ލަންޑަން (މެއި 24) - އިނގިރޭސި ފޯވާޑް، ބުކާޔޯ ސަކާ، މިހާރު ވެސް ކުޅެމުން އަންނަ ކްލަބް، އާސެނަލާ އެކު ހަދާފައިވާ ކޮންޓްރެކްޓް އާ ކޮށްފި އެވެ.
ސަކާ، 21، އާސެނަލްގެ އެއްބަސްވުން އާ ކޮށްފައި މި ވަނީ މި ސީޒަން ފެށިގެން ކުރަމުން އައި މަޝްވަރާތަކަކަށް ފަހު، ދެ ފަރާތުން އެއްބަސްވާ ކަންތައްތަކެއް ކޮންޓްރެކްޓްގައި ހިމެނުމަށް ފަހު އެވެ. އެ ގޮތުން، ރިޕޯޓްތައް ބުނާގޮތުން ސަކާ، އާސެނަލާ އެކު އެއްބަސްވީ 2027 ވަނަ އަހަރުގެ ޖޫން މަހުގެ ނިޔަލަށް އެ ޓީމަށް ކުޅެދޭ ގޮތަށް އޮތް ކޮންޓްރެކްޓެއްގަ އެވެ.
އުމުރުން އެންމެ އަށް އަހަރުގައި އާސެނަލާ ގުޅުނު ސަކާ ވަނީ މިދިޔަ ދެ ސީޒަނުގައި އާސެނަލުން ޕްރިމިއާ ލީގުގައި ކުޅުނު ހުރިހާ މެޗެއްގައި ކުޅެފަ އެވެ.
މި ސީޒަނުގައި އާސެނަލުން ޕްރިމިއާ ލީގަށް ވާދަކުރިއިރު، ސަކާ ވަނީ މޮޅު ކުޅުމެއް ދައްކައިފަ އެވެ. މުޅި ސީޒަނަށް ބަލާއިރު، ސަކާ ވަނީ ހުރިހާ މުބާރާތެއްގައި އެއްކޮށް، އާސެނަލަށް 14 ގޯލު ޖަހައިދީ، 11 ގޯލު ޖަހަން ފުރުސަތު ތަނަވަސްކޮށްދީފަ އެވެ.
އާސެނަލްގެ ކޮންޓްރެކްޓް އާ ކުރި ސަކާ (މ) އެ ޓީމުގެ ކޯޗު އާޓެޓާ (ކ) އާއި ސްޕޯޓިން ޑިރެކްޓަރު އެޑޫ (ވ)އާ އެކު.
ސަކާ ބުނީ އާސެނަލްގައި މަޑުކުރަން ނިންމި އެންމެ ބޮޑު ސަބަބަކީ އޭނާ އެންމެ މޮޅު ކުޅުންތެރިޔާ އަށް ވުމަށް ޓަކައި، ކުރަން ޖެހޭ ކަންކަމަށް ފޯކަސްކޮށް ކެރިއަރުގައި ކުރިއަށްދިއުމަށް ފުރުސަތު އެންމެ ބޮޑުކޮށް އޮތް ޓީމަކީ އާސެނަލް ކަމަށް ވާތީ އެވެ.
އާސެނަލްގެ ސީނިއާ ޓީމުން ސަކާ އަށް ފުރުސަތު ދިނީ 2018 ވަނަ އަހަރު އެ ޓީމުގެ ކޯޗަކަށް އުނާއި އެމެރީ ހުރިއިރު އެވެ.
އާސެނަލްގެ މިހާރުގެ ކޯޗު، މިކޭލް އާޓެޓާގެ ޕްލޭނުގައި ވެސް މުހިންމު ރޯލެއް އަދާކުރަމުން އަންނަ ސަކާއާ ބެހޭގޮތުން، އާޓެޓާ ބުނީ އެ ޓީމުން ދާން ބޭނުންވާ ލެވަލަށް ގެންދިއުމަށްޓަކައި އެ ޕްލޭނުގެ ތެރެއިން އެންމެ އިސް ދައުރެއް އަދާކުރާނެ ކުޅުންތެރިއަކީ ސަކާ ކަމަށެވެ. އަދި އެ ފަދަ ކުޅުންތެރިއަކު ކްލަބްގައި މަޑުކުރަން ނިންމުމަކީ މުޅި ޓީމަށް ލިބޭ އުފާވެރިކަމެއް ކަމަށެވެ.
ސަކާގެ ސޮއި ހޯދަން މެންޗެސްޓާ ސިޓީ އާއި ރެއާލް މެޑްރިޑް އަދި ބޮރޫޝިއާ ޑޯޓްމަންޑުން މަސައްކަތް ކުރި އެވެ.
