ގައުމީ ބޮޑީބޯޑިން ލީގުގެ ދެ މުބާރާތެއް މި އަހަރު މާލެ އިން ބޭރުގައި ބާއްވަން ނިންމައި، އަހަރުގެ ކަލަންޑަރު އިއުލާންކޮށްފި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ އަހަރުގެ ހަރަކާތްތަކުގެ ކަލަންޑަރު އިއުލާންކުރި މިދިޔަ އަންގާރަ ދުވަހުގެ ރޭ ބޭއްވި އެ އެސޯސިއޭޝަންގެ އަހަރީ އާންމު ޖަލްސާގަ އެވެ. މި ޖަލްސާގައި ކުޅިވަރު ކަލަންޑަރުގެ އިތުރުން އަހަރީ ރިޕޯޓް ފާސްކުރުމާއި، އަހަރުގެ ބަޖެޓް އަދި މި އަހަރަށް އެސޯސިއޭޝަނުން ކުރިއަށްގެންދާ އެކި އެކި ހަރަކާތްތަކުގެ ތަފްސީލްތައް މެންބަރުންނާ ހިއްސާކޮށްފައިވެ އެވެ.
އަހަރުގެ ކުޅިވަރު ކަލަންޑަރުގައި މި ފަހަރު ގިނަ ހަރަކާތްތައް ހިމަނާފައިވާއިރު އޭގެ ތެރެއިން އެންމެ ފާހަގަކޮށްލެވުނީ ގައުމީ ލީގުގެ ބައެއް މުބާރާތްތައް މާލެއިން ބޭރުގައި ބާއްވަން ނިންމުމެވެ. އެ ގޮތުން، މި އަހަރުގެ އެމްބީބީއޭ ލީގުގެ ދެ މުބާރާތެއް ކ. ތުލުސްދޫ އާއި ޏ.ފުވައްމުލަކުގައި ބާއްވަން ވަނީ ނިންމައިފަ އެވެ.
ގައުމީ ލީގުގައި މި އަހަރު ހަތަރު މުބާރާތެއްވަނީ ބާއްވަން ނިންމައިފަ އެވެ. ފުރަތަމަ މުބާރާތަކީ މެއި މަހުގެ 5-13 އަށް މޭލާގައި ކުރިއަށްގެންދާ ބުރުނު ޝިކާރު ބޮޑީބޯޑިން ޗެލެންޖެވެ. މި މުބާރާތް މިދިޔަ އަހަރު ވެސް ވަނީ ބާއްވާފަ އެވެ. ދެ ވަނަ މުބާރާތް އޮންނާނީ ޖޫން 21-30 އަށް ފުވައްމުލަކުގަ އެވެ. ޒުވާން ބޮޑީބޯޑަރުން އުފައްދަމުން އަންނަ ފުވައްމުލަކުގައި ބާއްވާ މުބާރާތަކީ ފުވައްމުލަކު ބޮޑީބޯޑިން ޗެލެންޖެވެ.
އަންގާރަ ދުވަހުގެ ރޭގައި ބޭއްވި މޯލްޑިވްސް ބޮޑީބޯޑިން އެސޯސިއޭޝަންގެ އަހަރީ އާންމު ޖަލްސާގެ ތެރެއިން.--- ފޮޓޯ: މިރާން ނާޝިމް/ އަދަދު
ލީގުގެ ތިން ވަނަ މުބާރާތް ކ. ތުލުސްދޫގައި އޮންނަނީ ސެޕްޓެމްބަރު 8-16 އަށެވެ. މި މުބާރާތަށް ދީފައިވާ ނަމަކީ ރަނދާ ބޮޑީބޯޑިން ޗެލެންޖެވެ. އަހަރުގެ އެންމެ ބޮޑު ލޯކަލް މުބާރާތް ކަމަށްވާ ގައުމީ ލީގުގެ ފަހު މުބާރާތަކީ އޮކްޓޯބަރު މަހުގެ 5-14 އަށް ބޭއްވުމަށް ހަމަޖެހިފައިވާ ގައުމީ ބަނޑުފިލާ ޗެލެންޖެވެ. މި މުބާރާތް އޮންނާނީ މާލޭގަ އެވެ.
މިދިޔަ އަހަރު އެމްބީބީއޭ އިން ގައުމީ ލީގުގައި ހަ މުބާރާތެއް ހިމެނި އެވެ. ނަމަވެސް އޭގެ ތެރެއިން ބޭއްވުނީ ދެ މުބާރާތެވެ. އެހެން މުބާރާތްތައް ނުބޭއްވުނު އެންމެ ބޮޑު އެއް ސަބަބަކީ މިދިޔަ އަހަރު ކަލަންޑަރުގައި ނުހިމެނޭ ބަައިނަލްއަގްވާމީ މުބާރާތެއް ބާއްވަން ޖެހުމެވެ. އެއީ، އައިބީސީ ވޯލްޑް ޓުއާގައި ހިމެނޭ "މޯލްޑިވްސް ޕްރޯ" އެވެ. މި އަހަރު އެ މުބާރާތްވެސް ކަލަންޑަރުގައި ހިމަނައިފައިވަނީ އެހެން މުބާރާތްތަކަށް އުނދަގޫ ނުވާ ގޮތަށެވެ.
އެމްބީބީއޭ އިން މިދިޔަ އަހަރުގެ ކަލަންޑަރުގައި ހަ މުބާރާތެއް ހިމެނި އެވެ. އެއީ ބުރުނު ޝިކާރު ބޮޑީބޯޑިން ޗެލެންޖް، ލަބޭރާ ބޮޑީބޯޑިން ޗެލެންޖް، ގައުމީ ބަނޑުފިލާ ޗެލެންޖް، ސުލްޓާން އޮފް ތަނބުރުދޫ، އަދަހުކުރު ގޮންޖެހުން އަދި މުލަ ބޮޑީބޯޑިން ޗެލެންޖް އެވެ.
