ސައޮ ޕޯލޯ (ޖެނުއަރީ 2) - ދެ އަހަރު ދުވަހުގެ އެއްބަސްވުމެއްގައި އުރުގުއޭގެ ތަޖުރިބާކާރު ފޯވަޑް ލުއިސް ސުއަރޭޒް ބްރެޒިލްގެ ގްރެމިއޯއާ ގުޅިއްޖެ އެވެ.
ސުއަރޭޒް ،35، ގްރެމިއޯއާ ގުޅުނީ ހިލޭ ޓްރާންސްފާއެއްގަ އެވެ. ކުރިން އަޔަކްސް، ލިވަޕޫލް، ބާސެލޯނާ އަދި އެތުލެޓިކޯ މެޑްރިޑަށް ކުޅުނު ސުއަރޭޒް އެންމެ ފަހުން ކްލަބު ފުޓްބޯޅައިގައި ކުޅުނީ އުރުގުއޭގެ ނަސިއޮނާލް އަށެވެ.
ސުއަރޭޒްގެ ކެރިއަރު ފެށި ކްލަބު ކަމަށްވާ ނަސިއޮނާލްއާ ޖުލައި މަހު ގުޅުމަށް ފަހު އޭނާ އެ ކްލަބުގައި ހޭދަކުރީ ތިން މަހެވެ. އެ މުއްދަތުގައި އޭނާ ވަނީ އެ ޓީމަށް 16 މެޗުން އަށް ލަނޑު ކާމިޔާބުކޮށްދީ، އުރުގުއޭގެ ލީގު ޗެމްޕިއަންކަން ހޯދައިދިނުމަށް އެހީތެރިވެދީފަ އެވެ.
ގްރެމިއޯ އިން ބުނީ ސުއަރޭޒް އެ ކްލަބާ ގުޅުނީ ދެ އަހަރު ދުވަހުގެ އެއްބަސްވުމެއްގެ ދަށުން ކަމަށެވެ.
ގަތަރުގައި މިދިޔަ އަހަރު އޮތް ފީފާ ވޯލްޑް ކަޕްގައި އުރުގުއޭ ކުޅުނު ތިން މެޗުގައި ވެސް ސުއަރޭޒް ކުޅުނެވެ. އެކަމަކު، ސުއަރޭޒް އަށް މުބާރާތުގައި ލަނޑެއް ނުޖެހުނެވެ.
ގްރެމިއޯ ބްރެޒިލްގެ ސީރިއާ ބީ އިން ފުރަތަމަ ޑިވިޝަނަށް އަލުން ޕްރޮމޯޓްވީ މިދިޔަ އަހަރުގެ ނޮވެމްބަރު މަހެވެ. މި އަހަރު ގްރެމިއޯ ކުޅޭ ފުރަތަމަ މެޗު އޮތީ މި މަހުގެ 17 ވަނަ ދުވަހެވެ.
ނަސިއޮނާލް އިން ކެރިއަރު ފެށުމަށް ފަހު، ސުއަރޭޒް ނެދަލޭންޑްސްގެ އެފްސީ ގްރޮނިގެންއާ ގުޅުނީ 2006 ވަނަ އަހަރެވެ. ޔޫރަޕްގައި ސުއަރޭޒް ހޭދަކުރި ކާމިޔާބު އަހަރުތަކުގައި އޭނާ ވަނީ ބާސެލޯނާއާ އެކު 2015 ވަނަ އަހަރުގެ ޗެމްޕިއަންސް ލީގު ހޯދައިފަ އެވެ.
