ލަންޑަން (ނޮވެމްބަރު 13) - އިތުރު ވަގުތުގައި ކޯލް ޕާލްމާ ވައްދާލި ޕެނަލްޓީ އާއިއެކު މެންޗެސްޓާ ސިޓީ އަތުން ޗެލްސީ އިން ޕޮއިންޓެއް ހޯދިއިރު، ސަލާހުގެ 200 ވަނަ ގޯލާއިއެކު ލިވަޕޫލް މޮޅުވެއްޖެ އެވެ.
އިނގިރޭސި ޕްރިމިއާ ލީގުގައި ޗެލްސީ އާއި މެންޗެސްޓާ ސިޓީ ވާދަކުރި މެޗު 4-4 އިން އެއްވަރުވިއިރު، ލިވަޕޫލް މޮޅުވީ އަމިއްލަ ދަނޑުގައި 3-0 އިންނެވެ. މިނަތީޖާތަކާއިއެކު ލީގުގެ އެއްވަނާގައި 28 ޕޮއިންޓާއިއެކު ސިޓީ އޮތްއިރު، ދެވަނައިގައި އޮތީ 27 ޕޮއިންޓް ހޯދައިގެން ލިވަޕޫލް އެވެ. ޗެލްސީ އޮތީ 16 ޕޮއިންޓާއިއެކު ލީގުގެ 10 ވަނައިގަ އެވެ.
ޗެލްސީ އާއި ސިޓީ އެއްވަރުވި މެޗުގައި ފުރަތަމަ ގޯލު ޖެހީ ސިޓީ އިންނެވެ. މިއީ އެޓީމަށް ލިބުނު ޕެނަލްޓީއަކުން އާލިން ހާލަންޑް ޖަހައިދިން ގޯލެކެވެ. ތިއާގޯ ސިލްވާ އާއި ރަހީމް ސްޓާލިންގެ ގޯލުތަކުން ޗެލްސީ ކުރީގައި އޮވެ ފުރަތަމަ ހާފު ނިމެންދަނިކޮށް އިތުރު ވަގުތުގައި ސިޓީ އިން އެއްވަރުކުރި އެވެ. މި ގޯލު ޖަހައިދިނީ މެނުއެލް އަކަންޖީ އެވެ.
ސިޓީ އިން ދެވަނަ ހާފު ފެށީވެސް ގޯލަކުންނެވެ. މިފަހަރުވެސް އެޓީމަށް ލީޑު ނަގައިދިނީ ހާލަންޑް އެވެ. ޗެލްސީ އިން މެޗުގެ ނަތީޖާ އަނެއްކާވެސް ހަމަހަމަކުރީ ނިކޮލަސް ޖެކްސަން ޖެހި ގޯލުންނެވެ. މިއީ ކޯނޯ ގެލެގާ އޭރިއާ ބޭރުން ފޮނުވާލި ހަމަލާ ކީޕަރު އެޑަސަން އަތުގައި ޖެހިފައި ނުކުތް ވަގުތު ޖެކްސަން ޖެހި ގޯލެކެވެ. މެޗުގެ ފުރިހަމަ ވަގުތު ހަމަވާން ހަތަރު މިނެޓު އޮއްވާ އަނެއްކާވެސް ސިޓީ އިން ލީޑު ނެގި އެވެ. މިއީ މިޑްފިލްޑަރު ރޮޑްރީ ފޮނުވާލި ހަމަލާއެއް ޑިފެންޑަރު ތިއާގޯ ސިލްވާ ފައިގައި ޖެހި ބޯޅައިގެން މިސްރާބު ބަދަލުވެގެންގޮސް ވަތް ގޯލެކެވެ.
ޗެލްސީ އަށް މެޗުން ޕޮއިންޓެއް ލިބުނީ އިތުރު ވަގުތުގެ ތެރޭގައި ލިބުނު ޕެނަލްޓީއަކުން ޖެހި ގޯލުންނެވެ. މި ގޯލު ޖަހައިދިނީ ސިޓީ ދޫކޮށް ޗެލްސީއަށް މި ސީޒަންގައި ބަދަލުވި ކޯލް ޕާލްމާ އެވެ.
ލީގުގައި ލިވަޕޫލް ރޭ މޮޅުވީ ބްރެންޓްފޯޑް އަތުން 3-0 އިންނެވެ. މި މެޗުގައި ފޯވާޑް މުހައްމަދު ސަލާހު ދެ ގޯލު ޖެހި އެވެ. މި ދެ ގޯލާއިއެކު އޭނާ އިނގިރޭސި ޕްރިމިއާ ލީގުގައި ޖެހި ގޯލުގެ އަދަދު ވަނީ 200 އަށް އަރާފަ އެވެ. އެޓީމްގެ ފަހު ގޯލު ޖަހައިދިނީ ޑިއޭގޯ ޖޮޓާ އެވެ.
ޕްރިމިއާ ލީގުގައި ރޭ ކުޅުނު އެހެން މެޗުތަކަށް ބަލާއިރު، އެސްޓަން ވިލާއިން ވަނީ 3-1 އިން ފުލްހަމް ބަލިކޮށްފަ އެވެ. ބްރައިޓަން އާއި ޝެފިލްޑް ވާދަކުރި މެޗު 1-1 އިން އެއްވަރުވެގެން ނިމުނުއިރު، ވެސްޓްހަމް ޔުނައިޓެޑުން ވަނީ 3-2 އިން ނޮޓިމްހަން ފޮރެސްޓް ބަލިކޮށްފަ އެވެ.
ރޭގެ މެޗުތަކަށްފަހު އިންޓަނޭޝަނަލް ބްރޭކަށް ލީގު ވަނީ މެދު ކަނޑާލާފަ އެވެ. ދެން ޕްރިމިއާ ލީގުގެ ކުޅުން ފަށާނީ މިމަހުގެ 25 ވަނަ ދުވަހު އެވެ.
