ފަސް ސްކޫލާ އެކު ހަތް ވަނަ އިންޓަ ސްކޫލް ކްރިކެޓް މުބާރާތް އަންނަ މަހު ފަށަން ތައްޔާރުވެއްޖެ އެވެ.
ފެބްރުއަރީ 4-11 އަށް އޮންނަ މުބާރާތުގެ ފިރިހެން ބައިގައި މިފަހަރު ކުޅޭނީ ދެ އުމުރުފުރާ އެކެވެ. އެއީ 13 އަހަރުން ދަށާއި، 17 އަހަރުން ދަށެވެ. އެ ގޮތުން، 17 އަހަރުން ދަށުގެ އުމުރުފުރާގައި ހަތަރު ސްކޫލުން ކުޅޭއިރު 13 އަހަރުން ދަށުގެ އުމުރުފުރާގައި ކުޅެނީ ތިން ސްކޫލަކުންނެވެ.
ސަތާރަ އަހަރުން ދަށުގެ އުމުރުފުރާގައި ކުޅޭ ހަތަރު ސްކޫލަކީ ތާޖުއްދީން ސްކޫލް، ޖަމާލުއްދީން ސްކޫލް، ރެހެންދި ސްކޫލް އަދި މުހިއްދީން ސްކޫލެވެ. ކެޓަގަރީ ތަކަށް ބަލާއިރު، 13 އަހަރުން ދަށުގައި ވާދަކުރަނީ ތާޖުއްދީން، މުހިއްދީން އަދި ބިލަބޮންގ ހައި އިންޓަނޭޝަނަލް ސްކޫލެވެ.
ފިރިހެން ކުދިންގެ ބައި ކުރިއަށްދާނީ ލީގު އުސޫލުން ކުޅެ ކުރި ހޯދާ ދެ ޓީމު ފައިނަލް ކުޅޭ ގޮތަށެވެ. އެ ގޮތުން، 17 އަހަރުން ދަށުގެ މެޗުތައް ކުޅޭނީ 12 އޯވަރަށެވެ. އަދި 13 އަހަރުން ދަށުގެ މެޗުތައް ކުޅޭނީ 10 އޯވަރަށެވެ. ފައިނަލު މެޗުގެ އޯވަރުތައް ހަަމަވާއިރު ނަތީޖާ އެއްވަރުވެއްޖެ ނަމަ އިތުރަށް ދެ އޯވަރު ކުޅޭނެ އެވެ.
މުބާރާތުގެ އަންހެން ބައިގައި ވާދަކުރަނީ ދެ ސްކޫލެކެވެ. އެއީ ރެހެންދި ސްކޫލާއި ތަޖުއްދީން ސްކޫލެވެ. މި ދެ ޓީމްގެ މެޗުގައި ޗެމްޕިއަންކަން ހޮވުމަށް "ބިގް މެޗު"ގެ ނަމުގައި ކުޅެނީ ފައިނަލެކެވެ.
މާލެ ސަރައްދުގެ އިންޓަ ސްކޫލް މުބާރާތް މި ބާއްވަނީ ތިން އަހަރުގެ މެދުކެނޑުމަކަށް ފަހު އެވެ. އެންމެ ފަހުން މާލެ ސަރަހައްދުގައި ސްކޫލް މުބާރާތް ބޭއްވީ 2020 ގަ އެވެ.
ކޮވިޑް-19 އަށްފަހު ބޭއްވި އިންޓަ ސްކޫލް ފުރަތަމަ ކްރިކެޓް މުބާރާތަކީ ފުވައްމުލަކުގައި މިދިޔަ އަހަރު ބޭއްވި އެ ސަރަހައްދުގެ ކްރިކެޓް މުބާރާތެވެ. އެ މުބާރާތުގައި ފުވައްމުލަކުގެ 5 ސްކޫލަކުން ވާދަކުރި އެވެ.
