ގައުމީ ބޮޑީބޯޑިން ލީގުގައި ހިމެނޭ ހަތަރު މުބާރާތް ބާއްވަން ހަމަޖެހިފައި އޮތް ތާރީހު ތަކަށް ބަދަލުގެނެސް ބުރުނު ޝިކާރު ބޮޑީބޯޑިން ޗެލެންޖާ އެކު އަންނަ މަހު ލީގު ފަށަން ނިންމައިފި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ކަލަންޑަރު މި އަހަރުގެ ކުރީކޮޅު އިއުލާންކުރިއިރު ގައުމީ ލީގު ފަށަން ހަމަޖެހިފައި އޮތީ މި މަހުގެ 5-13 އަށް މާލޭގައި ބޭއްވުމަށް ހަމަޖެހިފައިވާ ބުރުނު ޝިކާރު ބޮޑީބޯޑިން ޗެލެންޖާ އެކުގަ އެވެ. ނަމަވެސް މި މުބާރާތް މިހާރު ވަނީ އަންނަ މަހުގެ 17-23 އަށް ފަސްކޮށްފަ އެވެ.
އަހަރުގެ ދެ ވަނަ މުބާރާތް ކަމަށްވާ ފުވައްމުލަކު ޗެލެންޖު މިހާރު ބާއްވަން ނިންމާފައިވަނީ 21-29 ސެޕްޓެމްބަރުގަ އެވެ. ފުވައްމުލަކުގައި ބާއްވާ މި މުބާރާތް ކުރިން މިމުބާރާތް ބާއްވަން ހަމަޖެހިފައި އޮތީ ޖޫން 21-30 އަށެވެ.
ގައުމީ ލީގުގެ ތިން ވަނަ މުބާރާތް ކ.ތުލުސްދޫގައި ސެޕްޓެމްބަރު މަހުގެ 8-16 އަށް ބާއްވަން ކުރިން ހަމަޖެހިފައި އޮތް ނަމަވެސް މިހާރު މި މުބާރާތް ބާއްވަން ނިންމާފައިވަނީ އޮކްޓޯބަރު 13-21 އަށެވެ. ލީގުގެ ފަހު މުބާރާތް ކަމަށްވާ ގައުމ ބަނޑުފިލާ ޗެލެންޖު ބާއްވަން ނިންމާފައިވާ އާ ތާރީޚަކީ ނޮވެމްބަރު 12 އިން ޑިސެމްބަރު އެކަކަށެވެ.
ގައުމީ ލީގުގެ މުބާރާތްތައް ބާއްވާ ދުވަސްތަކަށް ބަދަލުތައް އައި ނަމަވެސް ދުނިޔޭގެ ބޮޑީބޯޑިން ފެޑެރޭޝަންގެ އެންމެ މަތީ ފަންތީގެ އެއް މުބާރާތްކަަމަށްވާ މޯލްޑިވްސް ޕްރޯ ބާއްވަން ކަނޑައަޅާފައި އޮތް ތާރީޚަށް ބަދަލެއް ނާންނާނެ އެވެ. މިއަހަރުވެސް މި މުބާރާތް އޮންނާނީ މާލޭގެ ވަރުނުލާ ރާޅުގަނޑުގަ އެވެ.
ދުނިޔޭގެ އެންމެ މަތީ ފަންތީގެ ބޮޑީބޯޑަރުން ވާދަކުރާ މި މުބާރާތް އޮންނާނީ އޮގަސްޓް 3-12 އަށެވެ.
މޯލްޑިވްްސް ޕްރޯއަކީ މިއަހަރުވެސް އެމްބީބީއޭ އިން އެންމެ ބޮޑު އިސްކަމެއްދީގެން ތައްޔާރުވަމުން އަންނަ އެއް މުބާރާތެވެ. މިގޮތުން މި މުބާރާތުގެ ކަންކަން މިއަހަރު ފުރިހަމައަށް ގެންދިޔުމާ ގުޅޭގޮތުން މިދިޔަ މާޗު މާހުގެ ތެރޭގައި އެމްބީބީއޭގެ އޮފިޝަލުން ވަނީ ރައީސް އިބްރާހިމް މުހައްމަދު ސޯލިހުއާވެސް ބައްދަލުކުރައްވާފަ އެވެ.
މިދިޔަ އަހަރުގެ މޯލްޑިވްސް ޕްރޯގައި ދިވެހި އެތުލީޓުން ރަނގަޅު ނަތީޖާތަކެއް ނެރުނެވެ. އެ ގޮތުން ޖޫނިއާ ބައިގެ ފައިނަލްގައި އާމިން އުމަރު މޫސާ ވާދަކުރިއިރު، ޑްރޮޕް-ނީ ބައިގެ ސެމީ ފައިނަލުގައި ކުޑައައްޔަ ވާދަކުރި އެވެ. މި ނަތީޖާތަކާ އެކު ދުނިޔޭގެ ރޭންކިންގައި ވެސް މި ދެ ކުޅުންތެރިން ހިމެނުނެވެ. އަހަރު ނިންމާލިއިރު، ކުޑަ އައްޔަ އޮތީ ޑްރޮޕް-ނީ ބައިގެ 12 ވަނައިގަ އެވެ.
