މެންޗެސްޓާ (ޖެނުއަރީ 2) - ޖެނުއަރީ ޓްރާންސްފާގައި މެންޗެސްޓާ ޔުނައިޓެޑުން ފޯވާޑެއް ގަންނާނެ ކަމަށާއި، އެކަމަކު އަވަސް އަރުވާލައިގެން ކުޅުންތެރިއަކު ހޯދަން ބޭނުން ނުވާކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
ޔުނައިޓެޑުން ފޯވާޑެއް ހޯދުމުގެ މަސައްކަތް ފަށާފައިމިވަނީ ކުރީގެ ފޯވާޑް ކްރިސްޓިއާނޯ ރޮނާލްޑޯ ކުލަބު ދޫކޮށްލުމާ ގުޅިގެންނެވެ. ގަތަރުގައި މިދިޔަ މަހު ނިމުނު ވޯލްޑް ކަޕް ފުޓްބޯޅަ މުބާރާތުގައި ޕޯޗުގަލް ކުޅުނު މެޗުގެ ކުރިން އެ ޓީމުގެ ކެޕްޓަން ރޮނާލްޑޯ ވަނީ ޔުނައިޓެޑާ އެކު ހަދާފައިވާ އެއްބަސްވުން އުވާލައިފަ އެވެ.
ރޮނާލްޑޯ، ޔުނައިޓެޑް ދޫކޮށްލީ ކޯޗު ޓެން ހާގާ ދެމެދު މައްސަލަ ޖެހި ކުލަބުގެ ވެރިންގެ ފަރާތުން ވެސް އެންމެ އެކަށީގެންވާ މިންވަރުގެ އެއްބާރުލުމެއް ނުލިބުމުން ކަމަށް ބުނެ އެވެ.
"ރޮނާލްޑޯ ދިޔުމުން ފޯވާޑުން މަދު މިހާރު. ބެންޗުން އަރުވަން ވެސް ރަނގަޅު ތަޖުރިބާކާރު އެޓޭކިން ބަދަލެއް ނެތް. މިއީ ޓީމަށް ސީޒަންގެ ފަހުކޮޅު މައްސަލަ ދިމާވެދާނެކަމެއް. އެކަމަށް ތައްޔާރުވާން ޖެހޭނެ." ޓެން ހާގް ބުންޏެވެ.
ޔުނައިޓެޑުން ޓްރާންސްފާ މާކެޓް ފެށުމުގެ ކުރިން އެންމެ ބޮޑަށް މަސައްކަތްކުރީ ވޯލްޑް ކަޕްގައި ނެދަލެންޑްސް ޓީމުން ވިދާލި ކޯޑީ ގަކްޕޯ ގަތުމަށެވެ. ނަމަވެސް ޔުނައިޓުން ކުރި މަސައްކަތް ފެނަށް ދިޔައީ ލިވަޕޫލުން ގަކްޕޯގެ ޑީލް ނިންމުމުންނެވެ.
ފިނި މޫސުމުގެ ޓްރާންސްފާ މާކެޓް މިހާރު ހުޅުވިފައި އޮތްއިރު، ޔުނައިޓެޑަށް ސޮއިކުރުން ގާތީ ބޮރޫޝިއާ މުންޗެންގްލަޑްބެކަށް ކުޅެމުން އަންނަ ފްރާންސްގެ ފޯވާޑް މާކަސް ތުރާމް ކަމަށް ބައެއް ރިޕޯޓްތައް ބުނެ އެވެ.
ފްރާންސްގެ ލެޖެންޑަރީ ޑިފެންޑަރު، ލިލިއަން ތުރާމްގެ ދަރިފުޅު، މާކަސް ތުރާމް ޖަރުމަން ޓީމާ އެކު ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާއިރު ކުޑަ އަގެއްގައި އޭނާ ހޯދުމުގެ ފުރުސަތު ޖަރުމަނަށް އެބައޮތެވެ. އަނެއްކޮޅުން، ވޯލްޑް ކަޕްގައި ތުރާމް ދެއްކި ކުޅުމާ އެކު އޭނާ ހޯދަން ބައެއް ކުލަބުތަކުން ތިބީ ތައްޔާރުވެގެންނެވެ.
ޔުނައިޓެޑުން ދެން ހޯދަން މަސައްކަތްކުރާ ކުޅުންތެރިއަކީ އެތުލެޓިކޯ މެޑްރިޑްގެ ޔާއޯ ފެލިކްސް އެވެ. އާސެނަލުން ވެސް ހޯދަން މަސައްކަތް ކުރަމުން އަންނަ ފެލިކްސް ލޯނު އުސޫލެއްގެ ދަށުން ދޫކޮށްލަން އެތުލެޓިކޯ އިން އޮތީ ތައްޔާރަށް ކަމަށް ރިޕޯޓްތައް ބުނެ އެވެ.
ޔުނައިޓެޑުން ރޮނާލްޑޯގެ ކޮންޓްރެކްޓް އުވާލުމާ އެކު އެކުލަބުގެ މުސާރައިގެ ހަރަދުވަނީ ކުޑަވެފައި އެވެ. އެހެންވެ، ރަނގަޅު ކުޅުންތެރިއަކު ހޯދައި، ކޮންޓްރެކްޓް ނިންމަން ވެސް ޔުނައިޓެޑަށް ފަސޭހަތަކެއް އެބައޮތެވެ.
ޓެން ހާގް ބުނީ ޔުނައިޓެޑުން ޔަގީނުން ވެސް ފޯވާޑެއް ގަންނާނެ ކަމަށެވެ. އެކަމަކު، އަވަސްއަރުވަލާފައި ކުޅުންތެރިއަކު ނުހޯދާނެކަން ފާހަގަކޮށް، ޓެން ހާގް ބުނީ ކުލަބުގެ ސްޓައިލާ ގުޅޭ "ރަނގަޅު" ކުޅުންތެރިޔާ ހޯދުމަށް ވަގުތު ނެގިޔަސް ފަރުވާލެއް ނެތް ކަމަށެވެ.
މި ވަގުތަށް ބަލާއިރު ޓެން ހާގް، އެ ޓީމަށް އާ ފޯވާޑެއް ގެންނަން ވަގުުތު ނަގާއިރު، ލިބޭނެ އެންމެ ބޮޑު ހިތްހަމަޖެހުމަކީ ޔުނައިޓެޑްގެ އިނގިރޭސި ފޯވާޑް، މާކަސް ރަޝްފޯޑް ރަނގަޅު ފޯމެއްގައި ހުރުމެވެ. ވޯލްޑް ކަޕަށް ފަހު ޔުނައިޓެޑް ކުޅުނު މެޗުތަކުގައި ރަޝްފޯޑުގެ އަންނަނީ ތަފާތު ދައްކައި، ގޯލު ޖަހަމުންނެވެ.
