ލިވަޕޫލް (ފެބްރުއަރީ 4) - އިނގިރޭސި ޕްރިމިއާ ލީގުގައި މިއަދު ކުޅުނު މެޗުން، އެވަޓަން އިން އާ ކޯޗު، ޝޯން ޑައިޝްގެ އިރުޝާދުގެ ދަށުން ކުޅުނު ފުރަތަމަ މެޗުގައި ލީގުގެ އެއް ވަނައިގައި އޮތް އާސެނަލް 1-0 އިން ބަލިކޮށް، ރެލިގޭޝަނުން ސަލާމަތްވުމުގެ އުންމީދު ދަމަހައްޓައިފި އެވެ.
މިއީ މިދިޔަ އަހަރުގެ އޮކްޓޫބަރު މަހުގެ ފަހުން އެވަޓަން އަށް ލީގުގައި ލިބުނު ފުރަތަމަ މޮޅެވެ. އެ ޓީމަށް ލީގުގައި މޮޅެއް މި ލިބުނީ އަށް މެޗަށް ފަހު އެވެ. މިއަދު އާސެނަލް މެޗަށް ނުކުތްއިރު، އެވަޓަން އޮތީ ލީގުގެ 19 ވަނައިގަ އެވެ. މި މޮޅާ އެކު އެ ޓީމު ވަނީ ލީގުގެ 17 ވަނަ އަށް ޖެހިލައިފަ އެވެ. އެއީ 21 މެޗުން 18 ޕޮއިންޓް ހޯދައިފަ އެވެ.
މިދިޔަ މަހު 23 ވަނަ ދުވަހު، އެވަޓަންގެ ކޯޗުކަމުން ފްރޭންކް ލަމްޕާޑް ވަކިކުރިއިރު، ޑައިޝް އަށް ދެ އަަހަރާއި ބައިގެ ކޮންޓްރެކްޓެއް އެވަޓަން އިން ވަނީ ދީފަ އެވެ. ޑައިޝް، ފުރަތަމަ މެޗަށް މި ނުކުތީ މަގާމާ ހަވާލުވިތާ ފަސް ވަރަކަށް ދުވަސް ފަހުންނެވެ.
ގުޑިސަން ޕާކުގައި މިއަދު ކުޅުނު މެޗު ފަށައިގެން ދެ ޓީމަށް ވެސް ގޯލު ޖަހަން ފުުރުސަތު ލިބުނެވެ. އެ ގޮތުން، ފުރަތަމަ ހާފުގައި އާސެނަލްގެ އެޑީ އެންކެޓިއޭ އަށް އެވަޓަން އޭރިއާތެރެއިން ހުސްކޮށް ލިބުނު ފުރުސަތުން ޖެހި ބޯޅަ ހުރަސްދަނޑިމަތިން ދިޔައިރު، އާސެނަލްގެ ބުކާޔޯ ސަކާ ޖެހި ބޯޅައެއް ގޯލު ރޮނގުމަތިން އެވަޓަންގެ ކޮނާ ކޯޑީ ވަނީ ބްލޮކްކޮށްފަ އެވެ.
ފުރަތަމަ ހާފުގައި އެވަޓަން އަށް ވެސް ގޯލެއް ޖަހަން ހުސް ފުރުސަތު ލިބުނެވެ. އެ ގޮތުން، އެވަޓަންގެ އަމަދޫ އޮނާނާ، ބޯޅަ ހިފައިގެން އޭރިއާތެރެއަށް ވަދެ، ހުރަސްކޮށްލި ބޯޅަ ޖަހަން އެރި އެ ޓީމުގެ ފޯވާޑް ޑޮމިނިކް ކަލްވެޓް-ލެވިން ފައިގައި ޖެހޭ ގޮތެއްނުވި އެވެ. އޭގެ ފަހުން، އެވަޓަންގެ ޑްވައިޓް މެކްނީލް ނެގި ހުރަހަކުން ހުސްކޮށް ޖަހަން އަރައި، އަބްދުﷲ ޑޮކޫރޭ ބޮލުން ޖެހި ބޯޅަ ދިޔައީ ބޭރުންނެވެ.
އެވަޓަން އިން މި މެޗުގައި ޖެހި ހަމައެކަނި ގޯލު ކާމިޔާބުކުރީ 60 ވަނަ މިނިޓްގަ އެވެ. މި ލަނޑު ޖެހީ މެކްނީލް ނެގި ކޯނަރަކުން ޖޭމްސް ޓާކޯސްކީ އެވެ. ޓާކޯސްކީ ބޮލުން މި ގޯލު ޖެހީ އާސެނަލްގެ ކުޅުންތެރިންގެ ތެރެއިން ލިބުނު ފުރުސަތަކުންނެވެ.
މެކްނީލް އާއި ޓާކޯސްކީ އަކީ އެވަޓަންގެ ކޯޗު ޑައިޝްއާ އެކު ބާންލީގައި މަސައްކަތްކުރި ދެ ކުޅުންތެރިންނެވެ.
ނަތީޖާ ހަމަހަމަކުރަން އާސެނަލުން ކުރި މަސައްކަތް ކާމިޔާބުނުވެ، ލީގުގައި 13 މެޗަށް ފަހު އެ ޓީމު ވަނީ ބަލިވެފަ އެވެ. އެވަޓަން ދަނޑުގައި އެންމެ ފަހުން ކުޅުނު ފަސް މެޗުން ވެސް އާސެނަލަށް މޮޅެއް ލިބިފައިނުވެ އެވެ. އެ ގޮތުން، ހަަތަރު މެޗުން ބަލިވިއިރު، އެއް މެޗުން ވަނީ އެއްވަރުވެފަ އެވެ.
މިއީ މި ފަހަރު ލީގުގައި އާސެނަލް ބަލިވި ދެ ވަނަ މެޗެވެ. ކުރިން ބަލިވީ ރަށުންބޭރުގައި މެންޗެސްޓާ ޔުނައިޓެޑް އަތުންނެވެ.
ލީގުގެ އެއް ވަނައިގައި އާސެނަލް މި ވަގުތު އޮތީ 20 މެޗުން 50 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ސިޓީ އަށް 20 މެޗުން 45 ޕޮއިންޓް ލިބިފައިވާއިރު، މާދަމާރޭ ޓޮޓެންހަމް ހޮޓްސްޕާސް އަތުން ސިޓީ މޮޅުވެއްޖެނަމަ، އާސެނަލާ ދެ ޕޮއިންޓާ ގާތަށް ޖެހިލެވޭނެ އެވެ.
