މެޑްރިޑް (ޖެނުއަރީ 7) - ބޮރޫޝިއާ ޑޯޓްމަންޑަށް ކުޅެމުން އަންނަ އިނގިރޭސި ގައުމީ ޓީމުގެ މިޑްފީލްޑަރު، ޖޫޑް ބެލިންހަމް އަށް ރެއާލް މެޑްރިޑްގެ މާ ބޮޑު ޝައުގުވެރިކަމެއް ނެތް ފަދަ ގޮތަކަށް އެ ޓީމުގެ ކޯޗު ކާލޯ އަންޗެލޮޓީ ވާހަަކަ ދައްކައިފި އެވެ.
މި ފަހަރުގެ ވޯލްޑް ކަޕްގައި، އުމުރުން 19 އަހަރުގެ ބެލިންހަމް ދެއްކި މޮޅު ކުޅުމުގެ ސަބަބުން އޭނާގެ ސޮއި ހޯދަން އިނގިރޭސި ކްލަބްތަކާއި ޔޫރަޕްގެ ވަރުގަދަ ޓީމުތަކުން އުޅޭ ކަމަށް މީޑިއާގައި ވަނީ އަޑުފެތުރިފަ އެވެ. އެ ގޮތުން، ބެލިންހަމް ބަދަލުވުމުގެ އެންމެ ބޮޑު ފުރުސަތެއް އޮތް ކްލަބެއްގެ ގޮތުގައި އިނގިރޭސި މީޑިއާ އިން މިހާރު ވާހަކަ ދައްކަމުން އަންނަ ޓީމަކީ، ރެއާލް އެވެ.
ސްޕެނިޝް ލީގުގައި ވިޔަރެއާލާ ދެކޮޅަށް ކުޅޭ މެޗުގެ ކުރިން ރެއާލްގެ ކޯޗު އަންޗެލޮޓީ، މީޑިއާ އިން ކުރި ސުވާލުތަކަށް ޖަވާބު ދެމުން ވަނީ ބެލިންހަމް އާއި ރެއާލާ ގުޅުވައިގެން މީޑިއާގައި ދެކެވޭ ވާހަކަ ތަކަށް އިޝާރާތްކޮށް ޖަވާބުދީފަ އެވެ.
ވޯލްޑް ކަޕްގެ ކުއާޓާ ފައިނަލްގައި ފްރާންސާއި އިންގްލެންޑް ކުޅުނު މެޗުގެ ތެރެއިން: ފްރާންސްގެ ޗުއަމެނީ އަތުން ބޯޅަ ހޯދަން އިންގްލެންޑްގެ ބެލިންހަމް މަސައްކަތްކުރަނީ.
"ޔަގީނުން ވެސް ވޯލްޑް ކަޕްގައި ބެލިންހަމް ސާބިތުކޮށްދިން އޭނާ އަކީ ހުނަރުވެރި މޮޅު މިޑްފީލްޑަރެއް ކަން. ވަރަށް މޮޅަށް ކުޅުނު މިޑްފީލްޑަރުން ވޯލްޑް ކަޕުން ފެނުނު، މިސާލަކަށް ކިޔަމާ، އެންޒޯ (ފެނާންޑޭސް)، ދެން، ސްޕެއިނުގެ ޕެޑްރީ އާއި ގަވީ ވެސް ވަރަށް ރަނގަޅު ވޯލްޑް ކަޕެއް ނިންމާލީ،" އަންޗެލޮޓީ ބުންޏެވެ.
"ހަގީގަތަކީ ވަރަށް ހުނަރުވެރި މިޑްފީލްޑަރުންގެ ޖީލެއް މި އުފެދެނީ، ވަރަށް މޮޅެތި ކުޅުންތެރިން މި އަންނަނީ. އެކަމަކު، އަހަރެން ބަރޯސާވަނީ އަހަރެމެންގެ މި އޮތް މިޑްފީލްޑަރުންނަށް، ޗުއަމެނީ، ކަމަވިންގާ ދެން ވަލްވޭޑޭ، މި ކުޅުންތެރިން މި އަރަނީ ވަރަށް ރަނގަޅަށް މި ޓީމުގެ ސިސްޓަމްގެ ތެރެއިން ކުރިއަރަމުން،"
ކަމަވިންގާ އާއި ޗުއަމެނީ ވަނީ ވޯލްޑް ކަޕްގައި ފްރާންސަށް ރަނގަޅު ކުޅުމެއް ދައްކައިފަ އެވެ. ގްރޫޕް ސްޓޭޖުން ކެޓި ނަމަވެސް އުރުގުއޭގެ ތިން މެޗުގައި ވެސް ވަލްވޭޑޭ ކުޅުނެވެ.
ބެލިންހަމް، މި ވަގުތު ޑޯޓްމަންޑްގެ ކޮންޓްރެކްޓްގައި ހުރީ 2025 ވަަނަ އަހަރުގެ ޖޫން މަހުގެ ނިޔަލަށެވެ. އެކަމަކު، މި ސީޒަނަށް ފަހު ބެލިންހަމް ޓީމު ބަދަލުކުރުމުގެ ފުރުސަތު ބޮޑުއިރު، އޭނާގެ ސޮއި ހޯދަން މަސައްކަތް ކުރާ ޓީމުތަކުގެ ތެރެއިން ރެއާލް މާ ބޮޑަށް ނުފެންނާނެ ކަމަށް ރިޕޯޓްތައް ބުނެ އެވެ.
އަންޗެލޮޓީ ވަނީ ރެއާލްގެ ޔޫތު ސިސްޓަމްގެ ތެރެއިން ދެން އަންނަ މިޑްފީލްޑަރަކަށް ފުރުސަތު ދިނުމުގެ ވިސްނުން ގެންގުޅޭ ކަމަށް ވެސް ބުނެފަ އެވެ.
އެ ގޮތުން، އުރުގުއޭގެ މިޑްފީލްޑަރު، ވަލްވޭޑޭ އަކީ 2016 ވަނަ އަހަރު ރެއާލްގެ ޔޫތު ޓީމާ ގުޅި، އޭގެ ތެރެއިން އައި ކުޅުންތެރިއަކަށްވާއިރު، އުންމީދަކީ އެ ފަދަ ގޮތަކަށް އެހެން ކުޅުންތެރިއަކު ވެސް ގެނައުން ކަމަށް، އަންޗެލޮޓީގެ ވާހަކައިގައި ފާހަގަކުރި އެވެ.
