ލަންޑަން (ޖެނުއަރީ 15) - އިނގިރޭސި ޕްރިމިއާ ލީގުގައި މިރޭ އާސެނަލް އާއި ޓޮޓޭންހަމް ހޮޓްސްޕާސް ކުރިމަތިލާއިރު، މިއީ ތާވަލްގެ އެއް ވަނައިގައި އޮތް އާސެނަލް ލީގު ޗެމްޕިއަންކަން ހޯދުމަށް ކުރާ މަސައްކަތުގައި މުހިންމު މެޗެކެވެ.
އުތުރު ލަންޑަނަށް ނިސްބަތްވާ އާސެނަލް އާއި ޓޮޓެންހަމް މިރޭ ކުރިމަތިލާއިރު، އާސެނަލް ތާވަލްގެ އެއްވަނައިގައި އޮތީ 44 ޕޮއިންޓާއެކު އެވެ. ދެހާސް ހަތަރު ވަނަ އަހަރުގެ ފަހުން ފުރަތަމަ ފަހަރަށް ލީގު ޗެމްޕިއަންކަން ހޯދުމަށް އަމާޒު ހިފާފައިވާ އާސެނަލް އޮތީ، މި ވަގުތު ތާވަލްގެ ދެ ވަަނައި އޮތް މެންޗެސްޓާ ސިޓީ އަށް ވުރެ ފަސް ޕޮއިންޓް ކުރީގަ އެވެ.
ޓޮޓެންހަމް ތާވަލްގެ ފަސް ވަނައިގައި އޮތީ 33 ޕޮއިންޓާއެކު އެެވެ. ޓޮޓެންހަމްގެ ވިސްނުމަކީ އަމިއްލަ ދަނޑުގައި އާސެނަލް އަތުން ޖެހިޖެހިގެން ފަސް މޮޅު ހޯދުމެވެ.
މެޗުގެ ކުރިން އާސެނަލްގެ ކޯޗު މިކޭލް އާޓެޓާ ބުނީ އާސެނަލް އޮތީ ރަނގަޅު ހާލަތެއްގައި ކަމަށެވެ.
"އާސެނަލްގެ ކުޅުންތެރިން ތިބީ ރަނގަޅު ހާލަތެއްގައި. މި ހިސާބަށް މި އާދެވުނީ ވަރަށް މަސައްކަތުން. އަހަރަމެން ދެން އަމާޒު ހިފާނީ ކުރިއަށްވުރެ ރަނގަޅުކުރަން. އަދި މިހާތަނަށް ރަނގަޅަށް ކުރަމުންއައި ކަންތައްތައް ދެމެހެއްޓުން،" އާޓެޓާ ބުންޏެވެ.
އާސެނަލް ޕްރިމިއާ ލީގުގައި ބަލިނުވެ 11 މެޗު ވަނީ ހަމަކޮށްފަ އެވެ. އެންމެ ފަހުން ޓޮޓެންހަމް ކުޅުނު 11 މެޗުގެ ތެރެއިން ފަސް މެޗުން ވަނީ ބަލިވެފަ އެވެ.
ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނީ ތާވަލްގެ އެއް ވަނައިގައި އޮތުމުން އާސެނަލް އަކީ ފޭވަރިޓުން ކަމަށެވެ. އަދި މި މެޗަށް ނުކުންނައިރު، އާސެނަލް އަށް އެ ޓީމުގެ ފެންވަރު ދެއްކުމަށް ޕްރެޝަރު ބޮޑުވާނެ ކަމަށެވެ.
"އާސެނަލް ތާވަލްގެ އެއް ވަނައިގައި އޮތުމުން، ހުރިހާ ޓީމެއް ވެސް މަސައްކަތް ކުރާނީ އާސެނަލް ބަލިކުރަން. މި ދަނޑިވަޅުގައި އެ ޓީމުން ސާބިތުކޮށްދޭންޖެހޭ ހައްގު މަގާމުގައިކަން އެ ޓީމު އޮތީ،" ކޮންޓޭ ބުންޏެވެ.
އާސެނަލުން އެންމެ ފަހުން، ލީގު ސީޒަނެއްގައި ދެ މެޗުން ވެސް ޓޮޓެންހަމް އަތުން މޮޅުވެފައިވަނީ މީގެ ނުވަ އަހަރު ކުރިން، 2013-2014 ވަަނަ ސީޒަނުގަ އެވެ. އަނެއްކޮޅުން، ޓޮޓެންހަމް ވަނީ އެންމެ ފަހުން ލީގުގައި އަމިއްލަ ދަނޑުގައި ކުޅުނު ހަތަރު މެޗުގެ ތެރެއިން ތިން މެޗުން ބަލިވެފަ އެވެ. ޓޮޓެންހަމްގެ ކޯޗު ކޮންޓޭ، ކެރިއަރުގައި އާސެނަލާ ދެކޮޅަށް ނުކުތް 10 މެޗުގެ ތެރެއިން މޮޅުވީ ދެ މެޗުންނެވެ.
ޓޮޓެންހަމާއި އާސެނަލް ކުޅޭ މެޗު ފަށާނީ މިރޭ ރާއްޖެ ގަޑިން 21:30 ގަ އެވެ.
