ރިޔާދު، ސައުދީ އަރަބިއްޔާ (ފެބްރުއަރީ 3) - ސައުދީ ޕްރޮފެޝަނަލް ލީގުގައި މިރޭ ކުޅުނު މެޗުން، އަލް ނަސްރުގެ ކެޕްޓަން، ކްރިސްޓިއާނޯ ރޮނާލްޑޯ މެޗުގެ އިތުރު ވަގުތުގައި ވައްދާލި ޕެނަލްޓީން 2-2 އިން އެއްވަރުކޮށް، އަލް ފަތޭހް އަތުން ބަލިނުވެ، އަލް ނަސްރު ސަލާމަތްވެއްޖެ އެވެ.
މިއީ، ދުނިޔޭގެ އެންމެ މުސާރަ ބޮޑު ފުޓްބޯޅަ ކުޅުންތެރިޔާގެ ގޮތުގައި އަލް ނަސްރަށް ބަދަލުވުމަށް ފަހު، އެ ޓީމުގެ ޖޯޒީގައި ރޮނާލްޑޯ، 37، ކުޅުނު ތިން މެޗުގެ ތެރެއިން ޖެހި ފުރަތަމަ ގޯލެވެ.
އަލް ފަތޭހު އެފްސީގެ ދަނޑުގައި މިރޭ ކުޅުނު މެޗުގެ 12 ވަނަ މިނިޓްގައި އެ ޓީމަށް ލީޑުނަގައިދިނީ ކްރިސްޓިއަން ޓެލޯ އެވެ. ބާސެލޯނާ އަށް ކުރިން ކުޅުނު ޓެލޯ މި ގޯލު ޖެހީ އޭރިއާ ބޭރުން ވޮލީ އަކުން ގޯލުގެ ދުރު ކަނަށް ބޯޅަ އަމާޒުކޮށްލައިގެންނެވެ.
އޭގެ ފަހުން، ރޮނާލްޑޯ، ފުރަތަމަ ހާފުގައި ޖެހި އެއް ގޯލު އޮފްސައިޑް ކަމަށް ނިންމިއިރު، ރީބައުންސް ބޯޅަ އަކުން ހުސްކޮށް ލިބުނު ފުރުސަތުން އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ. މެޗުގެ 42 ވަނަ މިނިޓްގައި އަލް ނަސްރަށް އެއްވަރުކޮށްދިނީ ބްރެޒިލްގެ އެންޑަސަން ޓަލިސްކާ އެވެ. އޭރިއާތެރެއިން ޓަލިސްކާ އަށް ލިބުނު ފުރުސަތުން ވަނީ ގޯލަށް ބޯޅަ ވައްދާލައިފަ އެވެ.
އަލް ނަސްރަށް މެޗުގެ އިތުރު ވަގުތުގައި ޕެނަލްޓީ ޖަހައިދިނުމަށް ފަހު ރޮނާލްޑޯ ބޯޅަ ހިފައިގެންދަނީ.
އަލް ފަތޭހުން ދެ ވަނަ ފަހަރަށް ލީޑުނެގީ މެޗުގެ 58 ވަނަ މިނިޓްގައި ސޯފިއަން ބަންޑޭޭބްކާ ޖެހި ގޯލުންނެވެ. މިއީ އޭރިއާތެެރެއަށް ހުރަސްވި ބޯޅައަކުން އެއް ފަހަރުން ގޯލުގެ މަތީ ދާގަނޑަށް އަމާޒުކޮށްލައިގެން ބަންޑޭބްކާ ޖެހި ގޯލެކެވެ.
އަލް ނަސްރު ބަލިވާން ދަނިކޮށް، އިތުރު ވަގުުތުގެ ދެ ވަނަ މިނިޓްގައި ޕެނަލްޓީ އަކުން ރޮނާލްޑޯ ވަނީ އެ ޓީމަށް އެއްވަރުކޮށްދީފަ އެެވެ. މިއީ ރޮނާލްޑޯ އަށް ކުރި ފައުލަކަށް ދިން ޕެނަލްޓީ އެކެވެ. އަލް ނަސްރުން މެޗު ނިންމާލީ ކުޅުންތެރިއަކު މަދުކޮށެވެ. އެއީ ޓަލިސްކާ ކުރި ނުރައްކާތެރި ފައުލަކަށް ސީދާ ރަތް ކާޑެއް ދެއްކުމުންނެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ނިންމީ ރަތެއް ކަމަށެވެ.
ސައުދީ ސުޕަ ކަޕްގެ ސެމީން އަލް ނަސްރު ކެޓި ނަމަވެސް، ޕްރޮފެޝަނަލް ލީގުގެ އެއް ވަނައިގައި އޮތީ އަލް ނަސްރު އެވެ. ސޯޅަ ޓީމު ވާދަކުރާ ލީގުގެ އެންމެ ކުރީގައި އަލް ނަސްރު އޮތީ 15 މެޗުން 34 ޕޮއިންޓް ހޯދައިގެންނެވެ. ދެ ވަނައިގައި އޮތް އަލް ޝަބާބަށް ވެސް ވަނީ 34 ޕޮއިންޓް ލިބިފަ އެވެ. އެކަމަކު، އެއީ 16 މެޗު ކުޅެގެންނެވެ. ތިން ވަނައިގައި އަލް ހިލާލް އޮތީ 15 މެޗުން 32 ޕޮއިންޓް ހޯދައިގެންނެވެ.
