ރާއްޖޭގައި އެންމެ ފެންވަރު ރަނގަޅު ކުޅިވަރު އެތުލީޓުން ބިނާކުރުމުގެ ވިސްނުމުގައި ހާއްސަ އިސްކަމެއް ދީގެން 20 އަހަރުގެ ޕްލޭނެއް އެކުލަވާލުމުގެ މަސައްކަތް ކުރައްވަމުން އަންނަ ކަމަށް ސްޕޯޓްސް، ފިޓްނަސް އެންޑް ރެކްރިއޭޝަން، މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ރާފިއު މި ގޮތަށް ވިދާޅުވެފައިވަނީ މިދިޔަ މަހު، މޯލްޑިވްސް އޮލިމްޕިކް ކޮމިޓީގެ އެތުލީޓްސް ކޮމިޝަން އިން ފުރަަތަމަ ފަހަރަށް ބޭއްވި އެތުލީޓްސް ފޯރަމްގައި ބައިވެރިވި އެތުލީޓުންނާ މުހާތަބުކޮށް ވާހަކަ ދެއްކެވިއިރު އެވެ.
ފާއިތުވި އަހަރުތަކުގައި އެތުލީޓުންނަށް ދިމާވާ މެޑިކަލް ކަންކަމުގައި އެންމެ އިސް ފަރާތެއްގެ ގޮތުގައި ބައިނަލްއަގުވާމީ ކުޅިވަަރު ގޭމްސްތަކުގައި ބައިވެރިވީ ރާފިއު އެވެ. އެތުލީޓުންގެ ހައްގުގައި މަސައްކަތް ކުރަން ހުންނެވި އެންމެ އިސް ފަރާތެއްގެ ގޮތުގައި އެތުލީޓުންނާ މުހާތަބުކޮށް މި ކަހަލަ ފޯރަމެއްގައި ފުރަތަމަ ފަހަރަށް ވާހަަކަ ދެއްކެވިއިރު، ރާފިއު ފާހަގަކުރެއްވީ ދުރު ރާސްތާ ވިސްނުމެއްގައި ކަންކަން ކުރާއިރު، މިހާރު ވެސް ކަންތައްތައް ފުރިހަމަވެފައި ހުންނަން ޖެހޭނެ ކަމުގެ ވާހަކަ އެވެ.
"އަޅުގަނޑުމެން މި އުޅެނީ ތިޔަކުދިން ތަމްރީން ކުރުމުގައި ގެންގުޅޭ ފިލޯސަފީ، ސިޔާސަތު، މި އަށް ވުރެ ރަނގަޅަށް، ކުޅިވަރުގެ ތުއްތު ކުދިން، ކުޅިވަރު ކުޅޭ ޕާކުން ފެށިގެން އިންޓަނޭޝަނަލް ޕޯޑިއަމްއާ ހަމައަށް ގެންދާނެ ކްލިއާ ޕާތުވޭ އެއް. އާދެ، މަގު ޗާޓެއް އެކުލަވާލުމުގެ މަސައްކަތް މިއަދުން ފެށިގެން ވެސް ކުރަމުން ގެންދާނެ،،" ރާފިއު ވިދާޅުވި އެވެ.
"މި މަގުޗާޓުގައި އަޅުގަނޑުމެން ހިމަނާނީ ކޮން ބަޔެއް ކަމާ ކީއްކުރާ ބައެއް ކަމާއި ކޮންތާކު ކިހިނެއް ކުރާ ކަމެއްކަން ވަރަށް ސާފުކޮށް ފެންނަ ގޮތަށް ދިގު ރާސްތާ ޕްލޭނެއް، 20 އަހަރުގެ ޕްލޭނެއް، ކޮންމެ ހަތަރު އަހަރަކުން ރިވިއު ކުރަމުންދާ ޕްލޭނެއް،"
ރާފިއު ވިދާޅުވީ މި ޕްލޭނުގެ މަސައްކަތް ކުރާނީ ވަރަށް ގިނަ ބަޔެއްގެ އިރުޝާދު ވެސް ހޯދައިގެން ކަމަށާއި އަދި ކުޅިވަރުގެ ކަންކަމުގައި ޝާމިލުވެ އުޅޭ އެކިއެކި ފަރާތްތަކުގެ ލަފާ ވެސް މި ކަމަށް މުހިންމުވާނެ ކަމަށެެވެ. އެއީ، މީގެ ފައިދާ ދިވެހި ކުޅިވަރަށް އެންމެ ރަނގަޅަށް ކުރާނީ ވީހާ ވެސް ގިނަ ބަޔެއްގެ ބައިވެރިވުން ބޮޑު ގޮތެއްގައި ހެދޭ ޕްލޭނަކުން ކަމަށް ރާފިއު ވެސް ދެކިލައްވަ އެވެ.
