ލަންޑަން (ޖެނުއަރީ 24) - އިނގިރޭސި ޕްރިމިއާ ލީގުގައި ރޭ ފުލަމްއާ ދެކޮޅަށް ކުޅުނު މެޗުގައި ޓޮޓެންހަމް ހޮޓްސްޕާސްގެ ހެރީ ކޭން ކާމިޔާބުކުރި އެ ކްލަބްގެ ރެކޯޑަކާ ހަމަކުރި ގޯލުން 1-0 އިން މޮޅުވެ، ޓޮޓެންހަމް އިން ހަމަޖެހުމެއް ހޯދައިފި އެވެ.
މިއީ ލީގުގައި އެންމެ ފަހުން ޓޮޓެންހަމް ކުޅުނު ހަ މެޗުގެ ތެރެއިން މޮޅުވި ދެ ވަނަ ފަހަރެވެ. މި މެޗުގެ ކުރިން ޓޮޓެންހަމް ލީގުގައި ކުޅުނު ދެ މެޗުން ވެސް ވަނީ ބަލިވެފަ އެވެ. އެއީ އާސެނަލާއި މެންޗެސްޓާ ސިޓީ އަތުންނެވެ.
މި މެޗުގައި ކޭން ޖެހި ގޯލާ އެކު، އޭނާ ވަނީ ޓޮޓެންހަމަށް އެންމެ ގިނަ ގޯލު ޖަހައިދީގެން ޖިމީ ރީވްސް ހަދާފައިވާ ރެކޯޑާ ހަމަކޮށްފަ އެވެ. ރީވްސް ވަނީ 1961-1970 އަށް ޓޮޓެންހަމް އަށް ކުޅުނުއިރު، 266 ގޯލު ޖަހައިފަ އެވެ. ކޭން އެ ރެކޯޑާ ހަމަކުރިއިރު، އޭނާ ވަނީ ލީގުގައި އެކަނި ޓޮޓެންހަމް އަށް 199 ގޯލު ޖަހައިދީފަ އެވެ.
ފުލަމްގެ ކްރޭވަން ކޮޓޭޖްގައި ރޭ ކުޅުނު މެޗު ފެށުން 15 މިނިޓަށް ލަސްވި އެވެ. އެއީ މެޗަށް ޓީމުތައް އައިއިރު، ދިމާވި ޓްރާންސްފޯޓްގެ މައްސަލައެއްގެ ސަބަބުން އައި ލަސްކަމެކެވެ. މެޗު ފަށައިގެން، ފުލަމް އިން ވަރަށް ބޮޑަށް ކުރިއަށް ޖެހިގެން ކުޅުނުއިރު، ޓޮޓެންހަމް އިން ދިޔައީ ކައުންޓަ އެޓޭކުގައި ފުލަމްގެ ޑިފެންސަށް ނުރައްކާ ކުރަމުންނެވެ.
މެޗުގެ ކުރީކޮޅުގައި ފުލަމްގެ ވިލިއަން ޖެހި ބޯޅައެއް ޓޮޓެންހަމްގެ ކީޕަރު ހޫގޯ ލޮރިސް ވަނީ މަތަކޮށްފަ އެވެ. އަދި ފަހުން، ފުލަމްގެ ވިންގް، ބޮބީ ޑިކޯޑޯވާ-ރީޑް އޭރިއާބޭރުން ޖެހި ބޯޅައެއް ވެސް ކީޕަރު ލޮރިސް ވަނީ ހުއްޓުވައިފަ އެވެ.
ޓޮޓެންހަމް އިން މި މެޗުގައި ޖެހި ހަމައެކަނި ލަނޑު ކާމިޔާބުކުރީ ފުރަތަމަ ހާފުގެ އިތުރު ވަގުތުގަ އެވެ. ޓޮޓެންހަމްގެ ސޮން ހެއުން މިން ދިން ބޯޅައެއް ކޮންޓްރޯލް ކުރުމަށް ފަހު، އޭރިއާ ރޮނގުކައިރިން ކުޑަ ޖާގައެއް ހޯދައި، ކޭން ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި ޓޮޓެންހަމްގެ ލީޑުފުޅާކުރަން ކޭން އަށް ރަނުގެ ފުރުސަތެއް ލިބުނެވެ. އެ ގޮތުން، ކުޑައޭރިއާ ރޮނގުމަތިން ކޭން ބޮލުން ފޮނުވާލި ބޯޅަ ފުލަމްގެ ކީޕަރު ބާން ލޭނޯ ވަނީ މަތަކޮށްފަ އެވެ.
ބަދަލުތަކެއް ގެނެސްގެން ފުލަމް އިން ނަތީޖާ ހަމަހަމަކުރެވޭތޯ މަަސައްކަތް ކުރި އެވެ. އެކަމަކު، ޓޮޓެންހަމްގެ ޑިފެންސް ލައިން މި މެޗުގައި ފެނުނީ އެންމެ ފަހުން މެޗުތަކުގައި ފެނުނު ވަރަށް ވުރެ ރަނގަޅަށެވެ. އޭރިއާތެރެއިން ލިބުނު ޖާގައެއްގައި ފުލަމްގެ ސާބިއާ ފޯވާޑް، އަލެކްސަންޑަ މިޓްރޮވިޗް ޖެހި ޝޮޓް ދިޔައީ އަރިމަތިން ބޭރުންނެވެ.
ޓޮޓެންހަމް އިން މި ވަނީ އެންމެ ފަހުން ލީގުގައި ފުލަމް ދަނޑުގައި ކުޅުނު ހަތް މެޗުން ވެސް މޮޅުވެފަ އެވެ. ރޭގެ މޮޅާ އެކު ޓޮޓެންހަމް ލީގުގެ ފަސް ވަނައިގައި އޮތީ 21 މެޗުން 36 ޕޮއިންޓާ އެކު އެވެ. އެއީ ހަތަރު ވަނައިގައި އޮތް މެންޗެސްޓާ ޔުނައިޓެޑަށް ވުރެ ތިން ޕޮއިންޓް މަދުން ހޯދައިގެންނެވެ. ޔުނައިޓެޑަށް ވަނީ 20 މެޗުން 39 ޕޮއިންޓް ލިބިފަ އެވެ.
