މެޑްރިޑް (ޖެނުއަރީ 19) - ބާސެލޯނާ އަށް ކުޅެމުން އަންނަ ނެދަލެންޑްސްގެ ފޯވާޑް، މެމްފިސް ޑިޕާއި އެތުލެޓިކޯ މެޑްރިޑަށް ބަދަލުވުމަށް އެއްބަސްވުމަކަށް އަތުވެފައިވާ ކަމަށް ބާސެލޯނާގެ އޮފިޝަލަކު މީޑިއާ އަށް ކަށަވަރުކޮށްދީފި އެވެ.
ޑިޕާއި، 28، އެތުލެޓިކޯ އަށް ބަދަލުވާނީ ޖުމްލަ އެކު، ފަސް މިލިއަން ޑޮލަރުގެ ޑީލެއްގައި ކަމަށް ސްޕެއިންގެ ނޫސްތަކުން ވަނީ ރިޕޯޓްކޮށްފަ އެވެ. ޑިޕާއި، އެތުލެޓިކޯއާ އެކު ސޮއިކުރާނީ 2025 ވަނަ އަހަރުގެ ޖޫން މަހުގެ ނިޔަލަށް ހަދާފައިވާ ކޮންޓްރެކްޓެއްގަ އެވެ.
މީގެ ދެ އަހަރު ކުރިން، 2021 ވަނަ އަހަރު، ފްރާންސްގެ ލިޔޯން ދޫކޮށް ހިލޭ ޓްރާންސްފާއެއްގައި ބާސެލޯނާ އަށް ބަދަލުވި ޑިޕާއި އަށް މި ސީޒަނުގައި އަނިޔާގެ ސަބަބުން ޓީމުގެ ފުރަތަމަ އެގާރައިގައި ކުޅުމުގެ ފުރުސަތު މާގިނައިން ނުލިބެ އެވެ.
މިދިޔަ އޮކްޓޫބަރާއި ނޮވެމްބަރު މަހު، ފަލަމަސްގަނޑަށް ލިބުނު އަނިޔާއަކާ ހެދި ކުޅުމާ ދުރަށް ދާން ޖެހުނު ޑިޕާއި، ނޮވެމްބަރާއި ޑިސެމްބަރުގައި ކުރިއަށްދިޔަ ފީފާ ވޯލްޑް ކަޕްގައި ވެސް ކުޅެން ޖެހުނީ ފިޓްނަސްގެ މައްސަލަަތަކާ އެކުގަ އެވެ.
މި ސީޒަނުގައި ޑިޕާއި، މިހާތަނަށް ކުޅުނު ހަތަރު މެޗުން ވަނީ ގޯލެއް ޖަހައިފަ އެވެ. މިދިޔަ ސީޒަނުގައި އޭނާ ވަނީ 38 މެޗުން 13 ގޯލު ޖަހައި، ދެ ލަނޑު ޖަހަން ފުރުސަތު ތަނަވަސްކޮށްދީފަ އެވެ.
މީގެ ކުރިން މެންޗެސްޓާ ޔުނައިޓެޑާއި ޕީއެސްވީ އައިންދޯވަން އަށް ކުޅުނު ޑިޕާއި، އެތުލެޓިކޯ އަށް ބަދަލުވުމާ އެކު އެ ޓީމަށް ކުޅެމުން އަންނަ ބެލްޖިއަމްގެ ވިންގް، ޔަނިކް ކަރާސްކޯގެ މުސްތަގުބަލާ މެދު ވަނީ ސުވާލު އުފެދިފަ އެވެ. ރިޕޯޓްތައް ބުނާގޮތުން ކަރާސްކޯ ހުރީ ބާސެލޯނާގެ ހުށަހެޅުމެއްގެ އިންތިޒާރުގަ އެވެ.
