާ ކާމިޔާބުކުރި ލަނޑެކެވެ.
އޭގެ ފަހުން މެޗުގެ 31 ވަނަ މިނެޓުގައި މަސްްއޮޑިން ވަނީ އިތުރު ގޯލެއް ޖަހާ ލީޑު ފުޅާކޮށްފަ އެވެ. ބިދޭސީ ކުޅުންތެރިޔާ ޖޮހޮނޯފް ޝަރުދޯފް ނަގާދިން ކޯނަރަކުން މި ލަނޑު އެ ޓީމަށް ކާމިޔާބު ކޮށްދިނީ އޮޑިލީ ފީލިކްސް އެވެ. މި ގޯލަށް ފަހު ވެސް މަސްއޮޑީގެ އިއްބެ އާއި އަބްދުالله ޒިޔާން (ޖަންކީ) އަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރު ވެފަ އެވެ.
މަސްއޮޑި އާއި އެލްޓީ ސްޕޯޓްސް ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
މި މެޗުގެ ދެ ވަނަ ހާފު ފަށައިގެންވެސް މަސްއޮޑިން ގިނަ އެޓޭކުތަކެއްކޮށް ގިނަ ހަމަލާތަކެއް ވަނީ އުފައްދައިފަ އެވެ.
އެކަމަކު އެލްޓީގެ ކެޕްޓަން، ތަޖުރިބާކާރު ކުޅުންތެރިޔާ، އާދަމް ލަރީފް (ރޮނާ) ވަނީ މަސްއޮޑީގެ ގިނަ ހަމަލާތަކެއް ހުއްޓުވުމުގައި މުހިންމު ދައުރެއް އަދާކޮށްފަ އެވެ.
ދެ ވަނަ ހާފު ނިމެން ކައިރިވެފައި ވަނިކޮށް މަސްއޮޑީގެ ތިން ވަނަ ލަނޑު އެޓީމަށް ކާމިޔާބު ކޮށްދިނީ އިބްރާހީމް އާޒިމް އެވެ. އަދި އިތުރު ވަގުތުގައި އެލްޓީގެ ރޮނާ އެ ޓީމުގެ އޭރިއާ ތެރެއިން ކުރި ފައުލަކާއި ގުޅިގެން ދިން ޕެނަލްޓީއިން މަސްއޮޑީގެ ހަތަރު ވަނަ ލަނޑު ޖަހާދިނީ ސޮއްޑޯވް އެވެ.
މުބާރާތުގައި މާދަމާ ކުޅޭ މެޗުގައި ބީޖީ ސްޕޯޓްސް ކްލަބް ކުޅޭނީ ކްލަބް ޓީނޭޖްއާ އެވެ. ބީޖީ ވަނީ ފުރަތަމަ މެޗުން ޓެންޓް އަތުން ބަލިވެފަ އެވެ.
