ބަންގްލަދޭޝްގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަންގެ ބީޗް ވޮލީބޯލް ޓުއާގައި ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ ކުޅުނު ދެ ވަނަ މެޗުން ވެސް މޮޅުވެ، ސެމީ ފައިނަލަށް ދަތުރުކޮށްފި އެވެ.
މިއަދު ހެނދުނު ކުޅުނު މެޗުން، ކުޑަކާއްޓެ އާއި އެޑަމްގެ ޕެއާ ވަނީ ކިރްގިސްތާންގެ މެޑެޓްބެކް އޫލޫ އާއި ޒީންބެކް އޫލޫ އަތުން 21-12، 21-12 އިން މޮޅުވެފަ އެވެ.
ދެ ވަނަ މެޗުގައި މެންދުރު ފަހު ސެޝަންގައި، ނުކުތީ ބޫޓާންގެ ޑޯޖީ އާއި ޖިގްމޭގެ ޕެއާއާ ދެކޮޅަށެވެ. އެ މެޗުން ސީދާ ދެ ސެޓުން މޮޅުވެ، ބާކީ މެޗެއް އޮއްވައި، މި ވަނީ ސެމީގެ ޖާގަ ހޯދައިފަ އެވެ. ބޫޓާންގެ ޑޯޖީ އާއި ޖިގްމޭ އަތުން އެޑަމް އާއި ކުޑަކާއްޓެގެ ޕެއާ މޮޅުވީ 21-09، 21-09 އިންނެވެ.
ގްރޫޕްގެ ފަހު މެޗުގައި މާދަމާ ކުޑަކާއްޓެ އާއި އެޑަމްގެ ޕެއާ ނުކުންނާނީ ބަންގްލަދޭޝްގެ މޮންސޫރާއި ހައިދަރުގެ ޕެއާއާ އެވެ.
އެޑަމް އާއި ކުޑަކާއްޓެގެ ޕެއާ އާއި ބޫޓާންގެ ޕެއާ މެޗަށް ފަހު އެކުގައި ނަގާފައިވާ ފޮޓޯއެއް.
މި އަހަރު ރަސްމީކޮށް ޕެއާއެއްގެ ގޮތުގައި ކުޅެން ފެށި އެޑަމް އާއި ކުޑަކާއްޓެ ވަނީ ބައިނަލްއަގުވާމީ ގިނަ މެޗުތަކެއް މި އަހަރު ތެރޭ ކުޅެފަ އެވެ. އޭގެ ތެރޭގައި ސްރީ ލަންކާގައި ކުރިއަށްދިޔަ ސެންޓްރަލް ޒޯން ބީޗްވޮލީ މުބާރާތާއި ކޮމަންވެލްތު ކޮލިފައިންގެ އިތުރުން، އިންގްލެންޑްގައި ކުރިއަށްދިޔަ ކޮމަންވެލްތު ގޭމްސް ހިމެނެ އެވެ. އެޑަމް އާއި ކުޑަކާއްޓެގެ ޕެއާ ވަނީ ކޮމަންވެލްތު ކޮލިފައިން ބުރުގެ ފައިނަލުގައި ކުޅެފަ އެވެ.
މި ފަހަރު ސެންޓްރަލް އޭޝިއަން ޒޯން ބީޗް ވޮލީ މުބާރާތުގެ ސެމީން ފުރުސަތު ހޯދައި، ކުޑަކާއްޓެ އާއި އެޑަމްގެ ޕެއާ މި ވަނީ ކުރިއެރުން ހާސިލްކޮށްފަ އެވެ. މިއީ ރާއްޖޭގައި ބީޗްވޮލީބޯޅަ ކުރިއަރުވަން ދުނިޔޭގެ ޖަމިއްޔާ، އެފްއައިވީބީގެ އެހީތެރިކަމާ އެކު ލިބިފައިވާ ބްރެޒިލްގެ ކޯޗު ވިނީޝިއުސް ޖޫނިއާއާ އެކު ލިބުނު އިތުރު ކާމިޔާބެކެވެ.
ސެންޓްރަލް ޒޯން ބީޗް މުބާރާތުގައި މި ފަހަރު ވާދަކުރާ ރާއްޖޭގެ ދެ ވަނަ ޕެއާ އަކީ ޝަމާއިލް ހުސެއިން އާއި އަހުމަދު މުހައްމަދު (ކޯކޭ)ގެ ޕެއާ އެވެ. އެ ޕެއާ އިން މިއަދު ހެނދުނު ކުޅުނު މެޗުން ވަނީ ބަންގްލަދޭޝްގެ ނޫރު ނަބީ އާއި ޝައިފުއްދީންގެ ޕެއާ އަތުން 21-09، 21-12 އިން މޮޅުވެފަ އެވެ. އެކަމަކު، މެންދުރު ފަހު، ނޭޕާލްގެ ސުނަރު އާއި މަން ބަހާދުރު ޝްރެސްތާގެ ޕެއާއާ ކުޅެގެން ވަނީ 2-1 ސެޓުން ބަލިވެފަ އެވެ. ސެޓުތައް ދިޔައީ، 21-17، 14-21 އަދި 09-15 އިންނެވެ.
މުބާރާތުގައި މާދަމާ ކުޅޭ މެޗުން ކޯކޭ އާއި ޝަމާއިލްގެ ޕެއާ އިން ބަންގްލަދޭޝްގެ ބިސްވާސް އާއި ޕަވެލްގެ ޕެއާ ބަލިކޮށްފިނަމަ ސެމީން ޖާގަ ލިބޭނެ އެވެ.
