އަންނަ ޖުލައި މަހު ރާއްޖޭގައި ބޭއްވުމަށް ހަމަޖެހިފައިވާ ދެ ވަނަ އޭޝިއަން ސާފިން ޗެމްޕިއަންޝިޕް ރަސްމީކޮށް މިއަދު ލޯންޗްކޮށްފި އެވެ.
ތިން އަހަރުގެ މެދުކެނޑުމަކަށް ފަހު އޭޝިއަން ސާފިން ޗެމްޕިއަންޝިޕް މި އަހަރު ބޭއްވުމަށް ހަމަޖެހިފައިވަނީ ޖުލައި މަހުގެ 8-17 އަށް ކ. ތުލުސްދޫގަ އެވެ.
އޭޝިއާ ސަރަހައްދުގެ ސާފިން މުބާރާތް ރަސްމީކޮށް ލޯންޗްކޮށްދެއްވަމުން ޔޫތު މިނިސްޓަރު އަހުމަދު މަހުލޫފު ވިދާޅުވީ ސާފިންގެ ބައިނަލްއަގްވާމީ މުބާރާތެއް ބޭއްވުމަކީ ރައީސުލްޖުމްހޫރިއްޔާގެ ވައުދުފުޅެއް ކަމަށާއި، މި މުބާރާތް ރާއްޖޭގައި ބޭއްވުމަށް އެސޯސިއޭޝަނުން ކުރި މަސައްކަތް ފާހަގަކުރެއްވާ ކަމަށެވެ.
މި މުބާރާތަކީ މި އަހަރު ބާއްވާ ބައިނަލްއަގްވާމީ ތިން ވަނަ މުބާރާތެވެ. މި އަހަރު މިހާތަނަށް ވޮލީބޯޅައިގެ ބައިނަލްއަގްވާމީ މުބާރާތަކާއި ބިލިއާޑްގެ ދުނިޔޭގެ ފެންވަރުގެ މުބާރާތެއް ވަނީ ބާއްވައިފަ އެވެ.
މިނިސްޓަރު މަހުލޫފް ވިދާޅުވީ މިދިޔަ އަހަރު ބޭއްވި ބައިނަލްއަގްވާމީ ނުވަ މުބާރާތުން ރާއްޖެ އަށް ކުޅިވަރުގައި ކުރިއެރުން ލިބުނު ކަމަށާއި، މި އަހަރު މި ބާއްވާ މުބާރާތްތަކުން ވެސް ގިނަ ކުރިއަރެންތަކާއި ކާމިޔާބީ ލިބޭނެ ކަމަށް އުންމީދު ކުރައްވާ ކަމަށެވެ.
ސާފިން އެސޯސިއޭޝަންގެ ރައީސް/ޗެއާމަން ޗޭ (ކ) އާއި ޔޫތު މިނިސްޓަރު މަހުލޫފް.--- ފޮޓޯ: މުހައްމަދު ޝާބިން/ އަދަދު
"މި މުބާރާތްތައް ބާއްވާ އެންމެ މައިގަނޑު އެއް ސަބަބަކީ އަޅުގަނޑުމެންގެ ގައުމީ ޓީމްގެ އެތުލީޓުންނަށް ރާއްޖޭގެ ރައްޔިތުންގެ ކުރިމަތީގަ ވާދަކުރުމުގެ ފުރުސަތު ހޯދައިދިނުން. އޭގެ އިތުރުން ގިނަ މުބާރާތްތަކެއްގައި ވާދަކުުރުމުން މި އެތުލީޓުންވެސް ކުރިއަރައިންދާނެ އެބަ މަގުފަހިވޭ" މަހުލޫފް ވިދާޅުވި އެވެ.
