ޑޯޓްމުންޑް، ޖާމަނީ (ޖެނުއަރީ 11) - މިދިޔަ އަހަރުގެ ޖުލައި މަހުން ފެށިގެން ކެންސަރަށް ފަރުވާ ހޯދަމުންދިޔަ ބޮރޫޝިއާ ޑޯޓްމުންޑްގެ ފޯވާޑް، ސެބަސްޓިއަން އަލެއާ އެނބުރި ކުޅުމުގެ ތެރެއަށް އަތުވެއްޖެ އެވެ.
މިދިޔަ ސީޒަންގައި ޑޯޓްމުންޑަށް ކުޅުނު އާލިން ހާލަންޑް އިނގިރޭސި ކުލަބު މެންޗެސްޓާ ޔުނައިޓެޑަށް ބަދަލުވުމުން އޭނާ ނެތްތަން ފޫބައްދަން އެކުލަބުން ގެނައީ އައިވޮރީ ކޮސްޓުގެ އަލެއާ އެވެ. ނަމަވެސް 28 އަހަރުގެ އަލެއާ އެ ކުލަބަށް މެޗެއްވެސް ނުކުޅެވެނީސް ސިއްހީ ހާލަތު ގޯސްވެގެން ކުޅުމާ ދުރަށްދާން ޖެހުނީ އެވެ.
ނެދަލެންޑްސްގެ އަޔެކްސް އިން 31 މިލިއަން ޑޮލަރަށް ޑޯޓްމުންޑާ ގުޅުނު އަލެއާގެ ސިއްހީ ހާލަތު ގޯސްވީ މި ސީޒަނަށް ތައްޔާރުވުމުގެ ގޮތުން މިދިޔަ އަހަރުގެ ޖުލައި މަހު ކުރިއަށްގެންދިޔަ ތަމްރީންތަކުގަ އެވެ. ޓެސްޓްތަކަށް ފަހު އެނގުނު ގޮތުގައި އަލެއާ އަށް ވަނީ ޓެސްޓިކިއުލާ ކެންސަރު ޖެހިފަ އެވެ.
މި ކަމަށް ފަރުވާ ހޯދުމުގެ ގޮތުން މިދިޔަ އަހަރުގެ ޖުލައި މަހުގެ ފަހުކޮޅު އޭނާ ވަނީ ސާޖަރީ އެއްވެސް ހަދައިފަ އެވެ. އޭގެ ފަހުން އިތުރު ސާޖަރީ އެއް ހަދައި މިދިޔަ ހަ މަސް ދުވަހު އޭނާ ދިޔައީ ކީމޯތެރަޕީ ވެސް ހަދަމުންނެވެ.
އަލެއާ، ޑޯޓްމަންޑްގެ ފަރިތަކުރުންތަކުގެ ތެރެއިން.
ސާޖަރީ އަށް ފަހު އަލެއާ އަށް އެނބުރި ކުޅުމުގެ ތެރެއަށް އާދެވޭނީ ކިހާ ދުވަހަކުންކަމެއް ޔަގީންކޮށް ބުނަން ނޭނގެ އެވެ. އެހެންނަމަވެސް ފަރުވާ އަށް ފަހު ޖެނުއަރީ މަހުގެ ކުރީކޮޅު އޭނާ ވަނީ ބޮރޫޝިއާ ޑޯޓްމުންޑްގެ ފަރިތަކުރުންތަކަށް ނުކުމެފަ އެވެ.
ކުރިން އިނގިރޭސި ކުލަބު ވެސްޓް ހޭމް ޔުނައިޓެޑަށް ވެސް ކުޅުނު އަލެއާ ވަނީ ޑޯޓްމުންޑުން ދާދި ފަހުން ކުޅުނު އެކުވެރިކަމުގެ މެޗެއްގައިވެސް ކުޅެފަ އެވެ. މި ވަގުތު ސްޕެއިންގައި ކޭމްޕްކޮށްގެން ތަމްރީން ހަދަމުން އަންނަ ޑޯޓްމުންޑުން ފޯޗޫނާ ޑުސެލްޑޯފާ ދެކޮޅަށް ކުޅުނު އެކުވެރިކަމުގެ މެޗުގައި އަލެއާ ކުޅެން އެރީ ދެ ވަނަ ހާފުގެ ފަހުކޮޅުގަ އެވެ.
އަލެއާގެ މިހާރުގެ އުއްމީދަކީ ވޯލްޑް ކަޕްގެ ބްރޭކަށް ފަހު މި މަހުގެ 22 ވަނަ ދުވަހު، ޖަރުމަނު ލީގުގައި އޮއުގްސްބާގާ ދެކޮޅަށް ޑޯޓްމުންޑް ކުޅޭ މެޗުގައި ކުޅުމެވެ. އަލެއާގެ މި ވަގުތުގެ ފިޓްނަސް އަށް ބަލާއިރު ވާދަވެރި މެޗެއްގައި ކުޅޭ ފެންވަރު އެބަހުރި ކަމަށް އެ ކުލަބުން ވެސް ވަނީ ހާމަކޮށްފަ އެވެ.
