ކްލަބް އީގަލްސް އިން އެ ޓީމުގެ ކެޕްޓަން، އަހުމަދު ރިޒުވާން (ރިޒޭ)ގެ ހަތަރު ގޯލާ އެކު، 8-0 އިން ކްލަބް ގްރީން ސްޓްރީޓްސް ބަލިކޮށް، އެމްޑަބްލިއުއެސްސީ ދިވެހި ޕްރިމިއާ ލީގުގެ ކުރިއަށް ޖެހިލައިފި އެވެ.
ލީގުގެ އެއް ވަނައިގައި އީގަލްސް އޮތީ ދެ ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށް ވުރެ އިތުރަށް އެއް މެޗު ކުޅެގެންނެވެ. އީގަލްސް އަށް ނުވަ މެޗުން 23 ޕޮއިންޓް ލިބިފައިވާއިރު، މާޒިޔާގެ އަށް މެޗުން އޮތީ 22 ޕޮއިންޓެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި އީގަލްސް އިން ފުރަތަމަ ހާފު ނިންމާލީ ފަސް ގޯލުގެ ލީޑަކާ އެކު އެވެ. އަނެއް ތިން ގޯލު ޖެހީ ދެ ވަނަ ހާފުގަ އެވެ. މެޗުގެ މޮޅު ކުޅުންތެރިއަކަށް ހޮވުނު ރިޒޭގެ އިތުރުން އީގަލްސްގެ އަނެއް ގޯލުތައް ޖެހީ އިބްރާހިމް މަހުދީ ހުސެއިން (ފޭދޫ އިއްބެ) ހެޓްރިކެއް އަދި ޒައިން ޒަފަރު ގޯލެކެވެ.
ގްރީން ސްޓްރީޓްސް އަށް އެޓޭކިން އަށް ބަލާއިރު، މި މެޗުގައި މާ އެދެވޭ ކަމެއް ކުރެވިފައިނުވެ އެވެ.
ލީގުގައި މިރޭ ކުޅޭ މެޗުގައި ސުޕަ ޔުނައިޓެޑް ސްޕޯޓްސް (ސަސް) ކުޅޭނީ ޔުނައިޓެޑް ވިކްޓަރީ (ޔޫވީ)އާ އެވެ. މާދަމާރޭގެ މެޗުގައި ބުރު ސްޕޯޓްސް ކްލަބާއި ޓީސީ ސްޕޯޓްސް ކްލަބް ކުޅޭނެ އެވެ.
