ބާސެލޯނާ (މެއި 10) - ބާސެލޯނާގައި ކާމިޔާބު ގިނަ އަހަރުތަކެއް ހޭދަކޮށްފައިވާ މިޑްފީޑަރު ސާޖިއޯ ބުސްކެޓްސް މި ސީޒަނަށް ފަހު އެ ކްލަބު ދޫކޮށްލަން ނިންމާފައިވާކަން އިއުލާނުކޮށްފި އެވެ.
"މިއީ ބާސެލޯނާގައި އަހަރެން ހޭދަކުރާ ފަހު ސީޒަންކަން އިއުލާންކުރަންޖެހޭ ވަގުތު،" ބުސްކެޓްސް އޭނާގެ އިންސްޓަގްރާމްގައި ބުނެފައިވެ އެވެ.
"މި ކްލަބުގައި ހޭދަކުރި ދުވަސްތަކުގެ މަތިން ދުވަހަކު ވެސް ހަނދާން ނުނެތޭނެ. އެއީ އަހަރެން ދެކެމުންއައި ހުވަފެނެއް. އަދި ހާސިލްކުރެވުނު ހުރިހާކަމަކާ މެދު ފަހުރުވެރިވޭ."
ބާސެލޯނާގެ ކެޕްޓަންކަން ވެސް އަދާކުރަމުންދާ ބުސްކެޓްސް ،34، ވަނީ ބާސާއާއެކު ސްޕެނިޝް ލީގު 8 ފަހަރު އަދި ޗެމްޕިއަންސް ލީގު ތިން ފަހަރު ކާމިޔާބުކޮށްފައެވެ. މި ސީޒަންގައި ވެސް ބާސާ އިން ވަނީ ލީގު ހޯދުމާ ގާތަށް މިހާރު ޖެހިލައިފައެވެ.
ޕެޕް ގާޑިއޯލާގެ ކޯޗުކަމުގެ ދަށުން ބާސެލޯނާ ސީނިއާ ޓީމުން 2008 ވަނަ އަހަރު ޖާގަ ހޯދި ބުސްކެޓްސް ވަނީ މިހާތަނަށް ބާސެލޯނާ އަށް 700 އަށް ވުރެ ގިނަ މެޗު ކުޅެދީފަ އެވެ. ފާއިތުވި އަހަރުތަކުގައި ބުސްކެޓްސް އަކީ ބާސެލޯނާގެ އެންމެ މުހިންމު އެއް ކުޅުންތެރިޔާ އެވެ. ލީޑަރެއްގެ ރޯލުގައި ފެނިގެންދިޔައީ ބުސްކެޓްސް އެވެ.
ބާސެލޯނާ ދޫކޮށްލުމަށް ފަހު ބުސްކެޓްސް ދެން ކުޅޭނެ ކްލަބެއް އަދި އިއުލާނު ނުކުރިޔަސް، އޭނާ ސަައުދީ އަރަބިއްޔާގެ ކްލަބަކަށް ބަދަލުވާނެ ކަމަށް ރިޕޯޓްތަކުން ދަނީ ބުނަމުންނެވެ.
މި ސީޒަނަށް ފަހު ވެސް ބުސްކެޓްސް، ބާސެލޯނާގައި މަޑުކުރަން އެ ޓީމުން ބޭނުންވާ ކަމަށް ބާސެލޯނާގެ ކޯޗު ޒަވީ ހެނާންޑޭޒް ވަނީ މީގެ ކުރިން ބުނެފަ އެވެ. އެކަމަކު، މުސްތަގުބަލާ މެދު ގޮތެއް ނިންމާނީ ބުސްކެޓްސް ކަމަށް ޒަވީ ވެސް ވަނީ ބުނެފަ އެވެ.
ސްޕެއިންގެ ގައުމީ ޓީމުން ބުސްކެޓްސް ރިޓަޔާކުރީ މިދިޔަ އަހަރުގެ ޑިސެމްބަރު މަހު އެވެ. ގައުމީ ޓީމާ އެކު ބުސްކެޓްސް ވަނީ 2010 ވަނަ އަހަރު ވޯލްޑް ކަޕާއި 2012 ވަނަ އަހަރުގެ ޔޫރޯ ކާމިޔާބުކޮށްފަ އެވެ.
