ލަންޑަން (ޖުލައި 5) - އިނގިރޭސި ޗެލްސީ އަށް ކުޅެމުން އަންނަ ކްރިސްޓިއަން ޕުލިސިޗް ހޯދުމަށް ފްރާންސްގެ ލިޔޯނުން މަސައްކަތްކުރި ނަމަވެސް އިޓަލީ ލީގުގެ އޭސި މިލާނަށް ބަދަލުވާން އޭނާ ނިންމައިފި އެވެ.
ޕުލިސިޗް 24، ހޯދުމަށް ލިޔޯނުން ގިނަ މަސައްކަތްތަކެއް ކުރަމުން އައި ނަމަވެސް އެކުލަބަށް އޭނާ ގެންދިޔުމުގައި އުނދަގޫތަކެއް އެބަހުއްޓެވެ. އޭގެ ތެރޭގައި މިވަގުުތު އެކުލަބު މާލީ ހާލަތު ހުރިގޮތުން ޕުލިސިޗް ގެންދިޔުމުގައި އުނދަގޫތަކެއް ހުރުމާއި ފްރާންސް ލީގުގައި ކުޅެން ޕުލިސިޗް ކުޅެން ބޭނުން ނުވުން ހިމެނެ އެވެ.
ޗެލްސީއާއިއެކު ޕުލިސިޗް ހަދާފައިވާ ކޮންޓްރެކްޓް ހަމަވާނީ އަންނަ އަހަރު އެވެ. އެހެންކަމުން ޗެލްސީ އިން ބޭނުންވަނީވެސް ޕުލިސިޗް އާ ސީޒަން ފެށުމުގެ ކުރިން ރަނގަޅު އަގެއްގައި ވިއްކާލާށެވެ.
އެމެރިކާގެ ގައުމީ ޓީމްގެ އެޓޭކަރު ބޭނުންވަނީ އިޓަލީ ލީގުގެ އޭސީ މިލާނަށް ބަދަލުވާށެވެ. އޭސީ މިލާނުންވެސް ޕުލިސިޗް ހޯދުމަށް ޝައުގުވެރިވާއިރު އެކުލަބުން ކުޅުންތެރިއާއާއިއެކު އެއްބަސްވުމަކަށްވެސް އައިސްފައިވާކަމަށް މީޑިއާތަކުން ރިޕޯޓްކުރެ އެވެ.
އޭސީ މިލާނުން ޕުލިސިޗް ހޯދަން އަދި ރަސްމީ ބިޑެއް ކޮށްފައެއް ނުވެ އެވެ. އެކަމަކު ކުރިއަށް އޮތް ހަފްތާއެއްހާ ދުވަސްތެރޭގައި ޕުލިސިޗް ހޯދުމަށް 20 މިލިއަން ޕައުންޑްގެ ބިޑެއް މިލާނުން ކުރާނެކަމަށް ބެލެވެ އެވެ.
އޭސީ މިލާނަށް ޕުލިސިޗް ދާން ބޭނުންވާ އެއް ސަބަބަކީ އެކުލަބުން އެމެރިކާގެ ގައުމީ ޓީމްގެ ކުޅުންތެރިންތަކެއް ގެންދިޔުމަށް މަސައްކަތްކުރަމުންދިޔުމެވެ. މިގޮތުން ވެލެންސިއާއަށް ކުޅެމުން އަންނަ އެމެރިކާ މިޑްފިލްޑަރު ޔޫނުސް މޫސާ އާއި އާސެނަލްގެ އެމެރިކާ ފޯވާޑް ފްލޮރިއަން ބަލޮގަން ގެންދަންވެސް މިލާނުން ޝައުގުވެރިވެ އެވެ.
ކްރިސްޓިއަން ޕުލިސިޗް ޗެލްސީ ދޫކޮށްލުމަށް ނިންމައިގެން ހުރީ އެކުލަބުގައި އޭނާ އަށް ލިބޭ ފުރުސަތުތައް މަދުކަމުންނެވެ. މިދިޔަ ސީޒަންގައި އޭނާއަށް ކުޅެން ލިބުނީ 24 މެޗުގަ އެވެ. އޭގެ ތެރެއިން ގިނައީ ބަދަލު ކުޅުންތެރިއެއްގެ ގޮތުގައި ކުޅެން އެރި މެޗުތަކެވެ.
ޕުލިސިޗް އަކީ އާ ސީޒަން ފެށުމުގެ ކުރިން އެކުލަބު ދޫކޮށްލަން ނިންމާފައިވާ ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. މިހާތަނަށް ހާލިދޫ ކޫލިބަލީ، ކައި ހަވާޓްސް، އެންގޯލޯ ކާންޓޭ، އެޑުއާޑް މެންޑީ އަދި މޭސަން މައުންޓް އަދި ސެޒާ އަޒްޕިލިކުއޭޓާ ވަނީ ޗެލްސީ ދޫކޮށްލާފަ އެވެ.
