މިލާން (ފެބްރުއަރީ 23) - ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ފުރަތަމަ ލެގުގައި ފަހު ވަގުތު ރޮމެލޫ ލުކާކޫ ޖެހި ގޯލުން އިންޓަ މިލާނުން 1-0 އިން ޕޯޓޯ އަތުން މޮޅުވެއްޖެ އެވެ.
ރޭގެ މެޗު ޕޯޓޯ އިން ނިންމާލީ 78 ވަނަ މިނިޓްގައި އެ ޓީމުގެ މިޑްފީލްޑަރު، އޮޓާވިއޯ އަށް ދެ ވަނަ ރީނދޫ ކާޑާ އެކު ދެއްކި ރަތް ކާޑުގެ ސަބަބުން ކުޅުންތެރިއަކު މަދުކޮށެވެ.
ފުރަތަމަ ހާފުގައި އިންޓަ އަށް ލީޑުނަގައިދޭން އަލެސަންދްރޯ ބަސްޓޯނީ އަށް ލިބުނު ރަނުގެ ފުރުސަތުން އޭނާ ބޮލުން ޖެހި ބޯޅަ ޕޯޓޯ ގޯލުގައި ހުރި ޕޯޗުގީސް ކީޕަރު ޑިއޯގޯ ކޮސްޓާ ވަނީ މަތަކޮށްފަ އެވެ. ޕޯޓޯ އަށް ވެސް މެޗުގައި ލީޑުނަގަން ރަނގަޅު ދެ ފުރުސަަތެއް ލިބިގެންދިޔަ އެވެ. އެ ގޮތުން ޕޯޓޯގެ އިރާން ފޯވާޑް، މެހެދީ ތަރޭމީ އާއި ޒައިޑޫ ސަނޫސީ ފޮނުވާލި ހަމަލާތައް އިންޓަގެ ކީޕަރު އަންދްރޭ އޮނާނާ ވަނީ މަތަކޮށްފަ އެވެ.
އިންޓަ އިން ދެ ވަނަ ހާފްގެ ކުޅުން ފަށައިގެން 12 ވަރަކަށް މިނިޓް ފަހުން، އެޑިން ޖެކޯގެ ބަދަލުގައި ލުކާކޫ ކުޅެން އެރުވި އެވެ. އިންޓަ އިން ކުޅެމުންދިޔަ ގޭމަށް ފަސޭހަތަކެއް ލިބި ޕޯޓޯ އަށް ނުރައްކާ ކުރަން ފެށިއިރު، ޕޯޓޯގެ އޮޓާވިއޯ އަށް ވަނީ ރަތް ކާޑެއް ދައްކައިފަ އެވެ.
ޕޯޓޯގެ އެއް ކުޅުންތެރިއަކު މަދުވިތާ އަށް މިނިޓް ފަހުން، އިންޓަގެ ލުކާކޫ ވަނީ ގޯލެއް ޖަހައިފަ އެވެ. މިއީ އޭރިއާތެރެއަށް ހުރަސްވި ބޯޅައަކުން ލުކާކޫ ބޮލުން ޖެހި ބޯޅަ ދަނޑީގައި ޖެހިފައި ނުކުތް ވަގުތު ރީބައުންސް ބޯޅަ ގޯލަށް ވައްދާލައިގެން އޭނާ ޖެހި ގޯލެކެވެ.
ދެ ވަނަ ލެގުގައި ޕޯޓޯ ދަނޑުގައި ކުޅޭ މެޗު އޮންނާނީ އަންނަ މަހުގެ 14 ވަނަ ދުވަހު އެވެ. ޕޯޓޯގެ ކޯޗު ސާޖިއޯ ކޮންސެސާއޯ، މި މެޗަށް ޓީމު ރާވަން ޖެހޭނީ އޮޓާވިއޯ ނުލަ އެވެ. އެއީ އޭނާ މި މެޗަށް ސަސްޕެންޑްވާނެތީ އެވެ.
