ޕެރިސް (މާޗް 6) - މީގެ ހަ އަހަރު ކުރިން ބާސެލޯނާ ދޫކޮށް ދުނިޔޭގެ ރެކޯޑް އަގަކަށް، ބްރެޒިލްގެ ތަރި، ނޭމާ، ޕީއެސްޖީ އަށް ސޮއިކުރިއިރު، އެ ވަގުތު އޭނާ އަށް އެންމެ ރަނގަޅު ގޮތަކީ މެންޗެސްޓާ ސިޓީ އަށް ދިއުން ކަމަށް ބުނެ، ލަފާދިން ކަމަށް ނޭމާއާ އެކު ބާސެލޯނާ އަށް އޭރު ކުޅުނު އުރުގުއޭގެ ފޯވާޑް، ލުއިސް ސުއަރޭޒް ބުނެފި އެވެ.
ބާސެލޯނާ ދޫކޮށް، 2017 ވަނަ އަހަރު، ދުނިޔޭގެ ރެކޯޑް ފީއެއް ކަމަށްވާ 234 މިލިއަން ޑޮލަރަށް ޕީއެސްޖީ އަށް ސޮއިކުރި ނޭމާ މި ވަގުތު އެ ކްލަބާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ.
ޕީއެސްޖީން އަންނަނީ ނޭމާ ވިއްކާލަން ތައްޔާރުވަމުން ކަމަށް މީޑިއާ ރިޕޯޓްތައް ބުނާއިރު، ކްލަބަކުން އޭނާ އަށް ޝައުގުވެރިކަން ފާޅުނުކުރާ އެންމެ ބޮޑު ސަބަބަކީ ދޭން ޖެހޭ މުސާރަ ބޮޑުވުމެވެ.
ނޭމާއާ ބެހޭގޮތުން، ދިން އިންޓަވިއުއެއްގައި ސުއަރޭޒް ބުނީ ބާސެލޯނާ ދޫކޮށްލަން އުޅޭ ކަމުގެ އިޝާރާތެއް ނޭމާ ދިނުމާ އެެކީ ރަނގަޅު ގޮތަކީ ވިސްނުމަށް ފަހު އެންމެ ރަނގަޅު ގޮތެއް ނިންމުން ކަމަށް ބުނެ، ލަފާދިން ކަމަށެެވެ.
"އަހަރެން ދެކޭ ގޮތުގައި ނޭމާ ބާސެލޯނާގައި މަޑުކުރިނަމަ އޭނާ އަށް ބެލޮންޑިއޯ އެއް ލިބޭ ލެވަލަށް ކުޅެވޭނެ. އެހެންވެ، އަހަރެމެން އެދުނިން އޭރު އޭނާ ބާސެލޯނާގައި މަޑުކުރަން ވެސް، އެކަމަކު، ނޭ (ނޭމާ) ނިންމައިގެން ހުރީ ބާސެލޯނާ ދޫކޮށްލަން،" ސްޕެއިންގެ ނޫހަކަށް ދިން އިންޓަވިއުގައި ސުއަރޭޒް ބުންޏެވެ.
"ރަށްޓެއްސެއްގެ ވިސްނުމުގައި އޭނާ އަށް ދިން ލަފާއެއްގެ ގޮތުގައި އަހަރެން ބުނިން ޕީއެސްޖީ އަށް ވުރެ ރަނގަޅުވާނެއޭ ސިޓީ (މެންޗެސްޓާ ސިޓީ) އަށް ދާން. އެއީ އަހަރެންގެ ވިސްނުމުގައި އިންގްލެންޑްގެ ފުޓްބޯޅަ ހާއްސަކޮށް، ސިޓީގައި އެ ކުޅޭ ސްޓައިލުގެ ފުޓްބޯޅައިގައި ނޭމާގެ ފެންވަރު ދެއްކޭނެ،"
ޕީއެސްޖީ އަށް މިހާތަނަށް ކުޅެދިން 173 މެޗުން ނޭމާ ވަނީ އެ ޓީމަށް 118 ގޯލު ޖަހައިދީފަ އެވެ. ޕީއެސްޖީން ނޭމާ އަށް ބޮޑު އިންވެސްޓެއް ކޮށްގެން އެ ކްލަބަށް ސޮއިކުރުވި ސަބަބަކީ ޗެމްޕިއަންސް ލީގު ކާމިޔާބު ކުރުމެވެ. މީގެ ދެ އަހަރު ކުރިން ޕީއެސްޖީ ވަނީ ޗެމްޕިއަންސް ލީގުގެ ފައިނަލުގައި ބަޔާން މިއުނިކް އަތުން ބަލިވެފަ އެވެ.
މި ފަހަރުގެ ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގައި ޕީއެސްޖީ ވަނީ އަމިއްލަ ދަނޑުގައި ބަޔާން މިއުނިކް އަތުން ބަލިވެފަ އެވެ. އެ ގޮތުން، އަންނަ ހަފްތާގައި ބަޔާން ދަނޑުގައި ކުޅޭ ދެ ވަނަ ލެގުގެ މެޗަށް ވެސް ނޭމާ ފިޓްނުވާނެ އެވެ. ނޭމާ އަންނަނީ ފައިގެ ކުޑަހުޅަށް ލިބުނު އަނިޔާ އަކަށް ފަރުވާ ހޯދަމުންނެވެ.
