ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ކުޅުން އަންނަ ހުކުރު ދުވަހު ފަށަން ތައްޔާރުވެއްޖެ އެވެ.
މި މަހުގެ 17 އިން ޑިސެމްބަރު އެކަކަށް ކުރިއަށްދާ ގައުމީ ބާސްކެޓްބޯޅަ ލީގުގައި މި އަހަރު ހަތް ޓީމަކުން ވާދަކުރާނެ އެވެ. އެއީ އެންމެ ފަހުގެ ޗެމްޕިއަން ސްޕާޓަންސް ސްޕޯޓްސް ކުލަބު، ހުޅުމާލެ ސްޕޯޓްސް ކުލަބު، ޑަބްލިއު ސްޕޯޓްސް އެކަޑެމީ، އެލްކިއު ސްޕޯޓްސް ކުލަބު، ރޯޔަލްސް ބާސްކެޓްބޯޅަ ކުލަބު، ސްޓިންގާސް ބާސްކެޓްބޯޅަ ކުލަބު އަދި ޓަލޮންސް ބާސްކެޓްބޯޅަ ކުލަބެވެ.
މުބާރާތުގެ ފުރަތަމަ ބުރުގައި ލީގު އުސޫލުން ހުރިޙާ ޓީމެއް ކުޅުމަށް ފަހު ދެ ވަނަ ބުރަށް ހޮވޭނީ ގަދަ ތިން ޓީމެވެ. ތިން ޓީމުގެ މެދުގައި ލީގު އުސޫލުން މެޗުތައް ކުޅުމަށްފަހު ޗެމްޕިއަންކަން ލިބޭނީ އެންމެ ގިނަ ޕޮއިންޓް ހޯދާ ޓީމަަކަށެވެ.
ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަނަކީ ޒުވާން އާ ކުޅުންތެރިންނަށް ހަމަހަމަ ޓީމްތަކާ ދެކޮޅަށް ކުޅެ ހުނަރު ދައްކާލަން ލިބޭ އެންމެ ފަހި ފުރުސަތެވެ. އެ ގޮތުން މިދިޔަ ތިން އަހަރަށް ބަލާއިރު ވެސް ދެ ވަނަ ޑިވިޝަންގައި ވާދަކުރި ޓީމްތަކުން ވިދާލި ކުޅުންތެރިން އަންނަނީ ގައުމީ ޓީމްތަކުގައި ވާދަކުރަމުންނެވެ.
މިދިޔަ އަހަރުގެ ގައުމީ ބާސްކެޓްބޯޅަ ލީގުގައި ނުވަ ޓީމަކުން ވާދަކުރި އެވެ. ލީގު އުސޫލުން ދެ ބުރު ކުޅުމަށް ފަހު މިދިޔަ އަހަރުގެ ޗެމްޕިއަންކަން ހޯދީ ސްޕާޓަންސް އެވެ. ދެ ވަނަ ހޯދީ ރޯޔަލްސް ބީސީ އެވެ.
