ޒިއުރިކް (މާޗް 24) - ސްޕެނިޝް ލީގުގެ ރެފްރީ ކޮމިޓީގެ ކުރީގެ ނައިބް ރައީސް އެންރިކޭޒް ނެގްރެއިރާގެ ހިއްސާ އޮންނަ ކުންފުނި، ޑަޒްނިލް 95 އަށް ބާސެލޯނާ އިން ފައިސާ ދިން މައްސަލައިގައި އެ ކްލަބާ ދެކޮޅަށް ސްޕެއިނުގެ ކޯޓަކުން ކޮރަޕްޝަންގެ ދައުވާ އުފުލާފައިވާއިރު، ޔޫރަޕްގެ މައި ފުޓްބޯޅަ އިދާރާ ޔުއެފާ އިން ވެސް އެ މައްސަލަ ތަހުގީގު ކުރަން ފަށައިފި އެވެ.
ސްޕެއިނުގެ ފުޓްބޯޅަ ފެޑެރޭޝަނާ ގާތްގުޅުމެއް އޮންނަ ރެފްރީ ނެގްރެއިރާގެ ހިއްސާ އޮންނަ ޑަޒްނިލް 95 އަށް ބާސެލޯނާ އިން ވަނީ 2001 އިން 2018 އަށް ޖުމްލަ އެކު، ނުވަ މިލިއަން ޑޮލަރު ދީފަ އެވެ.
ޑަޒްނިލް 95 އަށް ބާސެލޯނާ އިން އެކި ފަަހަރު މަތިން ދިން މި ފައިސާތަކާ ގުޅޭ ލިޔެކިޔުންތަކުގައި ފުށުއެރުން ގިނަ ކަންކަން ހިމެނޭއިރު، ސްޕެއިނުގެ ޓެކްސް އޮތޯރިޓީން ވެސް ވަނީ މައްސަލަތަކެއް ފެންމަތިކޮށްފަ އެވެ.
ސްޕެނިޝް ލީގުގެ ކްލަބްތަކުގެ ޕްރެޝަރާ ހެދި ލަލީގާ އިން އެ މައްސަލަ ބަލަން ނިންމިއިރު، ސްޕެއިނުގެ ޕްރޮސެކިއުޓަރުންތަކެއް ވަނީ އެ މައްސަލަ ކޯޓުގައި ކުރިއަށްގެންދިއުމުގެ މަސައްކަތް ފަށައިފަ އެވެ. ބާސެލޯނާއާ ވާދަވެރި ރެއާލުން ވެސް ވަނީ މި މައްސަލައިގައި ބާސެލޯނާ އަށް ފިޔަވަޅު އަޅަން ތާއީދުކުރާ ކަމަށް ބުނެފަ އެވެ.
މި މައްސަލައިގައި ދިފާއުވުމަށް ބާސެލޯނާ އިން ބުނަމުން އަންނަނީ އެ ފައިސާ އަކީ ރެފްރީންގެ ކަންކަމުގައި ބާސެލޯނާގެ އެކި ޓީމުތަކަށް ކަންކަން އޮޅުންފިލުވައިދޭން އެކި އަހަރުތަކެއް މަތިން ދީފައިވާ ފައިސާ ކަމަށެވެ. އެކަމަކު، ޕްރޮސެކިއުޓަރުން ތުހުމަތުކުރާ ގޮތުގައި މިއީ މެޗުތަކުގައި ބާސެލޯނާއާ އެއްކޮށް ކަންކަން ނިންމައިދޭން ދީފައިވާ ފައިސާ އެވެ.
ކަޓަލޫނިއާ ސަރަހަައްދުގެ ޕްރޮސެކިއުޓަރުން އިސްނަގައިގެން، ކުރާ މި ދައުވާގައި ހިމަނާފައިވާ މުއްދަތަށް ބަލައި، ބާސެލޯނާގެ ދެ ވަނަ ދައުރެއްގައި ރައީސްކަން ކުރައްވަމުން އަންނަ ޖޮއާން ލަޕޯޓާގެ އިތުރުން ބާސެލޯނާގެ ކުރީގެ ދެ ރައީސުން ކަމަށްވާ ސަންޑްރޯ ރޮސެލް އާއި ހޯސޭ މާރިއާ ބާޓޮމެއުއާ ދެކޮޅަށް ވެސް ދައުވާ ކުރާނެ އެވެ.
ޔުއެފާ އިން މި މައްސަލަ ބެލުމަށް ފަހު މައްސަލައިގައި ބާސެލޯނާ ކުށްވެރިވާނަމަ އެ ޓީމަށް ވަކި މުއްދަތެއް ވަންދެން ޔޫރަޕްގެ މުބާރާތްތަކުގައި ނުކުޅެވޭ ގޮތް ހެދުމުގެ އިހުތިޔާރު ލިބިދެ އެވެ.
