ބާސެލޯނާ (ޖޫން 15) - މި ފަހަރުގެ ޓްރާންސްފާ މާކެޓްގައި ބާސެލޯނާ އިން ބޭނުންވާ ކުޅުންތެރިޔާ ގަންނަން ހުރަހެއް ނެތް ކަމަށް އެ ކްލަބްގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
މި ފަހަރުގެ ޓްރާންސްފާ މާކެޓްގައި ބާސެލޯނާ އިން އެންމެ ބޮޑަށް ޓާގެޓްކުރި އެއް ކަމަކީ މީގެ ދެ އަހަރު ކުރިން އެ ކްލަބްގެ މާލީ ހާލަތު އަޑިއަޅާލާފައި އޮތުމުން ކޮންޓްރެކްޓް އާ ނުކުރެވިގެން ދޫކޮށްލަން ޖެހުނު ތަރި ލިއޮނަލް މެސީ އަލުން ގެނައުމެވެ. އެކަމަކު، ބާސެލޯނާގެ މާލީ ހާލަތު އަދިވެސް ރަނގަޅުނުވާތީ އާއި އަމިއްލަ އެެހެން ސަބަބުތަކާ ހުރެ މެސީ ވަނީ ބާސެލޯނާ އަށް އެނބުރި ނައިސް، އެމެރިކާ ލީގުގެ އިންޓަ މިއާމީ އަށް ބަދަލުވާން ނިންމައިފަ އެވެ.
މެސީ އަނބުރާ ގެންނަން ކުރި މަސައްކަތް ކާމިޔާބުނުވުމުން ބާސެލޯނާގެ ރައީސް ލަޕޯޓާ އަށް ވެސް ގިނަ ސަޕޯޓަރުންގެ ނުރުހުން ވަނީ އަމާޒުވެފަ އެވެ. ލަޕޯޓާ ދިން އިންޓަވިއުއެއްގައި ބުނީ ބާސެލޯނާ އިން ބޭނުންވާ ކުޅުންތެރިން ގަންނަން ހުރަހެއް ނެތް ކަމަށެވެ.
"އަހަރެމެންގެ މާލީ ހާލަތު ދުވަހެއް ދުވަހަަކަށް އަންނަނީ ރަނގަޅުވަމުން، ލަލީގާ އިން އެ ބުނާ ގަވާއިދުތަކާ އެއް ގޮތަށް ހުރިހާ ކަމެއް ވެސް މިދަނީ، އަހަރެމެން ބޭނުންވާ ކުޅުންތެރިން، ރަނގަޅު އަގުގައި ގެންނަން ހުރަހެއް ނެތް،" ލަޕޯޓާ ވިދާޅުވި އެވެ.
ބާސެލޯނާ އިން ވަނީ މި ފަަހަރު ސްޕެނިޝް ލީގު ޗެމްޕިއަންކަން ހޯދައިފަ އެވެ. މިއީ 2019 ވަނަ އަހަރުގެ ފަހުން އެ ކްލަބުން ލީގު ހޯދި ފުރަތަމަ ފަހަރެވެ. ލަޕޯޓާ ވިދާޅުވީ މިދިޔަ ސީޒަން ބާސެލޯނާ އަށް ކާމިޔާބު ކަމަށެވެ. އަދި ބާސެލޯނާ ކުރިން އޮތް ހިސާބަށް ގެންދަން ކޯޗު ޒަވީ ހެނާންޑޭޒް ކުރަމުން އަންނަ މަސައްކަތަށް ލީޑަޝިޕްގެ އެއްބާރުލުން ފުރިހަމަ އަށް ދޭނެ ކަމަށް ލަޕޯޓާ ވަނީ ވިދާޅުވެފަ އެވެ.
