މިހާރުގެ ހާލަތަށް ބަލާއިރު ލީގުގެ މެޗުތަކަށް ތައްޔާރުވާން މާ ބޮޑު ކަމެއް ކުރެވޭކަށް ނެތްކަމަށް ކުލަބު ގްރީން ސްޓްރީޓްސްގެ ކޯޗު އަލީ ނިސްތާރު ބުނެފި އެވެ.
އެމްޑަބްލިއުއެސްސީ ދިވެހި ޕްރިމިއާ ލީގުގައި ގްރީން ސްޓްރީޓްސް އާއި ޓީސީ ސްޕޯޓްސް ކުލަބް މިރޭ ވާދަކުރާނެ އެވެ. މި މެޗަށް ނުކުންނައިރު ގްރީން ސްޓްރީޓްސް ކޯޗު ނިސްތާރަށް އޮތް ކަންބޮޑުވުމަކީ ޓީމުގެ މުހިންމު ކުޅުންތެރިންތަކަށް ނުކުޅެވުމެވެ.
ނިސްތާރު ބުނީ ޓީމްގެ ފުރަތަމަ އެގާރައިގެ މުހިންމު ދެ ކުޅުންތެރިއަކަށް މި މެޗުގައި ނުކުޅެވޭނެ ކަމަށެވެ. މީގެ އިތުރުން ވެސް މި ވަގުތު ފުޓްސަލްގެ އެކި މުބާރާތްތައް ކުރިއަށްދާތީ ލީގުގެ މެޗުތަކަށް ތައްޔާރުވާން މާ ބޮޑު މަސައްކަތްތަކެއް ނުކުރެވޭ ކަމަށް ނިސްތާރު ވަނީ ބުނެފަ އެވެ.
ކުރިން ފުރަތަމަ ޑިވިޝަނުގައި އއ. މާޅޮހާއި ށ. ފޯކައިދޫ ޓީމަށް ކޯޗުކޮށްދިން ނިސްތާރު ބުނީ ގިނަ މެޗުތަކަށް ކުޅުންތެރިން އަންނަނީ އެއްވެސް ޕްރެކްޓިހެއް ވެސް ނެތި ކަމަށެވެ.
"މިހާރު އަޅުގަނޑުމެންގެ ސްޓްރައިކާއެއް މި މެޗަކު ނީންނާނެ. އެއީ އެމްއެންޑީއެފް ކަމެއްގައި އެ ޕްލޭޔަރު ދާން ޖެހިއްޖެ. ދެން ޑިފެންސަށް ބަލާއިރު ހަސީބު ހުރީ އޮފީސް ޓްރެއިނިންގައި ރާއްޖެއިން ބޭރުގައި. އެހެންވީމަ އަޅުގަނޑުމެންނަށް ބަލާއިރު އެއީ ވަރަށް މުހިންމު ދެ ކުޅުންތެރިން." ނިސްތާރު ބުންޏެވެ.
"މިހާރުގެ ހާލަތަށް ބަލާއިރު އެއް މެޗުން އަނެއް މެޗަށް މާ ބޮޑު ކަމެއް ކުރެވޭކަށް ނެތް ތައްޔާރުވާން ބަލާއިރު. އެއީ ކުލަބު މޯލްޑިވްސް އާ ރަށް ރަށުގައި ހުރި މުބާރާތްތަކާ އެއްޗެހި އޮންނައިރު ޓީމް އެއްކޮށް ޕްރެކްޓިސް ކޮށްލަން އުނދަގޫތަކެއް ހުރޭ. ހަމަ މެޗަށް ގިނަ ޕްލޭޔާސް އަންނާނީ."
ނިސްތާރު ބުނީ މުހިންމު ކުޅުންތެރިން ނެތް ނަމަވެސް އެ ކުޅުންތެރިންގެ ބަދަލުގައި އަރުވާ ކުޅުންތެރިންގެ ފަރާތުން ރަނގަޅު ކުޅުމެއް ފެންނާނެކަމުގެ ޔަގީންކަން އެބައޮތް ކަމަށެވެ. އޭނާ ބުނީ ހުރިހާ ކުޅުންތެރިންނާ އެކު ޕްރެކްޓިސްކުރަން ފުރުސަތު ނުލިބުމުން ޓީމް ޓެކްޓިކަލީ ރާވަން ގިނަ ޗެލެންޖަސްތަކެއް ދިމާވާ ކަމަށެވެ.
ޓީސީއާ ދެކޮޅަށް ކުޅޭ މެޗާ ގުޅޭގޮތުން ކޯޗު ނިސްތާރު ބުނީ ދެ ޓީމަކީ ވެސް އެއްވަރެއްގެ ދެ ޓީމު ކަމަށާއި ގްރީންގެ ޓާގެޓަށް ދާން ބަލާއިރު މިކަހަލަ މެޗުތަކުން މޮޅުވުން މުހިންމު ކަމަށެވެ.
"ޓީސީއާ ގްރީން އާ ދެން ވަރަށް ލެވެލް ދެ ޓީމް ކަންނޭގެ. އަދި ބުރު އަތުން ބަލިވިޔަސް އަޅުގަނޑުމެންގެ ޓާގެޓެއް ބަދަލެއް ނުވޭ. ދެން ފުޓްބޯޅައިގެ ބިއުޓީއަކީ ވަރަށް ދަށް ޓީމެއްވެސް ބޮޑުކޮށް މި ކިޔާ ޓީމެއް ބަލިވެސް ކޮށްފާނެ. އެހެންވީމަ ގަބޫލުކުރެވޭ އީގަލްސް އަށްވެސް ޗެލެންޖަސް އަންނާނެ." ނިސްތާރު ބުންޏެވެ.
ގްރީން ސްޓްރީޓްސް އާއި ޓީސީ ކުޅޭ މެޗު ފަށާނީ މިރޭ 9 ޖަހާއިރު އެވެ.