"މި ދެންނެވި ކުޅިވަރުގެ ޕާކުތަކުން ތުއްތު ކުދިން، ތަންކޮޅެއް ބޮޑުވީމަ ވަކި އުސޫލެއްގެ ދަށުން ވަކި ހަމަތަކެއްގެ ދަށުން ޓްރެއިން ކުރެވިގެން އައިސް، ގޭމްތައް ވިންކޮށް، ޕޯޑިއަމްތަކަށް އަރާ ރަން ވަނަތަކެއް ހާސިލްކުރެވޭނެ ނިޒާމެއް އެކަށައެޅިގެންދާނެ އިރާދަކުރެއްވިއްޔާ،"
އެތުލީޓްސް ފޯރަމްގައި ދެއްކެވި ވާހަކައިން ރާފިއު ވަނީ ގައުމީ ލެވަލްގައި ކުޅިވަރު ކުޅެމުން އަންނަ އެތުލީޓުންނަށް ވަރަށް ބޮޑު ޔަގީންކަމެއް ދީފަ އެވެ. ރާފިއު ވިދާޅުވީ، ޕޮލިސީ ލެވަލްގައި ކޮންމެ ކަމެއްވެސް ނިންމާއިރު އެންމެ ބޮޑު އަހައްމިއްޔަތުކަން ދޭނެ ކަމަކީ އެތުލީޓުންގެ ހައްގު ހިމާޔަތް ކުރެވޭނެ ކަންތައްތަކަކަށް ކަމަށެވެ.
"ތިޔަ ކުދިންނަކީ އަބަދުވެސް އަޅުގަނޑުމެންގެ މެދުގައި ތިބޭ ކުދިން، އަޅުގަނޑުމެންގެ މޮޑެލް އަކީ އެތުލީޓު ސެންޓާޑް މޮޑެލް އަކަށް ވެގެންދާނެ. ކޯޗު ޑްރިވެން މޮޑެލް އަކަށް ވެގެންދާނެ. މިއީ ދުނިޔޭގައި މިހާތަނަށް ސަކްސެސްފުލްވީ ޓީމުތަކުން ސަކްސެސްފުލްވީ މޮޑެލްތަކުން ދައްކާ އުސޫލު. އެހެންވީމަ މި ގޮތުގެ މަތިން މި ކަހަލަ މޮޑެލް އެއް، އިރާދަކުރެއްވިއްޔާ އެކުލެވިގެންދާނެ،" ރާފިއު ވިދާޅުވި އެވެ.
"އަޅުގަނޑުމެންގެ ހުރިހާ ފޯކަސް އެއް އޮންނާނީ ތިޔަ އެތުލީޓުންނަށް، ކޮންމެ ފިޔަވަޅެއް، ކޮންމެ ރޮނގެއް އަޅުގަނޑުމެން ދަމާލާނީ އެތުލީޓުންގެ ކުރިއެރުމަށާއި އެތުލީޓުންގެ ހައްގުތައް ހިމާޔަތް ކުރުމަށާއި އަދި އެތުލީޓުންނަށް އިތުރު ކުރިއެރުމަށް ވާސިލްވެވޭނެ މަގުފަހިވާ ގޮތަށް، އަދި ދުޅަހެޔޮ ހަށިހެޔޮ ސިއްހަތެއްގައި މި ސޮސައިޓީ ބައްޓަން ކުރުމުގެ ނިޒާމެއްގެ ދަށުން،"
އެތުލީޓްސް ފޯރަމްގައި ލިބިގެންދިޔަ އެންމެ ފަހި ފުރުސަތަކީ، ކުޅިވަރުގެ އެކި އެކި ފަރާތްތަކަށް އޯޕަން ޕްލެޓްފޯމެއްގައި ސުވާލު ކުރުމުގެ ފުރުސަތެވެ. އެ ގޮތުން، މި ލިބުނު ފުރުސަތުގައި ގައުމީ ލެވަލްގެ އެކި ކުޅިވަރުކުޅޭ އެތުލީޓުން ވަނީ މިނިސްޓަރު ރާފިއުއާ ސުވާލުތަކެއް ކޮށްފަ އެވެ.
