ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ފުރަތަމަ ބުރު ނިމުމަކާ ގާތްވެފައިވާއިރު، ގަދަ ތިނެއްގެ ވާދަވެރިކަން ބޮޑުވެއްޖެ އެވެ.
ހަތް ޓީމާ އެކު މި މަހުގެ 17 ވަނަ ދުވަހު ފެށި ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ފުރަތަމަ ބުރުގައި ބާކީ އޮތީ އެންމެ ފަސް މެޗެވެ. މިހާތަނަށް ކުޅުނު މެޗުތަކަށް ބަލާއިރު ކުޅުނު ފަސް މެޗުގެ ތެރެއިން ހަތަރު މެޗުން މޮޅުވެ، ދެ ވަނަ ބުރުގެ ފުރުސަތު ބޮޑުކޮށްފައިވާ އެއް ޓީމަކީ ރޯޔަލްސް ބާސްކެޓްބޯޅަ ކުލަބެވެ.
ރޯޔަލްސް އިން ވަނީ ސްޓިންގާސް ބީސީ، ޑަބްލިއު ސްޕޯޓްސް އެކަޑެމީ، ހުޅުމާލެ ސްޕޯޓްސް ކުލަބު އަދި އެލްކިއު ސްޕޯޓްސް ކުލަބު އަތުން މޮޅުވެފަ އެވެ. އެ ޓީމު ބަލިވީ އެންމެ ފަހުން ކުޅުނު މެޗުގައި ޓަލޮންސް ބީސީ އަތުންނެވެ. މި މެޗުން ޓެލޮންސް މޮޅުވީ 78-71 ޕޮއިންޓުންނެވެ.
ރޯޔަލްސް އަތުން މޮޅުވި ނަމަވެސް ޓެލޮންސް ވަނީ މީގެ ކުރިން ޑަބްލިއު ސްޕޯޓްސް އެކަޑެމީ އަތުން ބަލިވެފަ އެވެ. ހަތަރު މެޗު ކުޅެ ޓެލޮންސް ވަނީ ތިން މޮޅު ހޯދާފަ އެވެ. އެޓީމް މޮޅުވީ ރޯޔަލްސް ބީސީ، ސްޕާޓަންސް ބީސީ އަދި ހުޅުމާލެ ސްޕޯޓްސް ކުލަބު އަތުންނެވެ.
ދެ ވަނަ ބުރުގެ ޖާގައެއް ހޯދުމުގެ ފުރުސަތު އޮތް އަނެއް ތިން ޓީމަކީ ޑަބްލިއު ސްޕޯޓްސް އެކަޑެމީ އާއި ސްޕާޓަންސް އަދި ސްޓިންގާސް ބީސީ އެވެ. ޑަބްލިއު އާއި ސްޕާޓަންސް އިން ވަނީ ކުޅުނު ފަސް މެޗުގެ ތެރެއިން ތިން މެޗުން މޮޅުވެފަ އެވެ. ސްޓިންގާސް ވަނީ ކުޅުނު ތިން މެޗުގެ ތެރެއިން ދެ މެޗުން މޮޅުވެފަ އެވެ.
ގަދަ ތިނެއްގައި ހިމެނި ދެ ވަނަ ބުރުގެ ފުރުސަތު ގެއްލިފައިވަނީ ދެ ޓީމަކަށެވެ. އެއީ އެލްކިއު ސްޕޯޓްސް ކުލަބާއި ހުޅުމާލެ ސްޕޯޓްސް ކުލަބެވެ. ހުޅުމާލެ ޓީމު ކުޅުނު ހަތަރު މެޗުންވެސް ބަލިވެފައިވާއިރު، އެލްކިއު ވަނީ ކުޅުނު ހަތަރު މެޗުގެ ތެރެއިން އެއް މެޗުން މޮޅުވެފަ އެވެ.
