ބާސެލޯނާ (މެއި 29) - ސްޕެނިޝް ލީގުގައި ރޭ ބާސެލޯނާ އިން އަމިއްލަ ދަނޑުގައި 3-0 އިން ރެއާލް މަޔޯކާ އަތުން މޮޅުވި މެޗަކީ މަރާމާތަށް ބަންދުކުރުމުގެ ކުރިން ބާސެލޯނާގެ ދަނޑުގައި ކުޅޭ ފަހު މެޗުކަމަށްވާއިރު، ރޭގެ މެޗަކީ ބާސެލޯނާ ދޫކޮށްލަން ނިންމާފައިވާ އަލްބާ އާއި ބުސްކެޓްސް އެ ދަނޑުގައި ކުޅުނު ފަހު މެޗު ކަމަށްވާތީ އެ ކުޅުންތެރިންނަށް ސަޕޯޓަރުންގެ ލޯބި ދައްކާލައިފި އެވެ.
ތިން އަހަރަށް ފަހު ސްޕެނިޝް ލީގުގެ ޗެމްޕިއަންކަން ހޯދި ބާސެލޯނާ އަށް ރޭގެ މެޗު ފެށިގެން 49 ސިކުންތު ތެރޭގައި ލީޑުނަގައިިދިނީ އަންސޫ ފާޓީ އެވެ. މަޔޯކާ އަށް މެޗުގެ ތެރެއަށް އެނބުރި އަންނަން ގޮންޖެހުމާ ކުރިމަތިވީ 14 ވަަނަ މިނިޓްގައި އަމަތު އެންޑިއާޔޭ އަށް ރަތް ކާޑެއް ދެއްކުުންނެވެ. އޭގެ، 10 މިނިޓް ފަހުން، ބާސެލޯނާ އަށް ލީޑުފުޅާކޮށްދިނީ ވެސް ފާޓީގެ ގޯލަކުންނެވެ.
މެޗުގެ 70 ވަނަ މިނިޓްގައި އޮސްމާން ޑެމްބެލޭ ދިން ބޯޅައަކުން ބާސެލޯނާގެ ތިން ވަނަ ގޯލު ޖެހީ ގަވީ އެވެ.
މި ސީޒަނަށް ފަހު އަލްބާ ބާސެލޯނާ ދޫކޮށްލަން ނިންމިއިރު، އޭނާ އަންނަނީ 2012 ވަނަ އަހަރުން ފެށިގެން އެ ޓީމަށް ކުޅެމުންނެވެ. އަނެއްކޮޅުން، ބާސެލޯނާގެ ކެޕްޓަނެއްގެ ގޮތުގައި ހުރި ސާޖީ ބުސްކެޓްސް އަކީ ބާސެލޯނާގެ ލަ މާސިއާ އެކެެޑަމީ ތެރެއިން ޕެޕް ގާޑިއޯލާ ހުރިއިރު، 2008 ވަނަ އަހަރު ސީނިއާ ޓީމަށް ޕްރޮމޯޓްވެ، ތަފާތު ދައްކަން ފެށި ކުޅުންތެރިއެކެވެ.
އަލްބާ އާއި ބުސްކެޓްސް ވަނީ ރޭގެ މެޗަށް ފަހު ބާސެލޯނާ ސަޕޯޓަރުންނާ މުހާތަބުކޮށް ވާހަކަ ދައްކައިފަ އެވެ.
މި ސީޒަނަށް ފަހު ބާސެލޯނާގެ ދަނޑު، ކޭމްޕް ނޯ މަރާމާތަށް ބަންދުކުރާއިރު، ދެން ހުޅުވާނީ އަންނަ އަހަރު ފަހުކޮޅުގަ އެވެ. ބާސެލޯނާގެ ދަނޑަކީ ދުނިޔޭގެ ފުޓްބޯޅައިގައި ވެސް މުއްސަނދި ތާރީހެއް އެކުލެވޭ ސްޓޭޑިއަމެކެވެ. އެ ގޮތުން، ރަސްމީކޮށް 1957 ވަަނަ އަހަރު ހުޅުވި ބާސެލޯނާގެ ކޭމްޕް ނޯ ބަންދުކޮށްފައި މި އޮންނަ މުއްދަތުގައި ބާސެލޯނާގެ ހޯމް މެޗުތައް ކުޅޭނީ މޮންޓްޔޫއީގެ އޮލިމްޕިކް ސްޓޭޑިއަމްގަ އެވެ.
މި ފަހަރު ލީގުގައި ބާސެލޯނާ ކުޅޭ ފަހު މެޗަކީ އަންނަ އާދިއްތަ ދުވަހު ސެލްޓަ ވިގޯއާ ބައްދަލުކުރާ މެޗެވެ. އެ މެޗު ކުޅޭނީ ވީގޯގަ އެވެ.
