ޕެރިސް (ޖޫން 23) - އެމެރިކާގެ މަހުޖަނު، ޓޮޑް ބޯލީގެ ބްލޫކޯ ކޮންސޯޓިއަމް އިން ފްރާންސްގެ އެއް ވަނަ ޑިވިޝަން، ލީގު 1 ގައި ކުޅެމުން އަންނަ ކްލަބް، ސްޓްރޯސްބާގް ގަނެފި އެވެ.
މިއީ ފާއިތުވި އަހަރެއްހާ ދުވަސް ތެރޭ ބްލޫކޯ ކޮންސޯޓިއަމް އިން ގަތް ދެ ވަނަ ކްލަބެވެ. އެންމެ ފުރަތަމަ ގަނެފައިވަނީ މިދިޔަ އަހަރު އިނގިރޭސި ކްލަބް ޗެލްސީ އެވެ. ޗެލްސީ ގަންނަން ބޯލީގެ ކުންފުނިން ވަނީ 5.2 ބިލިއަން ޑޮލަރު ހަރަދުކޮށްފަ އެވެ. މީޑިއާ ރިޕޯޓްތައް ބުނާގޮތުން ބޯލީގެ ކުންފުނިން ސްޓްރާސްބާގް ގަންނަން މުޅި އެއްކޮށް ހަރަދުކުރާނީ 100 މިލިއަން ޑޮލަރު އެވެ.
ޗެލްސީގައި ބޯލީ ހޭދަކުރި ފުރަތަމަ އަހަރު އެ ޓީމުން ވަނީ ދެ ފުލްޓައިމް ކޯޗުން ކަމަށްވާ ތޯމަސް ޓުޗެލް އާއި ގްރަަހަމް ޕޮޓާ ވަކިކޮށްފަ އެވެ. އަދި ވަގުތީ ކޯޗުންގެ ގޮތުގައި ބްރޫނޯ ސޯލްޓާ އާއި ފްރޭންކް ލަމްޕާޑް މަސައްކަތްކުރިއިރު، ޗެލްސީން ސީޒަން ނިންމާލީ އިނގިރޭސި ޕްރިމިއާ ލީގުގެ 12 ވަނައިގަ އެވެ. މިއީ، 1994 ވަނަ އަހަރަށް ފަހު ޗެލްސީން އެންމެ ދަށްކޮށް ސީޒަން ނިންމާލި ފަހަރެެވެ.
ބޯލީ ވަނީ ޗެލްސީއާ ހަވާލުވެ އާ ކުޅުންތެރިން ގަންނަން އަހަރެއްގެ ތެރޭގައި 624 މިލިއަން ޑޮލަރު ހަރަދުކޮށްފަ އެވެ. ބޯލީ އަކީ އެމެރިކާގެ ބޭސްބޯޅަ ޓީމު، ލޮސް އެންޖެލްސް ޑޮޖާސްގެ ވެސް މެޖޯރިޓީ ހިއްސާދާރެވެ. އަދި ބާސްކެޓްބޯޅައިގެ ގަދަބާރު، ލޮސް އެންޖެލްސް ލޭކާސްގެ ހިއްސާދާރުންގެ ތެރޭގައި ވެސް ބޯލީ ހިމެނެ އެވެ.
ރިޕޯޓްތައް ބުނާގޮތުން އެއް ކުންފުންޏަކުން ޗެލްސީ އާއި ސްޓްރާސްބާގް ހިންގި ކަމަށް ވިޔަސް، ދެ ޓީމުގެ ކަންކަން ބަލަހައްޓާނީ ތަފާތު ދެ ބަޔަކަށްވާތީ، އެއް ސިސްޓަމެއްގެ ތެރެއިން ދެ ކްލަބްގެ ކަންކަން ކުރިއަށް ނުގެންދާނެ އެވެ. އަދި ސްޓްރާސްބާގަކީ ޗެލްސީ އަށް ކުޅުންތެރިން "ފީޑް" ކޮށްދޭ ޓީމަކަށް ހަދަން އެ ކްލަބްގެ ސަޕޯޓަރުންގެ ގްރޫޕުން ބޭނުމެއް ނުވެ އެވެ.
ފަހަކަށް އައިސް އެމެރިކާގެ ވިޔަފާރިތަކުން އަންނަނީ ފްރާންސްގެ ކްލަބްތައް ގަންނަމުންނެވެ. އެ ގޮތުން މި ވަގުތު މާސޭ، ލިޔޯން، ޓޮލޫސް އަދި ލެ ހާވްރޭ ހިންގަމުން އަންނަނީ އެމެރިކާ ވިޔަފާރިވެރިންނެވެ.
