އެފްއޭއެމްގެ ކޮންގްރެސް/އިންތިހާބުގައި ބައިވެރިވުމަށް އޮތް ފުރުސަތު ވީހާވެސް ފުޅާކޮށް ބާއްވަން ބޭނުންވާ ކަމަށާއި އެ ގޮތަށް މި ވަގުތު އެކަން ނެތީ ކުޅިވަރު ގާނޫނާ ހެދި އޮތް ހުރަސްތަކެއްގެ ސަބަބުން ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
އެފްއޭއެމް އިން ހަމަޖެއްސި އާ ޓެކްނިކަލް ޑިރެކްޓަރު، އިނގިރޭސި ތަޖުރިބާކާރު، ޕޯލް ސްމޯލީ ތައާރަފްކުރަން ބޭއްވި ނޫސްވެރިންގެ ބައްދަލުވުމުގައި ބައްސާމް ވިދާޅުވީ 2016 ވަނަ އަހަރު އޭއެފްސީ އާއި ފީފާއާ ގުޅިގެން ހެދި އެފްއޭއެމްގެ ސްޓެޓިއުޓްސް (އާސާސީ ގަވާއިދު)ގައި އެފްއޭއެމްގެ އިންތިހާބުގައި 43 ފަރާތަކަށް ވޯޓުލުމުގެ ފުރުސަތު ދިނުމަށާއި އެފްއޭއެމްގެ ދަށުން، 9 ވަރަކަށް ސަބް-އެސޯސިއޭޝަންތައް ހަދަން ހިމެނި ކަމަށެވެ.
އެކަމަކު، ސަބް-އެސޯސިއޭޝަންތައް ހަދަން ރާއްޖޭގެ ކުޅިވަރު ގާނޫނަށް ބަދަލު އަންނަން ޖެހޭ ކަމަށް ބައްސާމް ފާހަގަކުރެއްވި އެވެ.
"ކުޅިވަރު ގާނޫނޫ ބަދަލުވާންޖެހޭ، މިހާރު އޮތް ގޮތުން އެފްއޭއެމް އަކީ އެސޯސިއޭޝަނެއް، އެސޯސިއޭޝަނެއްގެ ދަށުން އެސޯސިއޭޝަނެއް ރަޖިސްޓްރީ ނުކުރެވޭ އަޅުގަނޑުމެން އެ މަސައްކަތް ފެށިން، ރެފްރީސް އެސޯސިއޭޝަނެއް ހެދުނު، ފުޓްސަލް އެސޯސިއޭޝަނެއް ހެދުނު، އެ އެސޯސިއޭޝަންތައް އެފްއޭގެ ދަށަށް ގެންނަން ވެއްޖިއްޔާ މައްސަލަ އެބަ ދިމާވޭ،" ބައްސާމް ވިދާޅުވި އެވެ.
ބައްސާމް ވިދާޅުވީ މި ކަމުގައި ހައްލެއް ހޯދަން ކޮމިޝަނާ އޮފް ސްޕޯޓްސް އަށާއި މިނިސްޓްރީ އަށް ވެސް ސިޓީ ފޮނުވިފައިވާނެ ކަމަށެވެ. އަދި އެންމެ ބޭނުންވަނީ އަންނަ އަހަރުގެ އެފްއޭއެމްގެ ކޮންގްރެސް އަށް މި ކަމަަށް ހައްލެއް އައިސްފައި އޮތުން ކަމަށާއި އެ އަށް މަސައްކަތް ކުރާ ކަމަށް ބައްސާމް ވިދާޅުވި އެވެ.
"އެ އަށް ފަހު، މި 43 ފަރާތަކަށް މި ބަސް ބުނުމުގެ ބާރު ލިބިގެންދިއުން، އަޅުގަނޑުމެން ބޭނުން މި ފުޅާކުރަން، ވީހާ ވެސް ގިނަ ބަޔަކަށް މި ފުރުސަތު ދޭން، އެކަމަކު، ބަދަލު ގެންނަން ޖެހޭ އަޅުގަނޑުމެންގެ ބާރު ނުހިނގާ ގާނޫނުތަކެއް އެބަހުރި. އެ ބަދަލު ގެނެސްގެން ނޫނީ އަޅުގަނޑުމެން ބޭނުންވާ ބަދަލެއް ވެސް ނުގެނެވޭ،" ބައްސާމް ވިދާޅުވި އެވެ.
ފީފާ އާއި އޭއެފްސީއާ ވާހަކަ ދެއްކުމަށް ފަހު، ސަބް އެސޯސިއޭޝަންތައް މި ވަގުތަށް އެފްއޭއެމް އަސާސީ ގަވާއިދުން އުނިކުރެވިފައިވަނީ ކުޅިވަރު ގާނޫނަށް ބަދަލު ގެނެވެންދެން ކަމަށް ބައްސާމް ވިދާޅުވި އެވެ.
އެފްއޭއެމްގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) ވިދާޅުވީ ވަކި ބަޔަކަށް އޮތް ފުރުސަތެއް ހަނިކުރި ކަމަށް ވާހަކަ ދެކެވުމަކީ އޭގެ ސަބަބުން ނުރަނގަޅު މައުލޫމާތެއް ދައުރުވާ ކަމެއް ކަމަށާއި މީގެ އަސްލު އޮތް ކަމަކީ ގާނޫނީ ގޮތުން އޮތް ހުރަަހަކާ ހެދި އަންނަން ޖެހޭ ބަދަލެއް ނައިސް އޮތުން ކަަމަށެެވެ.
