ލަންޑަން (ޖެނުއަރީ 31) - ރެލިގޭޝަންގެ ބިރުބޮޑުވެފައިވާ އެވަޓަންގެ ކޯޗަކަށް ބާންލީގެ ކުރީގެ ކޯޗު ޝޯން ޑައިޝް ހަމަޖައްސައިފި އެވެ.
ޑައިޝް، އެވަޓަންގެ ކޯޗަކަށް މި ހަމަޖެއްސީ އެ ޓީމުގެ ކޯޗު މަގާމުގައި އަހަރެއް ނުވަނީސް ފްރޭންކް ލަމްޕާޑް އެ މަގާމުން ވަކިކުރުމަށް ފަހު އެވެ. އެވަޓަން އިން ވަނީ ޑައިޝް ގެނައުމުގެ ކުރިން، އެހެން ކޯޗުންނާ ވެސް ވާހަކަ ދައްކައިފަ އެވެ. އެ ގޮތުން، އެންމެ ބޮޑަށް މަސައްކަތް ކުރީ، މީގެ ކުރިން ލީޑްސް ޔުނައިޓެޑްގެ ކޯޗަކަށް ހުރި މާސެލޯ ބިއެލްސާއާ ޓީމު ހަވާލުކުރެވޭތޯ އެވެ.
ބާންލީގެ ކޯޗެއްގެ ގޮތުގައި 10 އަހަރު ހޭދަކުރި ޑައިޝް ،51، އެވަޓަންގެ ކޯޗުކަމާ ހަވާލުވިއިރު، އެ ޓީމު ތާވަލްގެ ފުލުން ދެ ވަނައިގައެވެ. އެވަޓަން، އަށް ވަނީ 1954 ވަނަ އަހަރުގެ ފަހުން ފުރަތަމަ ފަހަރަށް، އިނގިރޭސި ފުޓްބޯޅައިގެ އެންމެ މަތީ ޑިވިޝަނުން ރެލިގޭޓްވުމުގެ ބިރު ބޮޑުވެފަ އެވެ.
ދެ އަހަރާއި ބައިގެ އެއްބަސްވުމެއް ހެދި ޑައިޝްގެ އިރުޝާދުގެ ދަށުން އެވަޓަން ކުޅޭ ފުރަތަމަ މެޗަކަށް ވާނީ ލީގުގައި ހޮނިހިރު ދުވަހު އަމިއްލަ ދަނޑުގައި އާސެނަލްއާ ދެކޮޅަށް ކުޅޭ މެޗެވެ.
ޑައިޝް ބުނީ އެވަޓަން ރެލިގޭޝަނުން ސަލާމަތްކުރުމަކީ ބޮޑު ޗެލެންޖެއްކަން އެނގޭ ކަމަށެވެ. އެކަމަކު، އޭނާ ބޭނުންވަނީ ވެސް މި ކަހަލަ ޗެލެންޖަކާ ކުރިމަތިލައިގެން، ކާމިޔާބު ހޯދަން ކަމަށް ޑައިޝް ވަނީ ބުނެފަ އެވެ.
"ކުރިއަށް ވިސްނާއިރު މި ކްލަބުގައި އެބަހުރި ބަދަލުކުރަންޖެހޭ ކަންތައްތައް. އަހަރަމެން ބޭނުންވާ ގޮތަށް ޓީމު ބައްޓަންކުރަން އެބަޖެހޭ،" ޑައިޝް ބުންޏެވެ.
ޑައިޝް ބުނީ އޭނާގެ އަމާޒަކީ ހިތްވަރުކޮށް، ކެނޑިނޭޅި މަސައްކަތްކުރާ ޓީމަކަށް އެވަޓަން ބަދަލުކޮށްލުން ކަމަށެވެ.
ޗެލްސީގެ ކުރީގެ ކޯޗު ލަމްޕާޑް މަގާމުން ވަކިކުރީ ޕްރިމިއާ ލީގުގައި ކުޅުނު 12 މެޗުގެ ތެރެއިން ނުވަ މެޗުން އެވަޓަން ބަލިވުމާ ގުޅިގެންނެވެ.
