ބާސެލޯނާ (ސެޕްޓެމްބަރު 2) - ޔޫރަޕްގެ ގިނަ ގައުމުތަކަށް ޓްރާންސްފާގެ ފަހު ދުވަހު ސްޕެއިންގެ ބާސެލޯނާ އިން ޕޯޗުގަލްގެ ގައުމީ ޓީމްގެ ދެ ތަރިން ކަމަށްވާ ޔޮއާއޯ ކަންސެލޯ އާއި ޔޮއާއޯ ފެލިކްސް ސޮއިކޮށްފި އެވެ.
މެންޗެސްޓާ ސިޓީގެ ޑިފެންޑަރު ކާންސެލޯ އާއި އެތުލެޓިކޯ މެޑްރިޑްގެ ފޯވާޑް ފެލިކްސް ބާސެލޯނާ އަށް ސޮއިކުރީ ލޯން އެއްބަސްވުމެއްގެ ދަށުން މި ސީޒަންގެ ނިޔަލަށެވެ. މި ސީޒަނަށް ފަހު ދެ ކުޅުންތެރިންގެ ކޮންޓްރެކްޓް ދާއިމީ ކުރުމުގެ މާއްދާއެއް މި ކޮންޓްރެކްޓްގައި ހިމަނާފައެއް ނުވެ އެވެ.
ސްޕެއިންގެ ޗެމްޕިއަން ބާސެލޯނާ އިން ކަންސެލޯގެ ސޮއިހޯދީ އެ ޓީމްގެ ހަތަރު ޑިފެންޑަރަކު ދޫކޮށްލުމަށްފަހުގަ އެވެ. އެއީ އިންޓަ މަޔާމީ އަށް ބަދަލުވި ޖޯޑި އަލްބާ، ޕީއެސްވީއަށް ބަދަލުވީ ސާޖިނިއޯ ޑެސްޓް، ފްރާންސްގެ ލިލް އަށް ބަދަލުވި ސެމިއުލް އުމްޓީޓީ އަދި އެސްޓަން ވިލާ އަށް ބަދަލުވި ކްލެމެންޓް ލޯންގްލޭ އެވެ.
ފެލިކްސްގެ ސޮއި އެޓީމުން ހޯދީ ޓްރާންސްފާގެ ފަހު ދުވަސްތަކުގައި ޕްރިމިއާ ލީގުގެ ބްރައިޓަން ހޯވް އެލްބިއަންއަށް ބަދަލުވި އަންސޫ ފަޓީގެ ބަދަލުގަ އެވެ. އަންސޫ ފަޓީގެ އިތުރުން އެ ޓީމްގެ ވިންގާ އޮސްމާނޭ ޑެމްބެލޭވެސް ވަނީ ބާސެލޯނާ ދޫކޮށްލާފަ އެވެ. ޑެމްބެލޭ ބަދަލުވީ ފްރާންސްގެ ޗެމްޕިއަން ޕީއެސްޖީއަށެވެ.
ބާސެލޯނާ އިން އާ ސީޒަނަށް ދެން ގެނައި އެންމެ ފާހަގަކޮށްލެވޭ ކުޅުންތެރިއަކީ މެންޗެސްޓާ ސިޓީ އިން ހިލޭ ޓްރާންސްފާއެއްގައި އެ ޓީމަށް އައި އިލްކާއީ ގުންޑޮގާން އެވެ. ކުރީގެ މިޑްފިލްޑަރު ސާޖިއޯ ބުސްކެޓްސްގެ ބަދަލުގައި އެޓީމަށް ގެނައި ގުންޑޮގާން އަންނަނީ ޓީމްގެ ފުރަތަމަ އެގާރައިގައި ހިމެނި ރަނގަޅު ކުޅުމެއް ދައްކަމުންނެވެ.
ސްޕެނިސް ލަލީގާގައި މިހާތަނަށް ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާ ބާސެލޯނާ އަށް ކުރިއަށް އޮތީ އާދިއްތަ ދުވަހުގެރޭ އޮސަސޫނާއާ ދެކޮޅަށް ކުޅޭ މެޗެވެ. މި މެޗުގައި އާ ދެ ކުޅުންތެރިންކަމަށްވާ ކަންސެލޯ އަދި ފެލިކްސް ފެނިދާނެކަމަށް ބެލެވެ އެވެ.
