ޕެރިސް (ޖެނުއަރީ 12) - ފްރާންސްގެ ކުރީގެ ކެޕްޓަން ޒިނެދީން ޒިދާނަށް އިހުތިރާމް ކުޑަކޮށް ފްރާންސްގެ ފުޓްބޯލް ފެޑަރޭޝަން (އެފްއެފްއެފް)ގެ ރައީސް, ނޮއެލް ލަ ގްރައެޓް ދެއްކެވި ވާހަކަތަކާ ގުޅިގެން، އޭނާ މަގާމުން ސަސްޕެންޑްކޮށްފި އެވެ.
ލަ ގްރައެޓް، ސަސްޕެންޑްކުރަން ނިންމީ އިއްޔެ ބޭއްވި އެފްއެފްއެފްގެ ކުއްލި ބައްދަލުވުމަކަށް ފަހު، ބޯޑުގެ ހުރިހާ މެމްބަރުންގެ އިއްތިފާގުންނެވެ.
އެފްއެފްއެފްގެ ބައްދަލުވުމަށް ފަހު، އާންމުކުރި ބަޔާނެއްގައި ބުނެފައިވަނީ ފްރާންސްގެ ކުޅިވަރާބެހޭ މިނިސްޓްރީން ބަލަމުން އަންނަ ލަ ގްރައެޓްގެ މައްސަލައެއްގެ ސަބަބުން މަގާމުން އޭނާ އެކަހެރި ކޮށްފައިވާ ކަމަށެވެ. އަދި އަލުން މަގާމަށް ގެނައުމާ މެދު ގޮތެއް ނިންމާނީ، ސްޕޯޓްސް މިނިސްޓްރީން ބަލަމުން އަންނަ މައްސަލައިގައި ގޮތެއް ނިމުމުންނެވެ.
ފްރާންސް ފުޓްބޯޅަ ރައީސްގެ މަގާމުގައި 2024 ގެ ނިޔަލަށް ހުރި ލަ ގްރައެޓް، އަށް ޕްރެޝަރު ބޮޑުވީ ދާދި ފަހުން ދިން މީޑިއާ އިންޓަވިއުއެއްގައި ފްރާންސްގެ ފުޓްބޯޅަ ލެޖެންޑް ޒިނެދިން ޒިދާނަށް އިހުތިރާމް ކުޑަކޮށް ވާހަަކަ ދެއްކުމުންނެވެ. އެކަމާ ހެދި ފްރާންސްގެ ކުޅުންތެރިންނާއި ސަޕޯޓަރުންގެ ރުޅިގަނޑު ފަޅައިގެން ގޮސް، ލަ ގްރައެޓް މަގާމުން ވަކިކުރަން ގޮވާ އަޑުތައް ގަދަވާން ފެށި އެވެ.
ފްރާންސްގެ ރެޑިއޯ ސްޓޭޝަނަކުން ސުވާލުކުރުމުން، އެފްއެފްއެފްގެ ރައީސް ލަ ގްރައެޓް ވިދާޅުވީ "ޒިޔާން ގުޅިޔަސް ފޯނަށް ޖަވާބު ނުދޭނެ،" ކަމަށެވެ. އަދި ޒިދާނަކީ ފްރާންސްގެ ޓީމަށް އެކަށީގެންވާ ކޯޗެއް ނޫން ކަމަށް އޭނާ ސިފަކުރެއްވި އެވެ. "އަަހަރެން ފޯނުވެސް ނުގާނަން. އަހަރެން އޭނާ އަށް ކީއޭ ކިޔާފަ ޖަވާބު ދޭނީ؟ އަހަރެން ބުނަންވީ އަހަރަމެން ޑިޑިއޭ (ޑެޝޯމްޕްސް)ގެ ކޮންޓުރެކްޓް އާކޮށްފީމޭ ދެން ޒިދާން އެހެން ކްލަބެއް ހޯދާށޭތަ ބުނަންވީ،"
އުމުރުން 81 އަހަރުގެ ލަ ގްރައެޓް އަށް ފްރާންސްގެ ފުޓްބޯޅަ ރައީސްގެ މަގާމު ދިފާއު ނުކުރެވޭނެ ކަމަށް ފްރާންސްގެ މީޑިއާ ރިޕޯޓްތައް ބުނެ އެވެ.
ކުރިން ސިޔާސީ މަސައްކަތްތަކެއް ކުރި ލަ ގްރައެޓް ފުޓްބޯޅައިގެ ތެރެއަށް އައީ، ފްރާންސްގެ ގީންގޯމް ސަރަހައްދުގެ ޓީމަކާ އެކުގަ އެވެ. އޭނާ ފްރާންސް ފުޓްބޯޅަ ރައީސްކަމަށް އެންމެ ފުރަތަމަ އިންތިހާބުވީ 2011 ވަނަ އަހަރު އެވެ. ލަ ގްރައެޓްގެ ސަސްޕެންޝަން މުއްދަތުގައި އެފްއެފްއެފްގެ ރައީސްގެ ޒިންމާއާ ހަވާލުވެވަޑައިގަތީ ނައިބު ރައީސް، ފިލީޕޭ ޑިއާލޯ އެވެ.
