މިދިޔަ ދޮޅުމަހެއްހާ ދުވަހު ކުރިއަށްދިޔަ ފުޓްސަލް މުބާރާތްތަކުގައި ކްލަބް ގްރީން ސްޓްރީޓްސްގެ ގިނަ ކުޅުންތެރިންތަކެއް ކުޅެން ޖެހުމުން އެންމެ އެކަށީގެންވާ ގޮތަށް ލިބުނު ބްރޭކުގައި ޓީމް ތައްޔާރު ނުކުރެވުނު ކަމަށް ކުލަބު ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު ބުނެފި އެވެ.
މިދިޔަ މެއި މަހު 21 އިން މި މަހު ހަތަރަކަށް އިންޑިއާގެ ބެންގަލޫރުގައި ކުރިއަށްދިޔަ ސާފް ބަންގުބަންދު ޗެމްޕިއަންޝިޕަށް މެދުކެނޑާލި އެމްޑަބްލިއުއެސްސީ ދިވެހި ޕްރިމިއާ ލީގުގެ ކުޅުން މިއަދު ފަށާނީ ކުލަބު ގްރީން ސްޓްރީޓްސް އާއި ބުރު ސްޕޯޓްސް ކުލަބުވާދަކުރާ މެޗުންނެވެ.
ޓީމްގެ ތައްޔާރީތަކާ ގުޅޭގޮތުން ގްރީންގެ ކޯޗު ނިސްތާރު ބުނީ މި ވަގުތު ފުޓްބޯޅައިގެ ހާލަތު އޮތް ގޮތަށް ބަލާއިރު އާމްދަނީ ހޯދަން ކުޅުންތެރިން ފުޓްސަލް ކުޅެން ދާ ކަމަށެވެ. އޭނާ ބުނީ ހުރިހާ ކުޅުންތެރިންނާ އެކު ނޫނަސް ރަނގަޅު ޕްރެކްޓިސްތަކެއް ކުރެވުނު ކަމަށެވެ.
"ބްރޭކަކަށް ފަހު ފަށަން އެހާ ފަސޭހަކަމެއް ނޫން އެއީ. މިހާރުގެ ފުޓްބޯޅައިގެ ހާލަތުން ގިނަ ކުދިން ޕްރިފާ ކުރަނީ ފުޓްސަލް ކަންނޭނގެ. ފަސޭހައިން ލާރިއާ އެއްޗެހި ލިބޭނެ. އެހެންވީމަ ކުޑަކޮށް ޝޯޓްކޮށް މިއުޅެނީ. އެކަމަކުވެސް ރަނގަޅުވާނެ. ޕްލޭޔާސްގެ ޕޭމަންޓްސްއާ އެކަހަލަ އެއްޗެހި ހުރިހާ ޓީމެއްގައިވެސް އެބައުޅޭ ކަންނޭނގެ." އޭނާ ބުންޏެވެ.
ނިސްތާރު ބުނީ ކުދި ފުޓްސަލް މުބާރާތްތަކުގައި ގިނަ މެޗުތަކެއް ގާތް ގާތުގައި ކުޅެން ޖެހޭ ކަމަށާއި، އޭގެ ސަބަބުން ކުޅުންތެރިންނަށް އަނިޔާވުމުގެ ފުރުސަތު ބޮޑުކަަމަށެވެ.
އެ ގޮތުން މިދިޔަ މަހު އޭދަފުށީގައި ކުރިއަށްދިޔަ މުބާރާތެއް ކުޅެން އުޅުމުގެ ތެރޭގައި އެ ޓީމުގެ މުހިންމު ފޯވާޑް މުހައްމަދު ޖައިލަމް (އޮގޯ) އަށް އަނިޔާވެ, ގިނަ ދުވަސްތަކަކަށް އަނެއްކާވެސް ކުޅުމާ ދުރަށް ދާން ޖެހިފައިވާކަމަށް އޭނާ ބުންޏެވެ.
އޮގީގެ އޭސީއެލްއަށް މިދިޔަ އަހަރު ލިބުނު އަނިޔާއަށް ފަރުވާ ހޯދުމަށް ފަހު އޭނާ ކުޅެން ނިކުތީވެސް މި އަހަރުގެ ސީޒަން ފެށެން ކުޑަތަންވެފައި ވަނިކޮށެވެ.
"މިހާރު އަޅުގަނޑު ނުދެކެން މާ ބޮޑު އިޝޫއެއްކަމަކަށް ފުޓްސަލް ކުޅުމަކީ. އެކަމަކު ވާގޮތަކީ ޕްރީ ސީޒަންއެއް ނަހަދައި ކައިރި ކައިރީގައި މެޗު ކުޅުމަކީ ވަރަށް ޑޭންޖަރަސް ކަމެއް. މިސާލަކަށް ރާއްޖޭގައި ހަމަ މޮޅު ޕްލޭޔަރެއް އޮގީ (ޖައިލަމް) އަކީ. އޮގީ އަނެއްކާ އެދިޔައީ އޭސީއެލް އިންޖަރީއަކަށް." އޭނާ ބުންޏެވެ.
