ރޯމް (ޖެނުއަރީ 11) - އެކްސްޓްރާ ޓައިމްގެ ފަހުކޮޅު ފްރަންޗެސްކޯ އަޗޭބީ ޖެހި ލަނޑާ އެކު، އިޓާލިއަން ކަޕްގެ ގަދަ 16 ގެ ބުރުގައި ރޭ ޕާމާ އަތުން 2-1 އިން މޮޅުވެ، އިންޓަ, ކުއާޓާ ފައިނަލަށް ދަތުރުކޮށްފި އެވެ.
އިންޓަގެ ދަނޑުގައި ކުޅުނު މެޗުގެ 38 ވަނަ މިނިޓްގައި ޕާމާ އިން ލީޑު ނެގީ 38 ވަނަ މިނިޓުގައި ސްޓަންކޯ ޖޫރިކް ޖެހި ލަނޑެވެ. އިޓަލީގެ ދެ ވަނަ ޑިވިޝަންގައި އޮތް ޕާމާގެ ޖޫރިކް މެޗު 26 ވަނަ މިނިޓުގައި ކުޅެން އެރީ ޑެނިސް މޭން އަށް ލިބުނު އަނިޔާ އަކާ ގުޅިގެންނެވެ.
އަނިޔާގެ މައްސަލަތަކާ ގުޅިގެން ކުޅުމާ ދުރުގައި ހުރުމަށް ފަހު ޕާމާގެ ތަޖުރިބާކާރު ގޯލްކީޕަރު ޖިއާލުއީޖީ ބުފޮން ރޭގެ މެޗުގައި ކުޅުނެވެ. މެޗުގެ ފުރަތަމަ ހާފުގައި އިންޓަ އަށް ބުފޯން ހުރި ގޯލަށް ހަމަލާއެއް އަމާޒެއް ނުކުރެވުނެވެ. މުހިންމު ބައެއް ކުޅުންތެރިން ބެންޗަށް ލައިގެން މެޗު ފެށި އިންޓަ އަށް ޕާމާގެ ޑިފެންސް ފޫއަޅުވާލެވުނީ މެޗުގެ ފުރިހަމަ ވަގުތު ހަމަވާން ގާތްވެފައި ވަނިކޮށެވެ.
މެޗުގެ 88 ވަނަ މިނިޓުގައި އިންޓަ އަށް މެޗުގެ ނަތީޖާ ހަމަހަމަކޮށްދިނީ އާޖެންޓީނާގެ ފޯވަޑް ލައުޓާރޯ މާޓިނޭޒެވެ. މެޗުގެ އިތުރު ވަގުތުގައި އިންޓާގެ އެޑިން ޖެކޯ ފޮނުވާލި ނުރައްކާތެރި ހަމަލާއެއް ބުފޯން ވަނީ ދިފާއުކޮށްފައެވެ.
މެޗުގެ ފުރިަހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން ކުޅުނު އެކްސްޓްރާ ޓައިމްގައި އިންޓަ އިން އެ ޓީމު ކޮޅަށް ނަތީޖާ އަނބުރާލީ އަޗޭބީ ޖެހި ލަނޑުންނެވެ.
