ޒުވާން ސްކޮޑަކާ އެކު މި ސީޒަނަށް ކުރިމަތިލި ކްލަބް ވެލެންސިއާ 2-0 އިން ބަލިކޮށް، ޓީސީ ސްޕޯޓްސް ކްލަބުން މި ފަހަރުގެ އެމްޑަބްލިއުއެސްސީ ދިވެހި ޕްރިމިއާ ލީގުގެ ފުރަތަމަ މޮޅު ހޯދައިފި އެވެ.
ޕްރެޒިޑެންޓްސް ކަޕެކޭ އެއްގޮތަށް ވެލެންސިއާ އިން މި މެޗަށް ނެރުނު ފުރަތަމަ އެގާރައިގައި ވެސް 14 އަހަރުގެ އީތަން އިބްރާހިމް ޒަކީ އާއި މުހައްމަދު އިލާން އިމްރާން ވަނީ ހިމެނިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގެ ފުރަތަމަ ރަނގަޅު ފުރުސަތު ހޯދީ ވެސް ވެެލެންސިއާގެ ޒުވާން ތަރި، އިލާން އެވެ. އެ ގޮތުން، ތިން ވަނަ މިނިޓްގައި ޓީސީ ޑިފެންސް ފަހަތަށް މަތިން އައި ބޯޅައެއް ހޯދައި، ގޯލުގެ ދުރު ކަނަށް ޖަހަން އިލާން ފޮނުވާލި ބޯޅަ ދިޔައީ ގޯލާ ސީދާނުވެ މަތިންނެވެ.
ޓީސީން މަޑުމަޑުން މެޗުގެ ކޮންޓްރޯލް ނަގައި، 16 ވަނަ މިނިޓްގައި ގޯލު ޖެހި އެވެ. މިއީ އޭރިއާތެރެއަށް ހުރަސްވި ބޯޅައަކުން ޓީސީގެ ކުރިއަށް ކުޅޭ މުހައްމަދު މުސްލިހު (މުއްޓި) ޖެހި ގޯލެކެވެ. މުއްޓި ފޮނުވާލި ބޯޅަ ގޯލަށް ވަންއިރު، ވެލެންސިއާގެ ކީޕަރު އާދަމް އިމްއާން އަށް މާ ބޮޑު ކަމެއް ނުކުރެވުނެވެ. އިމްއާން އަކީ މީގެ ކުރިން ޓީސީ އަށް ވެސް ކުޅެފައިވާ ކީޕަރެކެވެ.
ލީޑުފުޅާކުރަން ޓީސީން ކުރި މަސައްކަތް ވަނީ މެޗުގެ 30 ވަނަ މިނިޓްގައި ކާމިޔާބުކޮށްފަ އެވެ. އޭރިއާތެރެއިން ޓީސީގެ އީރާސް އަހުމަދު (އީތޯ) ޖެހި ބޯޅަ ގޯލުގެ އަރިމަތިން ހޯދައި، ޓީސީގެ އަހުމަދު މާއިޝް ރަޝީދު ފޮނުވާލުމުން ގޯލަށް ބޯޅަ ވަނީ ކީޕަރު އިމްއާން އަތުގައި ޖެހިފަ އެވެ.
ފުރަތަމަ ހާފުގައި ޓީސީގެ އޭރިއާތެރެއަށް ވެލެންސިއާގެ އީތަން ދެ ފަހަރެއްގެ މަތިން ބޯޅަ ހިފައިގެން ވަދެ، ގޯލަށް ބޯޅަ ޖެހޭތޯ ކުރި މަސައްކަތް ކާމިޔާބެއްނުވި އެވެ.
ޓީސީން ދެ ވަނަ ހާފްގެ ކުޅުން ފެށިގެން ހަ މިނިޓް ތެރޭ އެ ޓީމުގެ ތިން ވަނަ ގޯލު ޖެހުމާ ގާތަށް ޖެހިލި އެވެ. މެޗުގެ 51 ވަނަ މިނިޓްގައި މުއްޓި އޭރިއާބޭރުން ޖެހި ބޯޅަ ބޭރުވީ ދަނޑީގައި ޖެހިފަ އެވެ.
ބަދަލަކަށް ކުޅެން އެރި ޓީސީގެ އަހުމަދު ސާމިއު މެޗުގެ 81 ވަނަ މިނިޓްގައި ފޮނުވާލި ބޯޅަ ވެލެންސިއާގެ ޑިފެންޑަރު، މުހައްމަދު އައިހަމް އަންވަރު ވަނީ ބްލޮކްކޮށްފަ އެވެ. އޭގެ ކުރިން، ޓީސީގެ އަހުނަފް މުހައްމަދު ތަސްނީމް (ނަފްކޮ) އޭރިއާތެރެއިން އެ ޓީމުގެ އެހެން ކުޅުންތެރިއަކަށް ދޭން އުޅުނު ބޯޅަ އެ ޓީމުގެ އެހެން ކުޅުންތެރިއަކަށް ނުލިބުނެވެ.
މުޅި މެޗުގައި ވެލެންސިއާ އަށް ގޯލެއް ޖަހަން ލިބުނު އެންމެ ރަނގަޅު ހުސް ފުރުސަތު ލިބުނީ އިތުރު ވަގުުތުގައި އެ ޓީމުގެ އަބްދުﷲ ޔާމީން (ޔާނު) އަށެވެ. އޭރިއާތެރެއިން ބޯޅަ ކޮންޓްރޯލް ކުރުމަށް ފަހު ޔާނު ޖެހި ބޯޅަ ދިޔައީ ހުރަސްދަނޑިމަތިންނެވެ.
ލީގުގައި މިރޭ ކުޅޭ މެޗުގައި ކްލަބް އީގަލްސް ނުކުންނާނީ ބުރު ސްޕޯޓްސް ކްލަބާ ދެކޮޅަށެވެ.