"އޮގީ ފުރަތަމަ ލީގު ފެށީވެސް ވީކެއްވަރު ޓްރެއިންކޮށްފައި. ދެން ބްރޭކް ފެށިއިރު އޭދަފުށީގައި ކުޅެން އުޅެނިކޮށް އެއިނީ އިންޖަރީވެފައ. އެހެންވީމަ އެކަހަލަ ރިސްކްސް އަންނާނެ ޕްރީ ސީޒަނެއް ނެތިފަ ކައިރި ކައިރީގައި މެޗުތަކެއް ކުޅުނީމަ."
އޭނާ ބުނީ ފުޓްބޯޅައިގައި ކުޅުންތެރިންނަށް ރެސްޓް ދޭ ގޮތަށް ކުދި މުބާރާތްތަކުގައި ރެސްޓް ނުދެވޭނެ ކަމަށާއި، ކައިރިކައިރީގައި މެޗުތައް ކުޅޭއިރު ހުރިހާ މެޗަކަށް ވެސް މޮޅު ކުޅުންތެރިޔާ އަރުވާނެ ކަމަށެވެ.
"މިހާރު އަޅުގަނޑުމެން ބަލާވަރަށް އަދި ނުބަލަފާނެ އެގޮތަށް ދާ ޓީމަކުން. މިސާލަކަށް ލީގުގައި ކުޅޭއިރު ބައެއް ފަހަރު އަހަރުމެން ބައެއް ކުޅުންތެރިން އެބަ ރެސްޓްކުރުވަން. ތަންކޮޅެއް ޓަޔަޑް ހެން ހީވަންޏާ. އެކަަމަކު ކުދި މުބާރާތްތަކުގައި އެހެން ނުވެދާނެ. އަޅުގަނޑު އެތާ ހުރި ނަމަވެސް ހަމަ އެގޮތަކަށް ކަންނޭގެ ވާނީ. ކައިރި ކައިރީގައި އެގޮތަށް މުބާރާތެއް ކުޅޭއިރު ހުރިހާ މެޗެކަށް ހަމަ އަރުވައިގެން ކުޅޭނީ." ނިސްތާރު ބުންޏެވެ.
މި ސީޒަންގައި ޓީމްގެ ޓާގެޓާ ގުޅޭގޮތުން އޭނާ ބުނީ އެންމެ ރަނގަޅަށް ސީޒަން ނުފެށުނު ކަމުގައިވިޔަސް އެޓީމްގެ އަމާޒަކީ ގަދަ ހަތަރެއް ކަމަށެވެ. ރެލިގޭޓްވުމުގެ ބިރު މިހާރު ޓީމްތަކަށް ނެތްނަމަވެސް ކުޅުންތެރިން މޯޓިވޭޝަނަށް ބަދަލެއް ނާންނަ ކަމަށް ނިސްތާރު ވަނީ ބުނެފަ އެވެ.
ގަދަ ހަތަރެއްގައި ނިންމާލުމަކީ މުހިންމު ކަމެއްކަން ފާހަގަކުރަމުން ނިސްތާރު ބުނީ ސްޕޮންސަރުން ހޯދުމާއި ކަންކަމަށް ބަލާއިރު ގަދަ ހަތަރަކުން ޖާގަ ހޯދައިފި ނަމަ އެޑްވާންޓޭޖްތަކެއް އެބަހުރި ކަމަށެވެ.
"އަޅުގަނޑުމެން ޓީމްގައި މިތިބި ކުޅުންތެރިންނަކީ ވަރަށް ގޮތް ދޫނުކުރާ ކުދިން ކޮޅެއް. ހަމައަރާ ކޮންމެ ކުއްޖަކުވެސް ހަމަ ކުޅެނީ ތިމަންނަ ހުރެގެން މި ޓީމް ބައްޔެއް ނުވާނޭ. އެކަހަލަ ކިކެއްގައި. އެހެންވީމަ އަޅުގަނޑުމެން އެހެން ބަލާފަ އީޒީއެއް ނުކުރަން. ރެލިގޭޝަން އިނަސް ނެތަސް އަޅުގަނޑުމެންގެ ޓާގެޓަކީ ގަދަ ހަތަރެއް." އޭނާ ބުންޏެވެ.
ބުރާއި ގްރީން ސްޓްރީޓްސްގެ މެޗު ފަށާނީ މިއަދު ހަތަރެއް ޖަހާއިރު އެވެ.
