ލަންޑަން (ޖުލައި 9) - ވެސްޓް ހޭމް ޔުނައިޓެޑްގެ މިޑްފީލްޑަރު، ޑެކްލަން ރައިސް އާއި އަޔެކްސްގެ ޑިފެންޑަރު ޔޫރިއަން ޓީމްބާގެ ސޮއި އާސެނަލުން ހޯދިއިރު، އެ ޓީމުގެ މިޑްފިލްޑަރު ގްރޭނިޓް ޝަކާ، ޖަރުމަންގެ ބަޔާ ލެވަކޫސަން އަށް ބަދަލުވެއްޖެ އެވެ.
އެހެން އަހަރުތަކާ ހިލާފަށް މި އަހަރުގެ ހޫނު މޫސުމުގެ ޓްރާންސްފާގައި އިނގިރޭސި ކުލަބު އާސެނަލް އުޅެނީ ހަލަބޮލިކޮށެވެ. މިހާތަނަށް އެކުލަބުން ޗެލްސީގެ އެޓޭކަރު ކައި ހަވާޓްސްގެ ސޮއި ހޯދާފައިވާއިރު، ކުލަބުގެ މުހިންމު ގިނަ ކުޅުންތެރިންގެ ކޮންޓްރެކްޓް ވަނީ އާކޮށްފަ އެވެ.
އެންމެ ފަހުން އެކުލަބާ ގުޅުނު ދެ ކުޅުންތެރިންނަކީ ވެސްޓް ހޭމް ޔުނައިޓެޑްގެ ޑެކްލަން ރައިސް އާއި އަޔެކްސްގެ ޑިފެންޑަރު ޓިމްބާ އެވެ. އިނގިރޭސި ގިނަ ކުލަބުތަކަކުން ބޭނުންވި ރައިސްގެ ސޮއި އާސެނަލުން ހޯދީ އިނގިރޭސި ރެކޯޑު ފީއެއްކަމަށްވާ 105 މިލިއަން ޕައުންޑް (135 މިލިއަން ޑޮލަރު) އަށެވެ.
އަޔެކްސްގެ އުއްމީދީ ޑިފެންޑަރު ޓިމްބާ އާސެނަލަށް ސޮއިކުރީ 38 މިލިއަން ޕައުންޑް (47 މިލިއަން ޑޮލަރު)ގެ ޓްރާންސްފާ ފީ އަކަށެވެ.
މި ދެ ކުޅުންތެރިން އާސެނަލަށް ސޮއިކުރުމުގެ ކަންކަން މިހާރު ނިމިފައިވާއިރު، މި ފަށާ ހަފްތާގައި ކުލަބުން ރަސްމީކޮށް ދެ ކުޅުންތެރިން ސޮއިކުރިކަން އިއުލާންކުރާނެ އެވެ. ދެ ކުޅުންތެރިންގެ މެޑިކަލްގެ ކަންކަން ވެސް މިހާރު ނިމިފައިވާކަމަށް އިނގިރޭސި މީޑިއާތަކުން ރިޕޯޓްކުރެ އެވެ.
އާސެނަލުން ރައިސް އެކުލަބަށް މި ގެނައީ މިޑްފިލްޑަރު ޝަކާ އެކުލަބު ދޫކޮށްލަން ނިމާފައިވަނީކޮށެވެ. ޝަކާ، 30، ސޮއިކުރީ ޖަރުމަންގެ ބަޔާ ލެވަކޫސެން އަށެވެ.
ފަންސަވީސްް މިލިއަން ޑޮލަރުގެ އަގަކަށް ޝަކާ ބަދަލުވިއިރު އޭނާގެ ކޮންޓްރެކްޓްގައި ބާކީ އެއް އަހަރު އެބައޮތެވެ. މިދިޔަ ސީޒަނަށް ފަހު ވެސް ޝަކާ ހުރީ އާސެނަލް ދޫކޮށްލާށެވެ. ނަމަވެސް އާސެނަލްގެ ކޯޗު މިކޭލް އާޓެޓާގެ އެދުމުގެ މަތިން އޭނާ އާސެނަލްގައި އެއް އަހަރަށް މަޑުކުރީ އެވެ.
އާ ސީޒަނަށް ތައްޔާރުވުމަށް އާސެނަލުން ކުރާ އެންމެ އިސްކަމަކީ ޓީމުގެ މުހިންމު ކުޅުންތެރިންގެ ކޮންޓްރެކްޓް އާކުރުމެވެ. އެ ގޮތުން ބުކާޔޯ ސަކާ، ގެބްރިއެލް މާޓިނެލީ، ރެއިސް ނެލްސަން އަދި ވިލިއަމް ސަލީބާގެ ކޮންޓްރެކްޓް މިހާރުވަނީ އާ ކޮށްފަ އެވެ. އެންމެ ފަހުން އާ ކޮންޓްރެކްޓްގައި ސޮއިކުރީ ސަލީބާ އެވެ.
މިދިޔަ ސީޒަންގައި އާސެނަލްގެ ޖާޒީގައި މޮޅު ކުޅުމެއް ދެއްކި ސަލީބާގެ ކުރީގެ ކޮންޓްރެކްޓް އަންނަ އަހަރު ހަމަވާން އޮއްވާ އާސެނަލުން ވަނީ 2027 އާ ހަމައަށް އެކުލަބުގައި ސަލިބާ ބެހެއްޓުމަށް ނިންމާފަ އެވެ. އާ ކޮންޓްރެކްޓްގެ ދަށުން ސަލީބާއަށް ހަފްތާއަކު 192،000 ޕައުންޑްގެ މުސާރައެއް ލިބޭނެ އެވެ.
މިހާތަނަށް ތިން ކުޅުންތެރިއަކު ގަތުމަށް އާސެނަލުން ޖުމްލަ އެކު، 200 މިލިއަން ޕައުންޑް (250 މިލިއަން ޑޮލަރު) ހަރަދުކޮށްފައިވާއިރު، ދެން އެކުލަބުން ބޭނުންވަނީ ފޯވާޑެއް ގެނައުމަށެވެ. އެ ގޮތުން މިހާރު އެކުލަބުގެ ކޮންޓްރެކްޓްގައި ހުރި ފްލޮރިއަން ބަލޮގަން ވިއްކާލުމަށް ފަހު އެހެން ފޯވާޑެއް ގެނައުން ގާތްކަމަށް މީޑިއާތަކުން ރިޕޯޓްކުރެ އެވެ.
