ލަންޑަން (ޖެނުއަރީ 10) - އިނގިރޭސި އެފްއޭ ކަޕްގެ ތިން ވަނަ ބުރުގައި އޮކްސްފޯޑް ޔުނައިޓެޑް އަތުން ރޭ 3-0 އިން މޮޅުވެ، އާސެނަލް މުބާރާތުގެ ހަތަރު ވަނަ ބުރުގައި މެންޗެސްޓާ ސިޓީއާ ދެކޮޅަށް ކުޅެން ޖެހިއްޖެ އެވެ.
ދުނިޔޭގެ އެންމެ ގިނަ ދުވަސްވީ ފުޓްބޯޅަ މުބާރާތް ކަަމަށްވާ އިނގިރޭސި އެފްއޭ ކަޕްގެ ހަތަރު ވަނަ ބުރުުގެ މެޗުތައް އޮންނާނީ މި މަހު ފަހުކޮޅުގަ އެވެ.
އެފްއޭ ކަޕް އެންމެ ގިނަ ފަހަރު ކާމިޔާބު ކުރުމުގެ ރެކޯޑް އޮތް އާސެނަލުން ރޭގެ މެޗުގައި ބޭނުންކުރި ހުދު ޖޯޒީގައި އެއްވެސް އިތުރު ކުލައެއް ހިމަނާފައެއްނުވެ އެވެ. މިއީ އާސެނަލުން މިދިޔަ އަހަރެކޭ އެއްގޮތަށް ވަޅީގެ ހަމަލާތައް ލަންޑަނުގައި ގިނަވަމުންދާތީ، އެ ކަމާ ދެކޮޅަށް ކުރިއަށްގެންދާ، "ނޯ މޯ ރެޑް" ކެމްޕެއިނާ ބައިވެރިވުމުގެ ގޮތުން ކުރި ކަމެކެވެ.
އޮކްސްފޯޑް ދަނޑުގައި ރޭ ކުޅުނު މެޗުގެ ފުރަތަމަ ހާފުގައި އާސެނަލްގެ މިޑްފީލްޑަރު ސަމްބީ ލޮކޮންގާ އޭރިއާތެރެއިން ޖެހި ޝޮޓެއް އޮކްސްފޯޑް ކުޅުންތެރިއަކުގެ އަތުގައި ޖެހުނު ނަމަވެސް ރެފްރީ ޕެނަލްޓީއެއް ނުދިނެވެ.
ރޭގެ މެޗުގައި އާސެނަލުން ތިން ގޯލު ޖެހީ ވެސް މެޗުގެ ދެ ވަނަ ހާފުގަ އެވެ.
އާސެނަލަށް ލީޑުނަގައިދިން ގޯލު ޖެހީ މެޗުގެ 63 ވަނަ މިނިޓްގައި މުހައްމަދު އެލްނެނީ އެވެ. މިއީ ހިލޭ ޖެހުމަކުން އާސެނަލްގެ ޕޯޗުގީސް މިޑްފީލްޑަރު، ފަބިއޯ ވިއޭރާ ނެގި ހުރަހަކުން، އެލްނެނީ ބޮލުން ޖެހި ގޯލެކެވެ.
އޭގެ ހަތް މިނިޓް ފަހުން، މެޗުގެ 70 ވަނަ މިނިޓްގައި ވިއޭރާ ދިން ބޯޅައަަކަށް ހުސްކޮށް އަރައި، އާސެނަލްގެ ފޯވާޑް އެޑީ އެންކެޓިއޭ ވަނީ އޮކްސްފޯޑްގެ ކީޕަރު، އެޑްވާޑް މެކްގިންޓީ ކައިރިން ނައްޓާފައި ގޯލަށް ފޮނުވާލައިފަ އެވެ.
މެޗުގެ 76 ވަނަ މިނިޓްގައި އާސެނަލްގެ ފަހު ލަނޑު ވެސް ޖެހީ މެޗުގެ މޮޅު ކުޅުންތެރިޔާ، އެންކެޓިއޭ އެވެ. ކައުންޓަ އެޓޭކުގައި އާސެނަލްގެ ގަބްރިއެލް މާޓިނެލީ އޭރިއާތެރެއަށް ހުސްކޮށްލާފައި ދިން ބޯޅަ އަކަށް އަރައި، އެންކެޓިއޭ ވަނީ ހަމަޖެހިލާފައި ގޯލަަށް ބޯޅަ ފޮނުވާލައިފަ އެވެ.
އާސެނަލްގެ ބުކާޔޯ ސަކާ އަށް ރޭގެ މެޗުގައި އަނިޔާވެގެން ބަދަލުކުރަން ޖެހުނު ނަމަވެސް އެއީ މާ ސީރިއަސް ކަމެއްގެ ގޮތުގައި ނުބެލެވޭ ކަމަށް އާސެނަލްގެ ކޯޗު މިކޭލް އާޓެޓާ ވަނީ މެޗަށް ފަހު ބުނެފަ އެވެ. އަދި އާޓެޓާ ވަނީ ޒުވާން ފޯވާޑް، އެންކެޓިއޭ އަށް އަދިވެސް އިތުރަށް ކުޅުން ރަނގަޅުކުރެވޭނެ ކަމަށް ބުނެ، އޭނާގެ މަސައްކަތުގެ ރޭޓް ފާހަގަކޮށްފަ އެވެ.
