ބާސެލޯނާ (މާޗް 10) - ސްޕެނިޝް ލީގުގެ ރެފްރީ ކޮމިޓީގެ ކުރީގެ ނައިބް ރައީސް އެންރިކޭޒް ނެގްރެއިރާގެ ހިއްސާ އޮންނަ ކުންފުންޏަކަށް ބާސެލޯނާ އިން ފައިސާ ދިން މައްސަލައިގައި އެ ކްލަބާ ދެކޮޅަށް ކޮރަޕްޝަންގެ ދައުވާ އުފުލައިފި އެވެ.
ސްޕެއިނުގެ މީޑިއާގައި މިދިޔަ މަހު ރިޕޯޓްކޮށްފައިވާ ގޮތުގައި ނެގްރެއިރާގެ ހިއްސާ އޮންނަ ކުންފުންޏަކަށް ބާސެލޯނާ އިން ވަނީ 2001 އިން 2018 އަށް ޖުމްލަ އެކު، ނުވަ މިލިއަން ޑޮލަރު ދީފަ އެވެ.
މި މައްސަލައިގައި ބާސެލޯނާގެ ކޯޓަކުން މިއަދު ވަނީ ނުގަވައިދުން މާލީ މަންފާ ހޯދަން މަކަރު ހެދުމާ އެކު، މަގާމުގެ ނުފޫޒުގައި ފައިދާތަކެއް ނަގަން ކޮރަޕްޝަންގެ އަމަލެއް ހިންގަން ބާސެލޯނާ އިން މަސައްކަތް ކޮށްފައިވާ ކަމަށް ބުނެ، އެ ކްލަބަށް ފިޔަވަޅު އަޅަން ދައުވާ އުފުލައިފަ އެވެ.
ބާސެލޯނާގެ ރައީސްގެ މަގާމުގައި ހުންނެވި ޖޮއާން ލަޕޯޓާ، ދެ ވަނަ ފަހަރަށް އެ ކްލަބްގެ ރައީސްގެ މަގާމަށް އިންތިހާބުވެވަޑައިގަތީ 2021 ވަނަ އަހަރުގެ މާޗް މަހުގެ ތެރޭގަ އެެވެ. އޭގެ ކުރިން ލަޕޯޓާ ވަނީ 2003-2010 އަށް ވެސް ބާސެލޯނާގެ ރައީސްގެ މަގާމު ފުރައްވައިފަ އެވެ.
ކަޓަލޫނިއާ ސަރަހަައްދުގެ ޕްރޮސެކިއުޓަރުން އިސްނަގައިގެން، ކުރާ މި ދައުވާގައި ހިމަނާފައިވާ މުއްދަތަށް ބަލައި، ލަޕޯޓާގެ އިތުރުން ބާސެލޯނާގެ ކުރީގެ ދެ ރައީސުން ކަމަށްވާ ސަންޑްރޯ ރޮސެލް އާއި ހޯސޭ މާރިއާ ބާޓޮމެއުއާ ދެކޮޅަށް ވެސް ދައުވާ ކުރާނެ އެވެ.
ލަލީގާގެ ރައީސް ހަވިއޭ ޓެބާސް ދާދި ފަހުން ދެއްވި އިންޓަވިއުއެއްގައި ވިދާޅުވީ، އެންރިކޭޒް ނެގްރެއިރާގެ މަސްލަހަތު އޮތް ކުންފުންޏަކަށް ބާސެލޯނާގެ ރަސްމީ އެކައުންޓްތަކުން ފައިސާ ލިބިފައިވާ ގޮތާ ގުޅޭ ގޮތުން ބާސެލޯނާ އިން ޖަވާބުދާރީވާން ޖެހޭނެ ކަމަށެވެ.
އެ ގޮތުން، ބާސެލޯނާ އަށް މި ކަމުގައި އެކަށީގެންވާ މައުލޫމާތު ފޯރުކޮށްނުދެވޭނަމަ ބާސެލޯނާގެ ރައީސް ކަމުން ލަޕޯޓާ އިސްތިއުފާ ދޭން ޖެހޭނެ ކަމަށް ލަޕޯޓާ ވަނީ ވިދާޅުވެފަ އެވެ.
ބާސެލޯނާ އަށް ފިޔަވަޅު ނާޅާތީ ސްޕެނިޝް ލީގުގެ 20 ކްލަބްގެ ތެރެއިން 18 ކްލަބެއް ކަންބޮޑުވުން ފާޅުކުރި އެވެ. އެއާ އެކު ބާސެލޯނާ އިން އޭރު ނެރުނު ބަޔާނެއްގައި ބުނެފައިވަނީ، ހިނގާދިޔަ އެ ކަންތައްތައް ދެނެގަންނަން އެ ކްލަބުން މިނިވަން އޮޑިޓެއް ކުރަން ތައްޔާރުވަމުން އަންނަ ކަމަށެވެ.
އަމާޒުވެފައިވާ ތުހުމަތުތަކާ މެދު ދެކެނީ ކިހިނެއްތޯ އޮޅުންފިލުވަން މިދިޔަ މަހު ނޫސްވެރިން ބާސެލޯނާގެ ކޯޗު ޒަވީ ހެނާންޑޭޒްއާ ކުރި ސުވާލަށް ޖަވާބުދެމުން އޭނާ ބުނީ އެއްވެސް އިރެއްގައި އެފަދަ ކަމެއް ހިނގާފައި އޮވެދާނެ ކަމަށް ގަބޫލުކުރަން ދަތި ކަމަށެވެ.
