މެންޗެސްޓާ (މެއި 22) - އިނގިރޭސި ޕްރިމިއާ ލީގުގައި ރޭ ޗެލްސީ އަތުން 1-0 އިން ހޯދި މޮޅަށް ފަހު މެންޗެސްޓާ ސިޓީން ޖެހިޖެހިގެން ތިން ވަނަ ފަހަރަށް ލީގުގެ ތަށި އުފުލާލައިފި އެވެ.
އާސެނަލުން 284 ދުވަހު ލީގުގެ އެއް ވަނައިގައި އޮތް ނަމަވެސް ސިޓީން މި ވަނީ ފަހަތުން އަރައި، ލީގުގެ ޗެމްޕިއަންކަން ހޯދައިފަ އެެވެ. ޕްރިމިއާ ލީގުގެ އެންމެ ފަހުން ކުޅުނު ހަ ސީޒަންގެ ތެެރެއިން ފަސް ފަހަރު ލީގު ޗެމްޕިއަންކަން ހޯދީ ސިޓީންނެވެ. ސިޓީން މި ވަނީ ޖުމްލަ އެކު، ނުވަ ފަަހަރަށް އިނގިރޭސި ލީގު ކާމިޔާބުކޮށްފަ އެވެ.
ރޭގެ މެޗަށް ސިޓީން ނުކުތްއިރު ވެސް އޮތީ ލީގު ޔަގީންވެފަ އެވެ. އެއީ ހޮނިހިރު ދުވަހުގެރޭ އާސެނަލް ކުޅުނު މެޗުން ނޮޓިންހަމް ފޮރެސްޓް އަތުން ބަލިވުމުންނެވެ. ލީގު ތާވަލަށް ބަލާއިރު، ސިޓީން ވަނީ 36 މެޗުން 88 ޕޮއިންޓް ހޯދައިފަ އެވެ. ދެ ވަނައިގައި އޮތް އާސެނަލްގެ އޮތީ 37 މެޗުން 81 ޕޮއިންޓެވެ.
ސިޓީގެ އިއްތިހާދު ސްޓޭޑިއަމްގައި ރޭ ކުޅުނު މެޗަށް އެ ޓީމުން ނެރުނީ ބެންޗު ޓީމެވެ. އާންމުކޮށް ފުރަތަމަ އެގާރައިގައި ކުޅޭ ގިނަ ކުޅުންތެރިންތަކެއް ލަައިގެން ސިޓީން ފެށި މި މެޗުގައި އެ ޓީމުގެ ހަމައެކަނި ގޯލު ޖެހީ 12 ވަނަ މިނިޓްގައި ކޯލް ޕާމާ ދިން ބޯޅައަކުން ހޫލިއަން އަލްވަރޭޒް އެވެ. މިއީ މި ސީޒަނުގެ ހުރިހާ މުބާރާތެއްގައި ސިޓީން އަމިއްލަ ދަނޑުގައި ޖެހި 100 ވަނަ ގޯލެވެ.
އިތުރު ލަނޑެއް ޖަަހަން ސިޓީން ކުރި މަސައްކަތުގައި އަލްވަރޭޒް ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ބަލައިނުގަންނަން ނިންމީ އެ ގޯލު ޖަހަން ފުރުސަތު ހޯދައިދިން ރިޔާދު މާރޭޒް އަތުން ބޯޅަ ކޮންޓްރޯލް ކޮށްފައިވާތީ އެވެ.
ސިޓީން އަންނަނީ މި ސީޒަނުގެ ތިން ތަށްޓަށް ވާދަކުރަމުންނެވެ. އެ ގޮތުން، ޕްރިމިއާ ލީގުގެ ޗެމްޕިއަންކަމަށް ފަހު، ދެން ސިޓީން ތަށްޓަށް ވާދަކުރަނީ އެފްއޭ ކަޕް ފައިނަލާއި ޗެމްޕިއަންސް ލީގުގެ ފައިނަލުގަ އެވެ. އެފްއޭ ކަޕްގެ ފައިނަލުގައި މެންޗެސްޓާ ޔުނައިޓެޑާ ކުޅޭއިރު، ޗެމްޕިއަންސް ލީގުގެ ފައިނަލުގައި އިންޓަ މިލާނާ ބައްދަލުކުރާނެ އެވެ.
ރޭގެ މެޗަށް ފަހު ސިޓީގެ ގިނަ އަދަދެއްގެ ސަޕޯޓަރުން ވަނީ ދަނޑަށް އަރައި، ލީގު ޗެމްޕިއަންކަން ލިބުމުގެ އުފާފާޅުކުރުމުގައި ބައިވެރިވެފަ އެވެ.
