މިލާން (ޖެނުއަރީ 9) - އިޓާލިއަން ލީގުގެ އެއް ވަނަގައި އޮތް ނަޕޯލީ އިން 2-0 އިން ސަމްޑޯރިއާ ބަލިކޮށް ލީޑު ފުޅާކުރިއިރު، އޭސީ މިލާން ކޮޅަށް ފަހު ވަގުތު ދެ ގޯލު ޖަހައި ރޯމާ އިން މިލާން މޮޅުވިޔަނުދީ ހިފަހައްޓައިފި އެވެ.
ލީގުގެ ދެ ވަނަ އަށް އަރަން މިލާނަށް ފުރުސަތު ލިބިފައި އޮތް ނަމަވެސް ރޯމާއާ ވާދަކޮށް 2-2 އިން އެއްވަރުވުމުން ލީގުގެ ދެ ވަނަގައި އޮތް ޔުވެންޓަސްއާ ޕޮއިންޓްގެ ގޮތުން ހަމަހަމަވި ނަމަވެސް ފައިދާ ގޯލަށް ބަލާއިރު މިލާން އޮތީ ލީގުގެ ތިން ވަނައިގަ އެވެ.
ޔުވެންޓަސް އާއި މިލާން އަށް 37 ޕޮއިންޓް ލިބިފައިވާއިރު، އެއް ވަނަގައި ނަޕޯލީން ވަނީ ހަތް ޕޮއިންޓްގެ ލީޑެއް ނަގައިފަ އެވެ. ރޯމާ އޮތީ 31 ޕޮއިންޓާ އެކު ލީގުގެ ފަސް ވަނައިގަ އެވެ.
ސަމްޑޯރިއާ އަތުން ނަޕޯލީ މޮޅުވި މެޗަކީ ލީގުގައި މި ސީޒަންގައި ނަޕޯލީ މޮޅުވި 14 ވަނަ މެޗެވެ. މި މެޗުގައި އެ ޓީމުގެ ދެ ގޯލު ޖަހައިދިނީ ވިކްޓާ އޮސީމެން އާއި އެލްޔިފް އެލްމާސް އެވެ.
އޮސީމެން ޖެހި ގޯލާ އެކު ލީގުގައި އޭނާ ޖެހި ގޯލުގެ އަދަދު ވަނީ 10 އަށް އަރައިފަ އެވެ. އިޓާލިއަން ލީގުގެ މި ސީޒަނުގެ ލަނޑު ލިސްޓުގެ އެންމެ ކުރީގައިވެސް މި ވަގުތު އޮތީ އޮސީމެން އެވެ. މެޗުގައި އެލްމާސް ޖެހި ގޯލަކީ ލިބުނު ޕެނަލްޓީއަކުން އޭނާ ކާމިޔާބުކުރި ގޯލެކެވެ.
ލީގުގައި ރޭ ރޯމާއާ ދެކޮޅަށް ކުޅުނު މެޗުގައި ފުރަތަމަ ދެ ގޯލު ޖެހީވެސް މިލާނުންނެވެ. ފުރަތަމަ ގޯލު ލިބުނު ކޯނަރަކުން ސަންދްރޯ ޓޮނާލީ ނަގައިދިން ހުރަހަކުން ޖަހައިދިނީ ޕިއޭ ކަލޫލޫ އެވެ. ދެ ވަނަ ގޯލު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޓޮމާސޫ ޕޮބޭގާ އެވެ. މިއީ ޕޮބޭގާ ލީގުގައި ޖެހި ފުރަތަމަ ގޯލެވެ.
މިލާނުން މެޗުން މޮޅުވާނެ ކަމަށް ނިންމައިގެން ތިއްބައި، ފަހު ވަގުތު ގެނައި ބަދަލުތަކާއެކު ރޯމާ އިން ނަތިޖާ އަނބުރާލި އެވެ. މެޗުގެ 87 ވަނަ މިނެޓުގައި ރޯމާގެ ފުރަތަމަ ގޯލު ރޯޖާ އިބާނޭޒް ޖަހައިދިންއިރު މެޗުގެ އިތުރު ވަގުތުގެ ތެރޭގައި ނަތީޖާ ހަމަހަމަކުރި ގޯލު ޖަހައިދިނީ އިނގިރޭސި ފޯވާޑް، ޓެމީ އަބްރަހަމް އެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު ލާޒިއޯ އާއި އެމްޕޯލީގެ ކުރިމަތިލުން 2-2 އިން އެއްވަރުވިއިރު، ސެލަނިޓާނާ އާއި ޓޮރީނޯ ވާދަކުރި މެޗުވެސް ނިމުނީ 1-1 އިން އެއްވަރުވެގެންނެވެ.
