ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަމުގެ ހެކި ބޭންކް ސެޓޭޓްމަންޓްތަކުން ފެންނަން އެބަހުރި ކަމަށް ފުލުހުން ހާމަކޮށްފި އެވެ.
ޕްރޮސިކިއުޓާ ޖެނެރަލްގެ އަމުރަށް ފުލުހުން ތަހުގީގު ފަށައި މިދިޔަ މަހުގެ 22 ވަނަ ދުވަހު އެފްއޭއެމަށްވަނީ ވަދެފަ އެވެ. އަދި އެތަނަށް ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއްވަނީ ގެންގޮސްފަ އެވެ.
ފުލުހުން ކުރަމުން އަންނަ ތަހުގީގާ ގުޅޭގޮތުން އެފްއޭއެމުން ނެރުނު ބަޔާނުގައި ބުނެފައިވަނީ އެ އިދާރާއަށް ލިބިފައިވާ އެފްއޭއެމަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައިނުވާނެ ކަމަށާއި، މިއީ އަމިއްލަ މަސްލަހަތާއި، ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއްކަމަށެވެ.
ފުލުހުން ކުރަމުން އަންނަ ތަހުގީގުގެ ތަފްސީލްތަކެއް ދާދިފަހުން އެ އިދާރާއިން ހާމަކޮށްފައިވާއިރު، އެފްއޭއެމުން ފައިސާއަށް ހިޔާނަތްތެރިވެފައިވާކަމުގެ ހެކި ފެންނަން ހުރިކަމަށްވަނީ ބުނެފަ އެވެ.
މީޑިއާއަކަށްދިން އިންޓަވިއުއެއްގައި އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒް ވިދާޅުވީ ތަހުގީގުގައި މިހާތަނަށް ކުރި މަސައްކަތުން، އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އޭގެ ސާފު ކިތާބީ ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށެވެ.
މި މުއާމަލާތްތައް ތަފްސީލްގޮތެއްގައި ބަލަންޖެހޭތީ ޕްރޮސެކިއުޓާ ޖެނެރަލްގެ ލަފަޔާ އެކު ހާއްސަ އޮޑިޓެއް ހަދަން އެދިފައިވާނެކަމަށެވެ.
މި މައްސަލައިގައި ކުރިން އެފްއޭއެމުން ނެރުނު ބަޔާނުގައި ބުނެފައިވަނީ އެފްއޭއެމަކީ މިނިވަން އޮޑިޓަރުން އޮޑިޓްކުރާ އިދާރާއެއްކަމަށާއި، އޮޑިޓް ރިޕޯޓްތަކަކީ ފީފާ އަދި އޭއެފްސީއާ ހިއްސާކުރާ ރިޕޯޓްތަކެއްކަމަށެވެ. އެހެންކަމުން މާލީ ގޮތުން އެ އިދާރާއިން ކަމެއް ގޯސްކޮށް ކުރާނަމަ އެކަން ރިޕޯޓްތަކުން ފެންނަން އޮންނާނެކަމަށެވެ.
ރާއްޖޭގެ ފުޓްބޯޅަ އިދާރާއަށް ގިނަ ބައެއްގެ ފާޑުކިޔުން އަމާޒުވެފައިވަނީ ގިނަ ކުންފުނިތަކަކަށް ދައްކަންޖެހޭ ފައިސާ އާއި އެ އިދާރާގެ މުވައްޒަފުންނާއި ކުލަބުތަކަށް ދޭންޖެހޭ ފައިސާ ނުދައްކާ މައްސަލަތަކެއް ފެންމަތިވާން ފެށުމުންނެވެ. މިގޮތުން ގިނަ ކުންފުނިތަކަކަށް އެތައް ލައްކަ ރުފިޔާއެއް ދެއްކުމަށް ކޯޓުން ވަނީ ހުކުމްކޮށްފަ އެވެ. އަދި ގައުމީ ޓީމްތަކުގެ ކޯޗުންނަށް ދޭން ޖެހޭ މުސާރަ ނުދޭ މައްސަލަތައްވެސް އަންނަނީ ގިނަ ވަމުންނެވެ.
