މޯލްޑިވްސް ސްޕޯޓްސް އެވޯޑްސް ހަފްލާގައި ރޭ ކުޅިވަރަށް ހިދުމަތް ކޮށްދިނުމުގެ އަގުވަޒަންކުރުމުގެ އެވޯޑް 17 ފަރާތަކަށް ދީފި އެވެ.
ރައީސް އިބްރާހިމް މުހައްމަދު ސޯލިހުގެ އަތްޕުޅުން، ރޭ އެވޯޑް ލިބިވަޑައިގެންނެވި ކުޅިވަރުގެ ހިދުމަތްތެރިންގެ ތެރޭގައި ކުޅިވަރު ކުޅުމުގެ ކެރިއަރުގައި ކުރި ހިދުމަތުގެ އަގުވަޒަންކުރުމުގެ އިނާމު ލިބުނު ފަރާތްތަކާއި އިދާރީ ގޮތުންނާއި މާލީ ގޮތުން ކުޅިވަރުގެ ކުރިއެރުމަށް މަސައްކަތް ކުރި ފަރާތްތަކަށް ލިބުނު އެވޯޑް ހިމެނެ އެވެ.
އެ ގޮތުން، އިނާމް ލިބިފައިވަނީ ފުޓްބޯޅަ އާއި ވޮލީގައި ވެސް ފާހަގަކުރެވުނު ކުރީގެ ކުޅުންތެރިޔާ، ސައްޔިދު އަލީ، ބާސްކެޓްބޯޅަ އާއި ޓޭބަލް ޓެނިސް ކުރިން ކުޅުއްވައި، ފަހުން ބާސްކެޓް އެސޯސިއޭޝަނާއި ހޭންޑްބޯލް މޯލްޑިވްސްގައި އިސް މަސައްކަތްތަކެއް ކުރެއްވި މޯލްޑިވްސް އޮލިމްޕިކް ކޮމިޓީގެ ނައިބު ރައީސް އަހުމަދު އިސްމާއިލް، އަންހެން ފުޓްބޯޅަ، ވޮލީ ބޯޅަ، ނެޓްބޯޅަ، ހޭންޑްބޯޅަ އަދި އެތުލެޓިކްސް ޓީމުގައި ހިމެނުނު އިޝްރަތު ހަމީދު، ކުރިން އެކިއެކި ކުޅިވަރުތަކުގެ އެންމެ މަތީ ފަޑީގައި ހުރި އަދި މިހާރު ކޮމިޝަނާ އޮފް ސްޕޯޓްސްގެ މަގާމު ފުރުއްވަމުން އަންނަ ހީނާ އަހުމަދު ސަލީމް (ބޮޑު ހީނާ) އަދި ސްވިމިން އެސޯސިއޭޝަންގެ ރައީސްކަން ތިން ވަނަ ދައުރަކަށް ފުރުއްވަމުން އަންނަ މޯލްޑިވްސް އޮލިމްޕިކް ކޮމިޓީގެ ވެސް ރައީސް، ކުޅިވަރު ހިދުމަތްތެރިޔާ، މުހައްމަދު އަބްދުއްސައްތާރު (ޗަމްޕީ) އެވެ.
އަދި ކުރިން މަތީ ލެވަލްގައި ބެޑްމިންޓަން ކުޅުމުގެ އިތުރުން، މިހާރު ބެޑްމިންޓަން އެސޯސިއޭޝަންގެ ރައީސް ކަމާއި ބައިނަލްއަގުވާމީ ލެވަލްގައި އިސް ޒިންމާތަކެއް ފުރުއްވަމުން އަންނަ މޫސާ ނާޝިދު، ވޮލީބޯޅަ އާއި ކްރިކެޓް އަދި ޓެނިސް ކުރިން ކުޅުއްވި، މިހާރު ޓެނިސް އެސޯސިއޭޝަންގެ ރައީސް އަހުމަދު ހަފީޒް، މާޒިޔާ ސްޕޯޓްސް އެންޑް ރެކްރިއޭޝަން، އާދައިގެ ކްލަބަކުން ރާއްޖޭގެ ޗެމްޕިއަން އަދި ނަމޫނާ ކްލަބެއްގެ ލެވަލަށް ގެންގޮސްދިން، މާޒިޔާގެ ޗެއާމަން އަހުމަދު ސާޖިދު އަދި ވޭތުވެދިޔަ 23 ވަރަކަށް އަހަރު ކުޅިވަރުގެ މެޑިކަލް ބައިގައި މަސައްކަތްކޮށް، ބައިނަލްއަގުވާމީ ދުނިޔޭގެ ވެސް އިހުތިރާމް ހޯދާފައިވާ ޑރ. އަހުމަދު ޝަކީބް އެވެ.
މީގެ އިތުރުން، ކުޅުންތެރިއެއްގެ ގޮތުގައި ފާހަގަވެ، ފަހުން ރެފްރީއެއްގެ ގޮތުގައި ވެސް މަސައްކަތް ކުރުމަށް ފަހު، މި ވަގުތު ޓީމު އޮފިޝަލެއްގެ ގޮތުގައި މެޑިކަލް ކަންކަމުގައި ވެސް މަސައްކަތް ކުރަމުން އަންނަ އަބްދުލް ހަކީމް މޫސާ، އެފްއޭއެމްގައި ކުރިން މަސައްކަތް ކުރެއްވި، މިހާރު ވެސް މަތީ ފަންތީގެ މެޗުތަކުގައި މެޗު ކޮމިޝަނަރުކަން ކުރަމުން އަންނަ އަހުމަދު ޝާހިރު، ރާއްޖޭގައި ބޮޑީބިލްޑިން ކުރިއެރުވުމަށް މަސައްކަތް ކުރެއްވި، މުހައްމަދު ހަލީމް (ކެސްޓޯ)، ރާއްޖޭގެ ކްރިކެޓް ލެޖެންޑް ފަރުހަތު ޖަލީލް، ކުރިން ޓޭބަލް ޓެނިސް އިން ރާއްޖެ އަށް ރަން ވަނަ ހޯދައިދީ ފަހުން، ކްލަބް ވެލެންސިއާ ހިންގުމުގައި ހަރަކާތްތެރިވާ އަދީލް ޖަލީލް، ކުޅިވަރު ދާއިރާގައި ކުޅުންތެރިއެއްގެ ގޮތުގަޔާއި ހިންގުންތެރިއެއްގެ ގޮތުގައި ގިނަ އަހަރުތަކެއް ހޯދާފައިވާ އަހުމަދު މުހައްމަދު (ދޮނާ) އަދި ބެޑްމިންޓަން ކުޅުމުގެ އިތުރުން ބެޑްމިންޓަންގެ ގިނަ ޖީލުތަކަކަށް އެހީތެރިކަން ފޯރުކޮށްދެމުން އަންނަ ހުސެއިން ރަޝީދު (ދޮންްބެ) އެވެ.
