މެންޗެސްޓާ (ޖެނުއަރީ 28) - އިނގިރޭސި އެފްއޭ ކަޕްގެ ހަތަރު ވަނަ ބުުރުގައި ރޭ މެންޗެސްޓާ ސިޓީ އަތުން 1-0 އިން ބަލިވެ، އާސެނަލް މުބާރާތުން ކަޓައިފި އެވެ.
އެފްއޭ ކަޕްގައި މި ދެ ޓީމުގެ ކުރިމަތިލުމުން ސިޓީ ކުރިހޯދި ނަމަވެސް، އިނގިރޭސި ޕްރިމިއާ ލީގުގެ ތަށްޓަށް ވާދަކުރާ ރޭހުގައި މި ވަގުތު ލީޑުގައި އޮތީ އާސެނަލް އެވެ. އެއީ ދެ ވަނައިގައި އޮތް ސިޓީ އަށް ވުރެ އެއް މެޗުން މަދުން ކުޅެގެން، އެއް ވަނައިގައި ފަސް ޕޮއިންޓުގެ ލީޑަކާ އެކު އެވެ. ކުރިއަށް އޮތް ތިން މަހުގެ ތެރޭގައި އާސެނަލާއި ސިޓީން ލީގުގައި ދެ ފަހަރެއްގެ މަތިން ބައްދަލުކުރާނެ އެވެ.
ސިޓީގެ އިއްތިހާދު ސްޓޭޑިއަމްގައި ރޭ ކުޅުނު މެޗުގައި އާސެނަލަށް ލީޑުނަގައިދޭން ފުރަތަމަ ހާފުގައި ޓަކެހީރޯ ޓޮމިޔާސޫ އާއި ލެއަންޑްރޯ ޓްރޮސާޑް ޖެހި ބޯޅަތައް ސިޓީގެ ކީޕަރު ސްޓެފަން އޯޓޭގާ ވަނީ މަތަކޮށްފަ އެވެ. ސިޓީގެ ފޯވާޑް އާލިން ބްރައުޓް ހާލަންޑަށް ލިބޭ ބޯޅަތައް މަދުކުރަން އާސެނަލްގެ ޑިފެންސް ލައިނުން ރަނގަޅު ކުޅުމެއް ދެއްކި މި މެޗުގައި، ސިޓީގެ ކެވިން ޑިބްރޭނާ ފުރަތަމަ ހާފުގައި އޭރިއާބޭރުން ޖެހި ބޯޅަ ދިޔައީ ދަނޑިކައިރިން ބޭރުންނެވެ.
މެޗުގައި ފެނިގެންދިޔަ ހަމައެކަނި ގޯލު ސިޓީ އަށް 64 ވަނަ މިނިޓްގައި ޖަހައިިދިނީ ނޭތަން އަކޭ އެވެ. ސިޓީގެ ހޫލިއަން އަލްވަރޭޒް އޭރިއާބޭރުން ޖެހި ބާރު ބޯޅަ ދަނޑީގައި ޖެހިފައި އޭރިއާތެެރެއިން ސިޓީގެ ޖެކް ގްރީލިޝް އަށް ލިބުމުން އޭނާ އެ ބޯޅަ ހިފަހައްޓައިފައި ދިނީ ހުސްކޮށް، އެރި އަކޭ އަށެވެ. އަކޭ ވަނީ ހަަމަޖެހިލައިފައި ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
އާސެނަލްގެ ކޯޗު މިކޭލް އާޓެޓާ ބުނީ މި މެޗުން ބަލިވުން ބަލައިނުގަނެވޭނެ ކަމަށާއި މިއީ މޮޅުވެވޭނެ މެޗެއް ކަމަށެވެ. ސިޓީގެ ކޯޗު ޕެޕް ގާޑިއޯލާ ބުނީ ނަތީޖާއާ މެދު ހިތްހަމަޖެހޭ ކަމަށާއި ފޯމުގައި އޮތް ޓީމާ ދެކޮޅަށް ހަނި ފަރަގަކުން ވިޔަސް ނަތީޖާ ނެރެވޭނީ ވަރަށް ރަނގަޅަށް މަސައްކަތްކޮށްގެން ކަމަށެވެ. އަދި ސިޓީގެ ފަރާތުން މި މެޗުގައި އެކަން ވަރަށް ރަނގަޅަށް ފެނުނު ކަމަށް ގާޑިއޯލާ ވަނީ ބުނެފަ އެވެ.
އިނގިރޭސި ޕްރިމިއާ ލީގުގައި މިހާރު އޮތްގޮތުން އާސެނަލާއި ސިޓީން 15 ފެބްރުއަރީ އާއި 26 އޭޕްރީލްގައި ބައްދަލުކުރާނެ އެވެ.