މަހުލޫފު ވިދާޅުވީ ސާފިން ކަހަލަ ކުޅިވަރުތަކުގެ ބައިނަލްއަގްވާމީ މުބާރާތްތަކާ އެކު ކުޅިވަރުގެ މަންޒިލެއްގެ ގޮތުގައި ބޭރުގެ ގައުމުތަކަށް ރާއްޖެ އިޝްތިހާރުވުމަކީ ވެސް ލިބޭ ބޮޑު ހިތްހަމަޖެހުމެއް ކަމަށެވެ.
ރާއްޖޭގައި ސާފިން ކުރިއެރުވުމަށް ސާފިން އެސޯސިއޭޝަނުން ކުރަމުން އަންނަ މަސައްކަތް ފާހަގަކުރަމުން މަހުލޫފު ވިދާޅުވީ މިދިޔަ ދެތިން އަހަރަށް ބަލާއިރު އެންމެ ބޮޑު ކުރިއެރުމެއް ހޯދައި އެންމެ ބޮޑު އެއްބާރުލުމެއް މިނިސްޓްރީއަށް ލިބުނު އެއް ކުޅިވަރަކީ ސާފިން ކަމަށެވެ.
މިހާރު ސާފިންގެ އެތުލީޓުން ތައްޔާރުވަމުން ދަނީ ބޭރުގެ ވަރުގަދަ ކޯޗަކާ އެކު ރަނގަޅު ވަސީލަތްތަކާ އެކު ކަން ވެސް މިނިސްޓަރު ފާހަގަކުރެއްވި އެވެ.
މި ރަސްމިއްޔާތުގައި ވާހަކަދައްކަމުން ސާފިން އެސޯސިއޭޝަންގެ ރައީސް/ޗެއާމަން މުހައްމަދު ސޮބާހު (ޗޭ) ވިދާޅުވީ މިއީ ރާއްޖޭގެ ސާފިން ތާރީޚުގައިވެސް ތާރީޚީ ދުވަހެއްކަމަށާއި، މިދިޔަ ދެތިން އަހަރު ސާފިން އަށް ބޮޑު ބަދަލެއް އައިސްފައިވާ ކަމަށެވެ. އޭގެ ހެއްކަކީ މި މުބާރާތް ރާއްޖޭގައި ބޭއްވުންކަމަށް އޭނާ ވިދާޅުވި އެވެ.
ޗޭ ވަނީ މި މުބާރާތް ކުރިއަށް ގެންދިޔުމަށް ތުލުސްދޫގެ ސާފިން ކޮމިއުނިޓީ އާއި ތުލުސްދޫގެ ކައުންސިލުން ލިބުނު އެހީތެރިކަން ފާހަގަކޮށް ޝުކުރު ދަންނަވައިފަ އެވެ.
"މިދިޔަ ދެ ތިން އަހަރުގެ ތެރޭގައި ސާފިން އަށް ބޮޑު ބަދަލެއް އައިއްސި. އެތުލީޓުންގެ ސްކިލްވެސް ކުރިއަރައިފި. މުބާރާތްތަކަށް ބޮޑު ބަދަލެއް އައިސްފި. އެ ތަފާތު މި މުބާރާތުންވެސް ފެންނާނެކަމަށް މި ބަލަނީ" ޗޭ ވިދާޅުވި އެވެ.
އޭޝިއަން ސާފިން ޗެމްޕިއަންޝިޕްގެ ފުރަތަމަ މުބާރާތް ބާއްވާފައި ވަނީ 2018 ވަނަ އަހަރު ޖަޕާނުގަ އެވެ. އެ މުބާރާތުގެ ފައިނަލް ހީޓުގައި ރާއްޖޭގެ ހުސެއިން އަރީފް (އިބޫ) އާއި އިސްމާއިލް ރަޝީދު (ސްމައިލީ) ވާދަ ކުރި އެވެ. އިބޫ އަށް ތިން ވަނަ ލިބުނުއިރު ސްމައިލީ ދިޔައީ ހަތަރު ވަނައަށެވެ.
