މެޑްރިޑް (އޭޕްރީލް 13) - ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި މުބާރާތުގެ އެންމެ ފަހުގެ ޗެމްޕިއަން، ރެއާލް މެޑްރިޑުން ކަރިމް ބެންޒެމާގެ ގޯލާ އެކު 2-0 އިން ރޭ ޗެލްސީ ބަލިކޮށްފި އެވެ.
ރެއާލް ދަނޑުގައި ޗެލްސީން މި މެޗު ނިންމާލީ ކުޅުންތެރިއަކު މަދުކޮށެވެ. މެޗުގެ 60 ވަނަ މިނިޓްގައި ޗެލްސީގެ ފުލްބެކް، ބެން ޗިލްވެލް އަށް ވަނީ ކުރި ފައުލަކަށް ރަތް ކާޑު ދައްކައިފަ އެވެ.
މެޑްރިޑްގެ ސަންޓިއާގޯ ބާނަބާއުގައި ރޭ ކުޅުނު މެޗު ފަށައިގެން މާގިނައިރެއްނުވެ، ޗެލްސީން ކައުންޓަ އެޓޭކުގައި ރަނގަޅު ފުރުސަތެއް ހޯދި އެވެ. އެތުލެޓިކޯ މެޑްރިޑްގެ ލޯން އެއްބަސްވުމެއްގެ ދަށުން ޗެލްސީ އަށް ކުޅެމުން އަންނަ ޔާއޯ ފެލިކްސް ކައުންޓަ އެޓޭކުގައި ހުސްކޮށް ލިބުނު ބޯޅަ ހިފައިގެން ރެއާލް އޭރިއާތެރެއަށް ވަދެ، ޖެހި ބޯޅަ ރެއާލް ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ރެއާލުން ރޭ ލީޑުނެގީ 21 ވަނަ މިނިޓްގައި ބެންޒެމާ ވައްދާލި ގޯލުންނެވެ. މިއީ ޗެލްސީ އޭރިއާތެރެއިން އެ ޓީމުގެ ކީޕަރު ކެޕާ އަރިއްޒަބަަލާގާ އަތުގައި ޖެހިފައި އައި ވަގުތު ބެންޒެމާ ރީބައުންސް ބޯޅަ އަކުން ޖެހި ލަނޑެކެެވެ. މިއީ، އިނގިރޭސި ކްލަބްތައް ކޮޅަށް ޗެމްޕިއަންސް ލީގުގައި ބެންޒެމާ ޖެހި 20 ވަނަ ގޯލެވެ. ޗެމްޕިއަންސް ލީގުގައި ބެންޒެމާ މި ވަނީ ޖުމްލަ އެކު، 90 ގޯލު ހަމަކޮށްފަ އެވެ.
ރެއާލްގެ ވިނީޝިއުސް (މ) ޗެލްސީގެ ކީޕަރު ކެޕާ (ކ) ކައިރިން ބޯޅަ ފޮނުވާލަނީ.--- ފޮޓޯ: އޭއެފްޕީ
ޗެލްސީ އަށް އެއްވަރުކޮށްދޭން ރަހީމް ސްޓާލިން ޖެހި ބޯޅަ ކީޕަރު ކޯޓުއާ ވަނީ ހުއްޓުވައިފަ އެވެ.
ދެ ވަނަ ހާފުގެ ކުޅުން ފަށައިގެން 15 މިނިޓް ހިނގިތަނާ ރެއާލްގެ ރޮޑްރީގޯ ހުސްކޮށް އެރި ބޯޅައެއްގައި އޭނާ އަށް ފައުލުކުރުމުން ޗިލްވެލް އަށް ވަނީ ރަތް ކާޑު ދައްކައިފަ އެވެ.
ޗެލްސީގެ ކުޅުންތެރިއަކު މަދުވުމުގެ ފައިދާ ރެއާލަށް ނަގައިދިނީ ބަދަލަކަށް ކުޅެން އެރިތާ ތިން މިނިޓް ތެރޭ ރެއާލްގެ ދެ ވަނަ ގޯލު ޖެހި މާކޯ އަސެންސިއޯ އެވެ. އޭރިއާ ރޮނގުކައިރިން އަސެންސިއޯ ވަނީ ގޯލުގެ ތިރީ ކަނަށް ބޯޅަ ވައްދާލައިފަ އެވެ.
ޗެލްސީ އަށް ގޯލެއް ޖަަހައިދޭން މޭސަން މައުންޓް ޖެހި ބޯޅަ ބްލޮކްކުރީ ރެއާލްގެ ޑިފެންޑަރު އެންޓޯނިއޯ ރޫޑިގާ އެވެ. ރޫޑިގާ އަކީ ޗެލްސީ ދޫކޮށް މި ސީޒަނުގައި ރެއާލާ ގުޅުނު ކުޅުންތެރިއެކެވެ.
އަންނަ ހަފްތާގެ އަންގާރަ ދުވަހު ޗެލްސީ ދަނޑުގައި ކުޅޭ ދެ ވަނަ ލެގުގެ މެޗުން ރެއާލް އަތުން ތިން ގޯލުން މޮޅުވެގެން ނޫން ގޮތަކަށް ޗެލްސީ އަށް ސެމީ ފައިނަލަށް ނުދެވޭނެ އެވެ. ޗެލްސީގެ ކޯޗު ފްރޭންކް ލަމްޕާޑް ބުނީ ނަތީޖާ އަނބުރާލެވޭނެ ކަމުގެ އުންމީދުގައި މަސައްކަތް ކުރުން އޮތީ ޗެލްސީގެ އަތްމަތީގައި ކަމަށާއި އެ ވިސްނުމުގައި ކުރެވުނު ހުރިހާ ކަމެއް ކުރާނެ ކަމަށެެވެ.
ރެއާލްގެ ކޯޗު ކާލޯ އަންޗެލޮޓީ ބުނީ ފުރަތަމަ ލެގުން މޮޅުވިޔަސް، އެއީ ސެމީގެ ޖާގަ ޔަގީންވީ ކަމަށް ނުދެކޭ ކަމަށާއި ދެ ވަނަ ލެގުގައި ވަރަށް ރަނގަޅަށް މަސައްކަތް ކޮށްގެން ނޫން ގޮތަކަށް ނަތީޖާއަކާ ހަމައަށް ނުދެވޭނެ ކަމަށް ވަނީ ބުނެފަ އެވެ.
