ޗައިނާގެ ފުޖިއާން ޕްރޮވިންސްގެ ނަން'އަން ސިޓީގައި ކޮންމެ އަހަރަކު އޮންނަ "ޒެން ޗެން ގޮން ކަޕް ބާސްކެޓްބޯލް ޗެމްޕިއަންޝިޕް" އިން ރާއްޖޭގެ ކިންގްސް ބާސްކެޓްބޯޅަ ކުލަބަށް ފުރުސަތު ލިބިއްޖެ އެވެ.
މި މަހުގެ 19 އިން 25 އަށް އޮންނަ މުބާރާތުގައި އަށް ގައުމަކުން އަށް ކުލަބަކުން ވާދަކުރާނެ އެވެ. އެ ގޮތުން, ވާދަކުރާނީ ރާއްޖޭގެ އިތުރުން އިންޑޮނޭޝިއާ، މެލޭޝިއާ، ޓައިވާން، ސިންގަޕޫރު، ފިލިޕީންސް، ހޮންކޮންގް އަދި ޗައިނާގެ ކުލަބުތަކެވެ.
ދިހަ ވަނަ "ޒެން ޗެން ގޮން ކަޕް ބާސްކެޓްބޯލް ޗެމްޕިއަންޝިޕް" އާ ގުޅޭގޮތުން ވާހަކަދައްކަމުން ކިންގްސް ބީސީގެ ކެޕްޓަން ރިޝްފާން ރަޝީދު (ކޮކީ) ބުނީ، މިއީ ކިންގްސް އަށް ލިބުނު ރަނގަޅު ފުރުސަތެއް ކަމަށާއި، ލޯކަލް މުބާރާތެއް ނެތް ދުވަސްވަރެއްގައި ޓީމަށް އަންނަމުން އަންނަ ކުރިއެރުން ވަޒަންކޮށްލަން ލިބޭނެ ރަނގަޅު މުބާރާތެއް ކަމަށެވެ.
މި މުބާރާތުގައި ވާދަކުރާ ގައުމުތަކަކީ ވަރުގަދަ ގައުމުތަކެއްކަން ވެސް ކޮކީ ފާހަގަކުރި އެވެ. އޭނާ ވަނީ ކިންގްސް ބީސީގެ މެނޭޖްމަންޓުން ކުޅުންތެރިންގެ ކުރިއެރުމަށް ފަހިކޮށްދޭ މި ކަހަލަ ފުރުސަތުތަކަށް ޝުކުރު އަދާކޮށްފަ އެވެ.
"އަސްލު ފިލިޕީންސްގެ ބާސްކެޓްބޯޅަ ފެޑެރޭޝަނުގެ އެހީތެރިކަމާ އެކު މި ފުރުސަތު ލިބިފައި މިއިނީ ކިންގްސް އަށް. ވަރަށް ރަނގަޅު ފުރުސަތެއްގެ ގޮތުގައި ދެކެނީ މި ޓީމުގެ ކުރިއެރުމަށް. އުއްމީދަކީ ރަނގަޅު ނަތީޖާއެއް ހޯދުން" ކޮކީ ބުންޏެވެ.
މި މުބާރާތުގައި ވާދަކުރާ ކިންގްސް ޓީމަށް އިރުޝާދުދޭނީ އެކުލަބުގެ ހެޑް ކޯޗު މުހައްމަދު ޒިލާލް (ޒިލާ) އެވެ. ޓީމްގެ ޓްރެއިނަރަކީ އަލީ އިޝާމް (ބަނީ) އެވެ.
މުބާރާތުގައި ވާދަކުރާ ޓީމުގައި ކިންގްސް ބީސީ ޓީމްގައި ހިމެނޭ ކުޅުންތެރިންނަކީ ރިޝްފާން ރަޝީދު (ކޮކީ)، އިބްރާހިމް ރަޝްވާން (ޗިކު)، އަބްދުﷲ އަމްޒަރު، މުހައްމަދު އައިކް ނީޝާމް، އިބްރާހިމް ނަސީމް، އަހުމަދު ހުޝާމް (ތުއްބެ)، އަބްދުﷲ އަފްލާހު ޝަރީފް، އަހުމަދު އިފްސާހު (އިއްޗު)، މުހައްމަދު ޖިދާދު (ދާދު)، މުހައްމަދު ސަބީހު ތައުފީގު (ސަބީ)، އަލްދަން އައިކް ރަމީޒް އަދި އަހުމަދު އަލީ މުސްތަފާ (ބޮމްބެ) އެވެ.
ފިލިޕީންސްގެ ބާސްކެޓްބޯޅަ އެސޯސިއޭޝަނާއި، ނަން'އާން ބާސްކެޓްބޯޅަ އެސޯސިއޭޝަން ގުޅިގެން ބާއްވާ މުބާރާތުގައި ވާދަކުރާ އަށް ޓީމް ބަހާލާނީ ދެ ގްރޫޕަކަށެވެ. ގްރޫޕްތައް ވަކިން ރައުންޑް ރޮބިންގެ އެއް ބުރު ކުޅުމަށް ފަހު، ކޮންމެ ގްރޫޕަކުން ދެ ޓީމް ސެމީ ފައިނަލަށް ދަތުރުކުރާނެ އެވެ. އަނެއް ހަތަރު ޓީމު ވާދަކުރާނީ 5-8 އަށް ވަނަ ހޮވާ މެޗުތަކުގަ އެވެ.
