ބައިނަލްއަގްވާމީ އިދާރާތަކުން ދޭ ފައިސާ އެފްއޭއެމަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައިނުވާނެ ކަމަށާއި، މިއީ އަމިއްލަ މަސްލަހަތާއި، ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއްކަމަށް އެފްއޭއެމުން ހާމަކޮށްފި އެވެ.
ޕްރޮސިކިއުޓަރު ޖެނެރަލްގެ އަމުރަކަށް މިދިޔަ އާދިއްތަ ދުވަހު، ރާއްޖޭގެ ފުޓްބޯޅައިގެ މައި އިދާރާއަށް، ފުލުހުންގެ ޓީމެއް ވަނީ ވަދެފަ އެވެ. ފުލުހުން މިކަންކުރީ ޕީޖީ އޮފީހުން އަންގައިގެން ފުލުހުން ހިންގަމުންދާ އެފްއޭއެމްގެ މާލީ މުއާމަލާތްތަކާ ގުޅޭ ޖިނާއީ ތަހުގީގަކަށް ބޭނުންވާ ހެކި ހޯދުމަށް ކޯޓު އަމުރެއްގެ ދަށުންނެވެ.
ފުލުހުންގެ މި ރެއިޑުގައި އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއްވަނީ ގެންގޮސްފަ އެވެ.
މި މައްސަލައާ ގުޅޭގޮތުން އެފްއޭއެމުން މިއަދު ނެރެފައިވާ ބަޔާނުގައި ބުނެފައިވަނީ މިއީ އެ އިދާރާއަށް މާލީ ގޮތުން އިންތިހާއަށް އުނދަގޫ ހާލަތަކަށްވީކަމުގައިވިޔަސް، އެ އިދާރާގެ މުދަލާއި ފައިސާއަށް އެ އިދާރާގެ ވެރިން ހިޔާނާތްތެރިވެފައިނުވާނެކަމަށެވެ. އަދި މިފަދަ އަމަލެއް ހިންގާފައިވާކަމަށް ކުރެވޭ ތުހުމަތުތަކަށް އެ އިދާރާއިން ކެރިގެން ކުރިމަތިލާނެކަމަށެވެ. މީގެ އިތުރުން ގާނޫނީ ތަރަހައިގެ ބޭރުން އެއްވެސްކަމެއް އެފްއޭއެމުން ކޮށްފައި ނުވާނެކަން ސާބިތުކޮށްދޭން ފަސް ނުޖެހޭނެކަމަށެވެ.
އެ އެސޯސިއޭޝަނަށް ފީފާ އާއި އޭއެފްސީ ފޮނުވާ ފައިސާތަކަކީ ކޮންމެ އަހަރަކު އޮޑިޓް ކުރެވޭ އެހީތަކެއްކަން ބަޔާނުގައި ފާހަގަ ކޮށްފައި ވެއެވެ. އަދި މި އޮޑިޓްތަކަކީ އޭއެފްސީ އާއި ފީފާއަށްވެސް ފޮނުވާ ރިޕޯޓްތަކެއްކަމަށާއި، އެ އިދާރާއިން އާންމުކުރާ އެއްޗެއްގެ ގޮތުގައިވެސް ފާހަގަކޮށްފައިވެ އެވެ.
އެފްއޭއެމުން ވަނީ ސާބިތު ނުހިފޭ، އަމިއްލަ މަސްލަހަތާއި ޒާތީ ބޭނުމަށް މި ހާލަތުގެ ފައިދާ ނެގުމުގެ ބޭނުމުގައި އެއްވެސް ފަރާތަކުން ކުރިމަތިކުރުވާ އަމަލުތަކަށް ރައްދުނުދީ އެ އިދާރާއިން ނުތިބޭނެކަމަށެވެ.
މިވަގުތު އެ އިދާރާގެ މައްޗަށް ކުރިމަތިކުރުވާ ތުހުމަތުތަކާ ގުޅިގެން ކުރިއަށްގެންދާ ތަހުގީގަށް އެ އިދާރާއިން ދެވެން އޮތް އެންމެ ބޮޑަށް އެހީތެރިކަން ފޯރުކޮށްދޭނެކަމަށްވެސް މިއަދު އެފްއޭއެމުން ނެރުނު ބަޔާނުގައިވެ އެވެ.
ޖިނާއީ ތުހުމަތުތަކުގައި ތަހްގީގީ އިދާރާތަކަށާއި ތަންފީޒީ ބާރުތަކަށް އެފްއޭއެމްގެ އޮފީސް ބަލައި ފާސްކުރުމުގެ އިހުތިސާސް އޮންނާނެކަމަށް ފީފާ އާއި އޭއެފްސީން ގަބޫލު ކުރާ ކަމަށާއި ނަމަވެސް އެކަން ކުރަން ވާނީ ގާނޫނީ މަގުސަދަކަށްޓަކައި ގާނޫނީ އިމުގެ ތެރެއިން ކަމަށް ފީފާ އާއި އޭއެފްސީން ގުޅިގެން އެފްއޭއެމަށް ފޮނުވާފައިވާ ޖޮއިންޓް ސިޓީގައި ބުނެފައިވާ ކަމަށް އެފްއޭއެމްގެ ބަޔާނުގައި ވެއެވެ.
އެފްއޭއެމަށް ބޮޑެތި ތުހުމަތުތަކެއް ކުރެވިފައިވާ މި ދަނޑިވަޅުގައި ދާދިފަހުން އެފްއޭއެމްގެ ރައީސް ބައްސާމް އަދީލް ޖަލީލްވަނީ ފީފާގެ ރައީސްއާ ބައްދަލުކުރައްވާފަ އެވެ. ނަމަވެސް މި ބައްދަލުކުރެއްވުމަކީ ފްރާންސްގައި ކުރިއަށްދިޔަ ފީފާގެ މެންބަރު ގައުމުތަކުގެ ބައްދަލުވުމުގެ ހަވާސާގައި ކުރިއަށްގެންދިޔަ ބައްދަލުވުމެކެވެ.