މައިގަނޑު ގޮތެއްގައި އެތުލީޓުންގެ އެންމެ ބޮޑު ގޮންޖެހުމަކީ، ގައުމީ ލެވަލްގެ ކުޅިވަރު ކުޅުންތެރިންނަށް ކުޅޭނެ ރަނގަޅު ވަސީލަތްތަކެއް ނެތުމުގެ ވާހަކަ އެވެ. އެ އަށް ރާފިއު ދެއްވި ޖަވާބަކީ، "ވިސްނުމަކީ ކޮންމެ ކުޅިވަރެއް ވެސް 24 ގަޑިއިރު ކުޅެވޭނެ" ރަނގަޅު ފެންވަރުގެ ވަސީލަތެއް ހުންނަން ޖެހޭނެ ކަމަށާއި ސަރުކާރުން ސިޔާސަތުތައް ކަނޑައަޅާއިރު، ކަންކަން ނިންމާނީ އެ ގޮތަށް ކަމަށެވެ.
އެތުލީޓުން ރިޓަޔާ ކުރުމަށް ފަހު، ކުޅިވަރުގެ ތެރޭގައި ކުރިއަށް ދިއުމުގައި ހަރުދަނާ އުސޫލުތަކެއް ހެދިފައި އޮތުން މުހިންމު ކަމަށް ވެސް ބައެއް އެތުލީޓުން ފާހަަގަކޮށްފައިވެ އެވެ. އަދި ގައުމީ ޓީމުގެ ކުޅުންތެރިންނަށް މިހާރު އެލަވަންސެއްގެ ގޮތުގައި މަހަކު އެއް ފަހަރު ދޭ ގޮތަށް މި އޮތް 5000 ރުފިޔާ އަކީ އެކަށީގެންވާ މިންވަރުތޯ ނޫނީ މި އަށް އަންނާނެ ބަދަލުތަކަކީ ކޮބައިތޯ، އެތުލީޓުން ވަނީ ސުވާލުކޮށްފަ އެވެ.
ރާފިއު ވިދާޅުވީ، އެތުލީޓުންގެ ކުރިއެރުމާއި މަންފާ އަށް މިހާރު ހުރި ކަންކަމަށް އެކަށީގެންވާ ހެޔޮ ބަދަލުތަކެއް ކައިރި މުސްތަގުބަލެއްގައި ވެސް އަންނާނެ ކަމަށާއި އޭގެ މަސައްކަތްތައް މިހާރު ކުރަމުން އަންނަ ކަމަށެެވެ. އަދި އެންމެ މުހިންމު ކަމަކީ މި ހެދޭ ޕްލޭންގެ ތެރެއިން، މި ވަގުތު އެތުލީޓުންގެ ހުރިހާ ކަންބޮޑުވުމަކަށް ހައްލުތަކެއް ލިބޭނެ ގޮތްވުން ކަމަށާއި ސަރުކާރުގެ ފުރަތަމަ 14 ހަފްތާ ތެރޭގައި މި ޕްލޭންގެ ފުރަތަމަ މަރުހަލާގެ ކަންކަން ނިންމޭތޯ މަސައްކަތް ކުރަމުން އަންނަ ކަމަށް ރާފިއު ވިދާޅުވި އެވެ.
