ޕާކިސްތާންގެ ކުރީގެ ކެޕްޓަން އަދި ކްރިކެޓް ލެޖެންޑް ވަސީމް އަކްރަމް، ރާއްޖޭގެ ގައުމީ ކްރިކެޓް ޓީމުގެ ކުޅުންތެރިންނާ ބައްދަލުކޮށް އެ ކުޅުންތެރިންނަސް ހިތްވަރު ދީފި އެވެ.
އަމިއްލަ ޗުއްޓީއެއްގައި މި ވަގުތު ރާއްޖެ އައިސް ހުރި ޕާކިސްތާންގެ މަޝްހޫރު ކްރިކެޓަރު، ވަސީމް އަކްރަމް އިއްޔެ ވަނީ މާލޭ ކުޅިވަރު އެކުވެއްޏަށް ގޮސް އެތަނުގައި ޕްރެކްޓިސް ކުރަން ތިބި ދިވެހި ކުޅުންތެރިންނާ ބައްދަލުކޮށްފަ އެވެ.
މި ބައްދަލުވުމުގައި އޭނާއާ އެކު ކުޅިވަރާއި ބެހޭ ވަޒީރު އަހުމަދު މަހުލޫފު އާއި ރާއްޖޭގެ ކްރިކެޓް ބޯޑުގެ ރައީސް މުހައްމަދު ފައިސަލްގެ އިތުރުން ޕާކިސްތާނުން ރާއްޖެ އަށް ކަނޑައަޅުއްވާފައި ހުންނަވާ ސަފީރު މުހައްމަދު ފައްޔާޒް ޖީލާނީ ވެސް ބައިވެރިވެވަޑައިގެންނެވި އެވެ.
ދިވެހި ކުޅުންތެރިންނާ ބައްދަލުކޮށް ވަސީމް އަކްރަމް އެންމެ ފުރަތަމަވެސް ފާހަގަކުރީ މުބާރާތްތަކުގައި ވާދަކުރާއިރު ކުޅުންތެރިން ރަނގަޅަށް ތައްޔާރު ވުމަށެވެ. ރާއްޖެ ކަހަލަ ވަސީލަތްތައް މަދު ގައުމެއްގައި ޕްރެކްޓިސްކޮށްފައި އެހެން ގައުމަކަށްގޮސް ތަފާތު މާހައުލެއްގައި ތަފާތު ޕިޗެއްގައި ކުޅެން ޖެހޭނެކަން އެނގިތިބެ އެކަމަށް ތައްޔާރުވުމަށް އޭނާ ނަސޭހަތްތެރިވި އެވެ.
"މިއީ ސިމެންތި ޕިޗެއްދޯ. ހަނދާން ކުރާތި، މުބާރާތަށް ގޮސް ކުޅޭއިރު އެތާ އޮންނަ ޕިޗު، ތިޕިޗާ ވަރަށް ބޮޑަށް ތަފާތު ވާނެ. އެކަމަށް ރަނގަޅަށް ތައްޔާރުވާތި" ދުނިޔޭގައި އުފެދުނު އެންމެ މޮޅު ފާސްޓް ބޯލަރުންގެ ތެރޭގައި ހިމެނޭ ވަސީމް އަކްރަމް ބުންޏެވެ.
ވަސީމް އަކްރަމް ކުޅުނުއިރު، ނަގާފައިވާ ފޮޓޯއެއް.
ގައުމީ ޓީމު މިހާރު ތައްޔާރުވަމުން އަންނަނީ އަންނަ މަހު ތައިލެންޑުގައި އޮންނަ އޭސީސީ 50 އޯވަރުގެ ކްރިކެޓު މުބާރާތަށެވެ. މި މުބާރާތަށް ތައްޔާރުވުމަށް ދިވެހި ޓީމުން ދުރާލާ މެޗު ކުޅޭ މާހައުލަށް ދިޔުމުގެ މުހިންމުކަން އޭނާ ފާހަގަކުރި އެވެ. އަދި އެއީ ކާމިޔާބީ ލިބުމުގައި މުހިންމުކަމެއްކަން ފާހަގަކުރަމުން ވަސީމް އަކްރަމް މިސާލު ދެއްކީ 1992 ވަނަ އަހަރު ޕާކިސްތާނުން އުފުލާލި ވޯލްޑް ކަޕެވެ.
"ނުވަދިހަ ދެ ވަނަ އަހަރުގެ ވޯލްޑް ކަޕަށް އިމްރާން (އޭރުގެ ކެޕްޓަން) އަހަރެމެން ގެންދިޔަ އެއް މަސް ކުރިން. ބޭނުންވީ މުބާރާތުގެ ވީހާ ވެސް ކުރިން މާހައުލަށް ހޭނިލުން،" ލިމިޓެޑް އޯވާ ކްރިކެޓުގައި 500 ވިކެޓް ހަމަކުރި ފުރަތަމަ ކުޅުންތެރިޔާ، ވަސީމް ހެވިލާފައި، ކުރީގެ ހަނދާންތައް ހިއްސާކުރަމުން ބުންޏެވެ.
ވަސީމް ބުނީ ކޮންމެ ކަމެއްވެސް މޮޅަށް ކުރެވޭނީ ފަރިތަކުރި މިންވަރަކަށް ކަމަށާއި، ވީހާވެސް ގިނައިން ފަރިތަކޮށް އެކަމެއް "މާސްޓާ" ކުރުުން މުހިންމު ކަމަށެވެ.
ފަރިތަކުރަންވީ މިންވަރު އަންގައިދިނުމުގެ ގޮތުން ވަސީމް މިސާލެއް ދެއްކީ އޭނާގެ ކެރިއަރެވެ. ހަމައެކަނި ޕްރޮފެޝަނަލް މެޗުތަކުގައި އޭނާ އުކި އޯވަރުގަ އަދަދު 80،000 އާ ގާތްކުރާނެ ކަމަށް ވަސީމް ވަނީ ބުނެފަ އެވެ.
މި ވަރަށް މެޗުތަކުގައި އޭނާ ފަރިތަކުރި މިންވަރު އަންދާޒާކޮށްލުމަށް ދިވެހި ކުޅުންތެރިން ކައިރީގައި އޭނާ ބުންޏެވެ.
ދިވެހި ކުޅުންތެރިންނާއިއެކު ހޭދަކުރި ވިއްސަކަށް މިނެޓު އޭނާ ނިންމާލީ ވައުދެއް ވަމުންނެވެ. އެއީ ދެން ދިވެހިރާއްޖެ އަންނަ ދަތުރެއްގައި ގައުމީ ޓީމްގެ ކުޅުންތެރިންނާއިއެކު ޕްރެކްޓިސް ޝެޝަނެއް ކުރިއަށް ގެންދާނެކަމުގެ ވައުދެވެ.
ވަސީމް އަކްރަމް ވަނީ އޭނާ ރައްޖޭގައި ހޭދަކުރަމުން އަންނަ ޗުއްޓީގެ ތެރެއިން ވަގުތުކޮޅެއް ހުސްކޮށްލައި އިއްޔެ ރާއްޖޭގެ ނައިބް ރައީސް ފައިސަލް ނަސީމް އާވެސް ބައްދަލުކުރައްވައިފަ އެވެ.
