ލަންޑަން (މެއި 13) - މި ސީޒަނަށް ފަހު، ވެސްޓް ހޭމްގެ ކެޕްޓަން ޑެކްލަން ރައިސް އެ ކްލަބު ދޫކޮށް އެހެން ކްލަބަކަށް ބަދަލުވުމުގެ ފުރުސަތު ވަރަށް ބޮޑު ކަމަށް ވެސްޓް ހޭމްގެ ކޯޗު ޑޭވިޑް މޮއިސް ބުނެފި އެވެ.
އިންގްލެންޑްގެ ގައުމީ ޓީމުގެ ވެސް މުހިންމު ކުޅުންތެރިއެއް ކަމަށްވާ ރައިސް، 24، ވެސްޓް ހޭމްއާ އެކު ހަދާފައިވާ ކޮންޓުރެކްޓް ހަމަވާނީ 2024 ވަނަ އަހަރު އެވެ.
ވެސްޓް ހޭމް އިން އޭނާގެ ކޮންޓުރެކްޓް އާކުރުމަށް ގިނަ މަސައްކަތްތަކެއް ކުރި ނަމަވެސް، ކޮންޓުރެކްޓް އާކުރުމަށް ރައިސް އަދި އެއްބަހެއް ނުވެ އެވެ.
ރައިސް އަކީ އިނގިރޭސި ޕްރިމިއާ ލީގުގެ ބޮޑެތި ކްލަބުތަކުގެ ޝައުގުވެރިކަން ލިބިފައިވާ ކުޅުންތެރިއެކެވެ.
މޮއިސް ބުނީ އެ ކްލަބުގައި ރައިސް ބަހައްޓަން ބޭނުންވިޔަސް، މި ސީޒަނަށް ފަހު އޭނާ އެ ކްލަބުގައި މަޑުކުރާނެކަމުގެ ޔަގީންކަމެއް ނެތް ކަމަށެވެ.
"އަހަރަމެންގެ އުންމީދަކީ އޭނާ މި ކްލަބުގައި މަޑުކުުރުން. އެކަމަކު އަހަރަމެން ގަބޫލްކުރަން އޭނާ އެހެން ކްލަބަކަށް ބަދަލުވުމުގެ ފުރުސަތު ވަރަށް ބޮޑުކަން،" މޮއިސް ބުންޏެވެ.
ވެސްޓް ހޭމްގެ އެކެޑަމީން ތަމްރީނުވި ރައިސް އެ ކްލަބުގެ ސީނިއާ ޓީމަށް ކުޅެން ފެށީ 2017 ވަނަ އަހަރެވެ. އޭގެ ފަހުން އޭނާ ވަނީ މިހާތަނަށް އެ ކްލަބަށް 243 މެޗު ކުޅެފައެވެ.
ރިޕޯޓްތަކުން ބުނާގޮތުގައި މެންޗެސްޓާ ސިޓީ، އާސެނަލް އަދި ލިވަޕޫލުން ރައިސް ގެންދަން ޝައުގުވެރިވެ އެވެ. ވެސްޓް ހޭމް ބޯޑުގެ ވިސްނުމަކީ ޗެމްޕިއަންސް ލީގުގައި ކުޅޭ ކްލަބަކަށް ރައިސް ވިއްކާލާނަމަ، 110-135 މިިލިއަން ޑޮލަރުގެ ފީއެއް ނެގުމެވެ.
